ქართულ ბაზარზე შემოსვლა ნამდვილად მნიშვნელოვანი გადაწყვეტილებაა “სტარბაქსის” ჯგუფისგან , - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას ეკონომიკისა და მდგრადი განვითარების მინისტრის მოადგილემ ირაკლი ნადარეიშვილმა განაცხადა. მისი განმარტებით, გადაწყვეტილების მიღების პროცესი საკმაოდ ხანგრძლივი იყო.

„ქართულ ბაზარზე შემოსვლა ნამდვილად მნიშვნელოვანი გადაწყვეტილებაა „სტარბაქსის“ ჯგუფის მხრიდან. ეს იყო საკმაოდ ხანგრძლივი პროცესი - როგორც მიმდინარე გლობალური ვითარების, ისე წლების განმავლობაში არსებული სხვადასხვა ხელისშემშლელი გარემოებების გათვალისწინებით. მიუხედავად ამისა, საბოლოოდ გადაწყვეტილება მიღებულია.

რა თქმა უნდა, ეს არ არის უბრალოდ კიდევ ერთი ადგილი ყავის დასალევად, ეს არის გლობალური ბრენდი, რომლის ქართულ ბაზარზე შემოსვლა კიდევ ერთ მნიშვნელოვან აღიარებასთანაა დაკავშირებული. ეს მიუთითებს იმაზე, რომ საქართველომ წლების განმავლობაში შეძლო ჩამოეყალიბებინა საკუთარი თავი, როგორც მიმზიდველი საინვესტიციო და ბიზნესის გაფართოების მიმართულება.

აღსანიშნავია, რომ ასეთი სტატუსი არ იქმნება ერთჯერადი გადაწყვეტილებებით, არც ერთი კონკრეტული კანონის მიღებით და არც ერთი რეგულაციით. ეს არის ხანგრძლივი, თანმიმდევრული პროცესის შედეგი, რომელმაც საბოლოოდ გაამყარა ქვეყნის პოზიცია საერთაშორისო ბიზნესის რუკაზე.

ამას, რა თქმა უნდა, ექნება„გადამდები ეფექტი“, როგორც ამ დარგში, ისე თავად ჰორეკა სექტორში დამატებითი ინვესტიციების მოზიდვის კუთხით.

კიდევ ერთი მასშტაბური გლობალური ბრენდის გამოჩენა საქართველოს რუკაზე მნიშვნელოვნად გააძლიერებს ქვეყნის მიმზიდველობას როგორც ინვესტორებისთვის, ისე ტურისტებისთვის. შედეგად, ეს ხელს შეუწყობს როგორც ახალი ინვესტიციების შემოსვლას, ისე ქვეყნის პოზიციონირებას საერთაშორისო დონეზე, როგორც საინტერესო და პერსპექტიული მიმართულების “, - აღნიშნა ირაკლი ნადარეიშვილმა.