სილქ როუდ ჯგუფი საერთაშორისო კაპიტალის ბაზრების კონფერენციაზე - ევროობლიგაციების წარმატებული განთავსების გამოცდილება
თიბისი კაპიტალის მიერ გამართულ კაპიტალის ბაზრების მეორე საერთაშორისო კონფერენციაზე ერთ-ერთი საპანელო სესია - საქართველო საერთაშორისო კაპიტალის ბაზრებზე: ორი წარმატებული ევროობლიგაციის ტრანზაქციის მიმოხილვა - დაეთმო საქართველოდან საერთაშორისო ბაზრებზე ბოლოდროინდელი წარმატებული ევროობლიგაციების გამოშვების გამოცდილების განხილვას საქართველოს მთავრობის და სილქ როუდ ჯგუფის მაგალითზე.
სესიის ფარგლებში განხილული იყო ქართველი ემიტენტების პოზიციონირება საერთაშორისო ინვესტორებთან, მათი უკუკავშირი და ინტერესი ქვეყნის რისკების გათვალისწინებით. ასევე ყურადღება გამახვილდა ობლიგაციების გამოშვების პროცესზე, მის ძირითად გამოწვევებსა და წარმატების განმაპირობებელ ფაქტორებზე.
სილქ როუდ ჯგუფის დამფუძნებელმა გიორგი რამიშვილმა კონფერენციაზე ისაუბრა იმ გამოცდილებაზე და პროცესზე, რომელიც წინ უძღოდა 2025 წლის სექტემბერში განხორციელებულ 400 მილიონი აშშ დოლარის მოცულობის კორპორატიულ ემისიას საქართველოს ისტორიაში ყველაზე მასშტაბურ ტრანზაქციას ამ მიმართულებით. მისი თქმით, ინვესტორების მაღალი ინტერესი და ნდობა განაპირობა როგორც კომპანიის სტრატეგიულმა ხედვამ, ასევე ქვეყნის მიმართ მზარდმა ინტერესმა. ემისიის შედეგად მიღებული რესურსი კი კომპანიის ახალი პროექტებისა და განვითარების გეგმების დაფინანსებას მოხმარდება.
გიორგი რამიშვილი, სილქ როუდ ჯგუფის დამფუძნებელი:
“ეს იყო ხანგრძლივი და საინტერესო გზა. სილქნეტი 2017 წელს შევიდა ობლიგაციების ადგილობრივ ბაზარზე და 2019 წელს საერთაშორისო ბაზარზეც გავიდა. შევიძინეთ დიდი გამოცდილება, დავიმსახურეთ ინვესტორების ნდობა და ავიმაღლეთ საერთაშორისო საკრედიტო რეიტინგი. 2025 წელს წარმატებით გავედით საერთაშორისო ბაზარზე უკვე ჰოლდინგის დონეზე. მთელი ამ პროცესის განმავლობაში ჩვენ ყოველთვის ვასრულებდით ინვესტორების წინაშე აღებულ ვალდებულებებს და ვინარჩუნებდით გამჭვირვალე და სანდო კორპორაციულ მმართველობას, რაც საერთაშორისო ბაზრებზე წარმატებისთვის აუცილებელი ფაქტორია.“
გიორგი რამიშვილმა ჰოლდინგის სამომავლო გეგმებზე ისაუბრა:
“ამჟამად ვიწყებთ რამდენიმე დიდ პროექტს. მათ შორის საქართველოში პირველ 3-დონიან სერტიფიცირებულ მონაცემთა ცენტრს 2 მეგავატის საწყისი სიმძლავრით ფრანგულ სატელეკომუნიკაციო გიგანტთან, ორანჟთან, პარტნიორობით, რაც არის მნიშვნელოვანი მიღწევა როგორც სილქნეტისთვის, ასევე ქვეყნისთვის. დავიწყეთ სილქ თაუერსის მშენებლობა ბათუმში, რომელიც უძრავი ქონების მასშტაბური პროექტია. საერთაშორისო და ადგილობრივი პარტნიორების კონსორციუმთან ერთად მნიშვნელოვნად ვაფართოვებთ ჩვენს ენერგეტიკულ ბიზნესს. ვიწყებთ 200 მეგავატის სიმძლავრის განახლებადი ენერგიის პროექტს, რომლის ანონსირებას აპრილში ვგეგმავთ.
საქართველოს განახლებადი ენერგეტიკის დიდი პოტენციალი აქვს, რაც სხვა სექტორების განვითარებისთვის მყარ საფუძველს ქმნის.
