კახეთში, ახმეტის მუნიციპალიტეტის სოფელ ზემო ხოდაშენში, თელავიდან დაახლოებით 10 წუთის სავალზე, თელავის საცხენოსნო ცენტრი ფუნქციონირებს - სივრცე, რომელიც საცხენოსნო ტურიზმს, ქართულ საცხენოსნო ტრადიციებს, შემეცნებით გამოცდილებებსა და ცხენთან ურთიერთობაზე დაფუძნებულ მრავალფეროვან პროგრამებს აერთიანებს.

ცენტრი ბიოლოგიურ მეურნეობათა ასოციაცია „ელკანას“ სადემონსტრაციო ფერმის ბაზაზე შეიქმნა, სადაც ტრადიციული თუშური ცხენების დაცვა და მოშენება მიმდინარეობს. შესაბამისად, ცენტრის სტუმრებისთვის გამოცდილება მხოლოდ ცხენით გასეირნებით არ შემოიფარგლება - მათ შესაძლებლობა აქვთ, გაეცნონ ქართულ საცხენოსნო ტრადიციებს, ადგილობრივ ბუნებასა და სოფლის გარემოს.

თელავის საცხენოსნო ცენტრი სხვადასხვა სირთულისა და ხანგრძლივობის საცხენოსნო ტურებს სთავაზობს როგორც დამწყებ, ისე გამოცდილ მხედრებს. ტურები კახეთის განსხვავებულ და სანახაობრივ მარშრუტებს მოიცავს და სტუმრებს რეგიონის ბუნებისა და ლანდშაფტების განსხვავებული გზით აღმოჩენის შესაძლებლობას აძლევს.

ცენტრის შეთავაზებებს შორისაა ასევე ადგილზე საცხენოსნო გაკვეთილები, რომლებიც ცხენთან ურთიერთობის, მისი მართვისა და ცხენოსნობის პრაქტიკული უნარების შესწავლას ითვალისწინებს. გარდა ამისა, ცენტრი ტურისტულ საცხენოსნო გამოცდილებებს, კომპანიებისთვის Team Building პროგრამებსა და სასკოლო და შემეცნებით ექსკურსიებს აერთიანებს.

სასკოლო პროგრამების ფარგლებში მოსწავლეებს შესაძლებლობა აქვთ, გაეცნონ ცხენს, მის მოვლას, ტრადიციულ ქართულ ჯიშებსა და ფერმის ყოველდღიურ ცხოვრებას. ცენტრში ასევე ტარდება ჰიპოთერაპიის სესიები სპეციალური საჭიროებების მქონე ბავშვებისთვის, მათ შორის აუტიზმის სპექტრის მქონე ბავშვებისთვის, ცხენთან ურთიერთობაზე დაფუძნებული სპეციალური პროგრამების ფარგლებში.

ცენტრი კახეთის ტურისტული პოტენციალის კიდევ უფრო აძლიერებს. თელავიდან რამდენიმე წუთის სავალზე მდებარე სივრცე ფაქტობრივად აკავშირებს თელავისა და ახმეტის ტურისტულ მიმართულებებს და რეგიონში ჩამოსულ სტუმრებს ღვინის, გასტრონომიულ და კულტურულ გამოცდილებებთან ერთად საცხენოსნო ტურიზმის აღმოჩენის შესაძლებლობას სთავაზობს.

თელავის საცხენოსნო ცენტრი თანამშრომლობისთვის ღიაა ტურისტულ კომპანიებთან, სასტუმროებთან, სკოლებსა და სხვა საგანმანათლებლო დაწესებულებებთან, კერძო და საერთაშორისო ორგანიზაციებთან, კომპანიებსა და მედიასთან.

ცენტრის მიზანია კახეთში საცხენოსნო ტურიზმის განვითარება და ამ მიმართულების კიდევ უფრო პოპულარიზაცია, ამასთან, ქართული საცხენოსნო ტრადიციების, თუშური ცხენისა და რეგიონის სოფლის ტურისტული შესაძლებლობების წარმოჩენა.