საქართველოს ბანკი - საქართველოს ეროვნული პარალიმპიური ნაკრების მთავარი სპონსორი 2019 წლიდან.

ანა ჯაფარიძე მხოლოდ 21 წლისაა, თუმცა მისი სახელი უკვე მსოფლიოს საუკეთესო პარატაეკვონდოისტებს შორის ჟღერს. პარიზის ზაფხულის პარალიმპიურ თამაშებზე ის საქართველოს დელეგაციის ყველაზე ახალგაზრდა წევრი იყო და სამშობლოში ბრინჯაოს მედლით დაბრუნდა.

ეს გზა მანამდე დაიწყო. 2023 წელს, როტერდამში გამართულ ევროპის პარა ჩემპიონატზე, ანამ (-52 კგ) მესამე ადგილი დაიკავა. 2024 წელს კი ორი საერთაშორისო ტურნირი მოიგო: სოფიაში გამართული საერთაშორისო სალიცენზიო ტურნირი და სამხრეთ კორეაში, ჩუნჩეონში ჩატარებული მსოფლიო ღია ჩელენჯი.

შემდეგი დიდი ნაბიჯი პარიზის გრანპრი იყო. ამ გამარჯვებით ანამ მონღოლ მეტოქეს, სურენიავ ულამბაიარს გადაასწრო და მსოფლიო რეიტინგის პირველი ნომერი გახდა.

ეს იყო მომენტი, როდესაც ახალგაზრდა ქართველი სპორტსმენი მსოფლიოს საუკეთესო პარატაეკვონდოისტთა სათავეში აღმოჩნდა. მის წინ ახალი გამოწვევაა: სამხრეთ კორეაში, 20-22 ნოემბერს, დაგეგმილი მსოფლიო ჩემპიონატი.

მაგრამ რამდენად ხშირად ვსაუბრობთ ამ მიღწევებზე?

პარასპორტსმენების ისტორიებს ხშირად მხოლოდ მაშინ ვიხსენებთ, როდესაც ისინი მედალს იგებენ. თუმცა მათი მიღწევები და შესაძლებლობები ხშირად ყურადღების მიღმა რჩება. შედეგად, პარალიმპიელი ჩემპიონები, რომლებიც საერთაშორისო ასპარეზზე საქართველოს სახელით იბრძვიან, იშვიათად ხდებიან იმ ბრენდებისა და კამპანიების ნაწილი, რომლებიც მათ ცნობადობას მეტად გაზრდიდა.

სწორედ ამიტომ საქართველოს ბანკი, როგორც პარალიმპიური ნაკრების მთავარი სპონსორი, მიზნად ისახავს პარალიმპიელი ჩემპიონებისა და მათი მიღწევების შესახებ ცნობადობის ამაღლებას და ამ პროცესში ბრენდების ჩართვას. კამპანიის მიზანია, რომ პარასპორტსმენებმა მიიღონ ის ყურადღება, რომელსაც იმსახურებენ. ასე გაჩნდა კამპანიის მთავარი კითხვა: „რომელი ბრენდი იმსახურებს ჩემპიონს?“

კამპანიის ფარგლებში შეიქმნა პარალიმპიელების ფოტოსერია. ფოტოები ცნობილი სარეკლამო კამპანიების ესთეტიკით არის გადაღებული, თუმცა თითოეულ მათგანში პროდუქტისა და ბრენდისთვის განკუთვნილი ადგილი თავისუფალია. მის ადგილას მთავარი კითხვა ჩნდება: „რომელი ბრენდი იმსახურებს ჩემპიონს?“

კითხვა ბრენდებისთვის გამოწვევად იქცევა: შეავსონ ცარიელი ადგილი და დაიწყონ ქართველ პარალიმპიელ ჩემპიონებთან პარტნიორობა.

ჩემპიონები მზად არიან.

ახლა ბრენდების ჯერია.