საქართველო ინვესტიციებისთვის მიმზიდველი ქვეყანაა, მსოფლიოში შექმნილი რთული სიტუაციის მიუხედავად. ახლა, როდესაც ეს კარი გავაღეთ, ვაგრძელებთ ჩვენი ბიზნესის ზრდას ძლიერი პარტნიორების, გამორჩეული გუნდისა და წარმატებასა და გრძელვადიან კეთილდღეობაზე ორიენტირებული ბიზნესგარემოს პირობებში.“
კონფერენციას დაესწრნენ საქართველოს მთავრობის, ეროვნული ბანკის, ბიზნესის სექტორის წარმომადგენლები, საერთაშორისო საინვესტიციო ბანკები, საერთაშორისო ინვესტორები და სხვა კაპიტალის ბაზრის მონაწილე ინსტიტუტები, მათ შორის J.P. Morgan, Citi, Morgan Stanley, ICBC Standard Bank, Oppenheimer, Ashmore, Aberdeen, Vontobel, MetLife Investment Management, EBRD, ADB, IFC, Fitch Ratings, S&P Global, Baker McKenzie, Latham & Watkins და სხვა.
დღის ტოპ 10 სიახლე
სხვა სიახლეები
არქი მსოფლიო რეკორდების სიმაღლეზეა - Archi Grand Avenue-ში მხოლოდ 5 საათში 1202 ბინა გაიყიდა!
24.10.2026.21:32
განსაკუთრებით მაღალი მოთხოვნის გათვალისწინებით, დამატებით კიდევ 156 მომხმარებელი მომდევნო ბლოკის მომლოდინეთა სიას შეუერთდა.
ამ ისტორიული შედეგით, არქი ევროპის, ცენტრალური აზიისა და ახლო აღმოსავლეთის რეგიონის სამეულშია ერთ დღეში გაყიდული ბინების რაოდენობით, არქის მხოლოდ ორი საერთაშორისო გიგანტი უსწრებს: საუდის არაბეთის NHC - 3 980 გაყიდული ბინით (2024 წლის, 15 ნოემბერი) და დუბაის DAMAC - 3 164 გაყიდული ბინით (2024 წლის 10 დეკემბერი).
„დღევანდელი შედეგი ჩვენთვის მხოლოდ რეკორდული გაყიდვები არ არის. ეს არის ნდობა, რომელიც ათასობით ადამიანმა გამოგვიცხადა და რისთვისაც თითოეულ მათგანს გულწრფელ მადლობას ვუხდით. ამ შედეგის უკან ჩვენი გუნდის უდიდესი შრომა დგას. „არქი“ საქართველოში №1 დეველოპერული კომპანიაა, თუმცა ჩვენთვის მთავარი მხოლოდ ლიდერობა არ არის. მნიშვნელოვანია, რომ ადამიანებს შევთავაზოთ რეალური ღირებულება და გავამართლოთ მათი მოლოდინები. Archi Grand Avenue-ში სწორედ ასეთ გარემოს ვქმნით - ქალაქის ახალ ცენტრს, რომელსაც განვითარების უდიდესი პოტენციალი აქვს. ვფიქრობ, მომხმარებლებმაც სწორედ ეს დაინახეს: პერსპექტიული ლოკაცია, პროექტის მასშტაბი, საერთაშორისო ბრენდების ჩართულობა და განსაკუთრებული ფინანსური პირობები. ამ ყველაფერმა ერთად მოგვცა შედეგი, რომლითაც დღეს ძალიან ვამაყობთ“, - აცხადებს „არქის“ გენერალური დირექტორი შიო ხეცურიანი.
დღევანდელი შედეგით „არქიმ“ გასულ წელს დაფიქსირებული საკუთარი რეკორდი ორჯერ მეტად გააუმჯობესა და ბაზარზე ახალი სტანდარტი დააწესა.
აღსანიშნავია, რომ გასულ წელთან შედარებით, პროექტში ბინების ფასი 27–28%-ით გაიზარდა. პერსპექტიული ლოკაცია და განვითარების მასშტაბი პროექტს მიმზიდველს ხდის როგორც საცხოვრებლად, ისე საინვესტიციოდ. განსაკუთრებული ინტერესი ადგილობრივმა მყიდველებმა, ქართველმა ემიგრანტებმა და საერთაშორისო ინვესტორებმა გამოიჩინეს.
Archi Grand Avenue 21 ჰექტარზე ვითარდება, საიდანაც 15 ჰექტარზე მეტი გამწვანებულ და რეკრეაციულ სივრცეებს დაეთმობა. პროექტი აერთიანებს საცხოვრებელ შენობებს, Hilton-ის ხუთვარსკვლავიან სასტუმროს, Wyndham-ის ბრენდირებულ რეზიდენციებს, სპორტულ კომპლექსს, გასტრონომიულ და კომერციულ სივრცეებს.
„მადლობა თითოეულ მომხმარებელს განსაკუთრებული ნდობისთვის. ეს ჩვენთვის დიდი პასუხისმგებლობაა და ყველაფერს გავაკეთებთ, რომ მათი მოლოდინები არა მხოლოდ გავამართლოთ, არამედ გადავაჭარბოთ კიდეც. მათთვის, ვინც ამ ეტაპზე სასურველი ბინის შეძენა ვერ შეძლო, დამატებითი შესაძლებლობა შევქმენით. ჩვენი მიზანია, რაც შეიძლება მეტი ადამიანი გახდეს ქალაქის ახალი ცენტრის ნაწილი“, - აცხადებს „არქის“ დამფუძნებელი ილია წულაია.
