კახეთში მდებარე Zuzumbo Resort & Spa მიმდინარე ტურისტულ სეზონს აქტიურად ხვდება. როგორც Business Insider Georgia-სთან სასტუმროს გენერალურმა მენეჯერმა ლიკა პარწიკანაშვილმა განაცხადა, მოთხოვნა სტაბილურად ნარჩუნდება, ხოლო ვიზიტორთა უმრავლესობას ადგილობრივი დამსვენებლები წარმოადგენენ. მისივე თქმით, სასტუმრომ მიმდინარე სეზონისთვის ინფრასტრუქტურა განაახლა და სტუმრებს ახალი სერვისებიც შესთავაზა.

როგორია კომპანიის მიმდინარე სიახლეები?

მიმდინარე სეზონისთვის სასტუმროს ნომრებს რეაბილიტაცია ჩავუტარეთ და ინფრასტრუქტურა განვაახლეთ. მათ შორისაა ახალი სპორტული სტადიონი და ღია ცის ქვეშ მოწყობილი სატრენაჟორო სივრცე, რომელიც მალე დაგვემატება. პარალელურად, ვაფართოებთ სარესტორნო მომსახურებას და სტუმრებს ტყის გარემოში დამატებით გასტრონომიულ სივრცეებს ვთავაზობთ.

როგორც მოგეხსენებათ, სარესტორნო მიმართულებით რამდენიმე განსხვავებული სივრცე გვაქვს და ჯამურად 300-მდე სტუმრის მიღება შეგვიძლია. რაც შეეხება კონკრეტულად ერთ ლოკაციას, ყველაზე დიდი სივრცე მაქსიმუმ 180 ადამიანზეა გათვლილი.

როგორ აფასებთ მოთხოვნას მიმდინარე სეზონზე?

ჩვენი სასტუმრო რეზორტული ტიპისაა და ვიზიტორთა შორის ადგილობრივი დამსვენებლები ჭარბობენ. ვფიქრობ, ეს ტენდენცია მხოლოდ ჩვენს ობიექტს არ ეხება და ზოგადად საქართველოს ტურიზმის სექტორში ადგილობრივი ვიზიტორების წილი კვლავ მაღალია.

კორპორატიული ღონისძიებების მიმართულებით მოთხოვნა წინა წლებთან შედარებით გარკვეულწილად შემცირებულია. დღეს კომპანიები უფრო მცირე ზომის სასტუმროებს ანიჭებენ უპირატესობას, სადაც შესაძლებელია მთელი სივრცის ექსკლუზიურად დაჯავშნა. ჩვენ ერთდროულად 220-მდე სტუმრის განთავსება შეგვიძლია, ამიტომ შედარებით მცირე ჯგუფებზე გათვლილი კორპორატიული შეკვეთების რაოდენობა ნაკლებია. მიუხედავად ამისა, მოთხოვნა სტაბილურად არის შენარჩუნებული.

ამასთან, მნიშვნელოვნად არის გაზრდილი ინდივიდუალური სტუმრების რაოდენობა. ჩვენი ძირითადი დატვირთვა სწორედ ამ სეგმენტზე მოდის. რეკრეაციული გარემო და ბუნებასთან სიახლოვე ჩვენს ობიექტს განსაკუთრებით მიმზიდველს ხდის ოჯახური დასვენებისთვის. სწორედ ამიტომ, აქტიურად გვსტუმრობენ ოჯახები, მეგობრები და წყვილები.

როგორია Zuzumbo Resort & Spa -ს სამომავლო გეგმები?

ჩვენი მთავარი აქცენტი არსებული სერვისების გაუმჯობესებასა და სტუმრებისთვის კიდევ უფრო კომფორტული გარემოს შექმნაზეა გაკეთებული. მიმდინარე წლის ძირითადი საინვესტიციო პროექტები სწორედ ინფრასტრუქტურის განვითარებასა და მომსახურების ხარისხის გაუმჯობესებას უკავშირდება.

Zuzumbo Resort & Spa კახეთში, თელავის ისტორიულ უბან ზუზუმბოზე მდებარეობს. 6 ჰექტარ ფიჭვნარში გაშენებული კომპლექსი დედაქალაქიდან მხოლოდ საათ-ნახევრის სავალზეა და სტუმრებს კავკასიონის, ცივ-გომბორის, ალაზნის ველისა და თელავის შთამბეჭდავი პანორამული ხედებს სთავაზობს ბუნების გარემოცვაში.