„ფაფანაკი“ ქართული ბრენდია, რომელიც ეროვნულ ტრადიციებზე შთაგონებულ სამოსსა და აქსესუარებს ქმნის. კომპანიამ შოურუმი და საწარმო ერთ სივრცეში გააერთიანა. ამის შესახებ, Business Insider Georgia-ს ბრენდის დამფუძნებელმა ნინო ჭყონიამ განუცხადა.

„გადავწყვიტეთ, შოურუმი და საწარმო ერთ სივრცეში გაგვეერთიანებინა, რადგან სხვადასხვა ლოკაციაზე მუშაობა ყოველდღიურ პროცესებს ართულებდა. „ფაფანაკისთვის“ ეს განვითარების ძალიან მნიშვნელოვანი ეტაპია.

გადავედით დიდუბეში, სადაც სივრცე ორ ნაწილად გავყავით - ერთი ნაწილი შოურუმს დავუთმეთ, მეორე კი საწარმოს. შედეგად, ჩვენი სამუშაო პროცესი უფრო ეფექტიანი გახდა, ხოლო მომხმარებლისთვის სასურველი პროდუქციის შერჩევა, შეკვეთა და შეძენა გაცილებით კომფორტული.

ამასთან, სექტემბრიდან City Mall-შიც ვიქნებით წარმოდგენილი სტენდით, რაც ჩვენთვის განვითარების კიდევ ერთი მნიშვნელოვანი ნაბიჯია.

ბოლო ერთი თვე ჩვენი კომპანიისთვის მნიშვნელოვანი გარდატეხის პერიოდი იყო. ბევრი სიახლე დავგეგმეთ, გუნდი ახალი პოზიციების თანამშრომლებით გავაძლიერეთ და ახლა აქტიურად ვმუშაობთ განვითარების სხვადასხვა მიმართულებაზე. ვამზადებთ ახალ კოლექციას, ვგეგმავთ ფოტოსესიას, ვანახლებთ ვებგვერდს და ვაძლიერებთ ონლაინ მიმართულებას.

ერთ-ერთი მნიშვნელოვანი სიახლე ისიც არის, რომ თუ აქამდე Amazon-ზე მხოლოდ ჩვენი აქსესუარები იყო წარმოდგენილი, ახლა უკვე სამოსის კოლექციასაც ვამზადებთ, რომელსაც პლატფორმაზე განვათავსებთ.

გვაქვს ძალიან ამბიციური გეგმები და ვფიქრობ, სექტემბრიდან ეს ცვლილებები ჩვენი მომხმარებლისთვისაც უფრო თვალსაჩინო გახდება“, - აცხადებს ნინო ჭყონია.

ინფორმაციისთვის, „ფაფანაკის“ ახალი შოურუმი და საწარმო მდებარეობს მისამართზე: თბილისი, დიდუბე, სპირიდონ კედიას ქ. N10დ.