„ცუგრუმელა“ ქსელს აფართოებს და ახალი კონცეფციის ფილიალის გახსნას გეგმავს
გრუმინგ სალონი „ცუგრუმელა“ აქტიურად განაგრძობს განვითარებას - კომპანიამ ლოკაცია შეიცვალა, ახალი ფილიალი გახსნა და ამ ეტაპზე კიდევ ერთი სივრცის გახსნაზე მუშაობს. პარალელურად, სალონში განაახლეს გუნდი, პროფესიონალი გრუმერები დაიმატეს და სამომავლოდ მასტერკლასებისა და საგანმანათლებლო პროექტების განხორციელებასაც გეგმავენ. ამის შესახებ Business Insider Georgia-ს „ცუგრუმელას“ დამფუძნებელმა, მერი ლორთქიფანიძემ განუცხადა.
„ბოლო პერიოდში მნიშვნელოვანი ცვლილებები განვახორციელეთ. სრულად განვაახლეთ გუნდი და დავიმატეთ ბევრად უფრო მაღალი კვალიფიკაციის გრუმერები, რამაც მომსახურების ხარისხის კიდევ უფრო გაუმჯობესების შესაძლებლობა მოგვცა.
ამასთან, შევიცვალეთ ლოკაციებიც და მომხმარებლებისთვის უკეთესი პირობები შევქმენით. გადავედით ცინცაძის ქუჩაზე, სადაც ვთანამშრომლობთ ვეტერინარულ კლინიკა „აიბოსთან“.
ახლახან ახალი ფილიალიც გავხსენით, რომელიც სპეციალურად დიდი ზომის ძაღლებისთვის არის აღჭურვილი და მხოლოდ ამ სეგმენტს ემსახურება.
ამ ეტაპზე კიდევ ერთ მნიშვნელოვან პროექტზე ვმუშაობთ - მიმდინარეობს სარემონტო სამუშაოები ბაზარი ორბელიანის შენობაში, სადაც სრულიად განსხვავებული კონცეფციის, თანამედროვე ფილიალს ვხსნით“, - აღნიშნავს მერი ლორთქიფანიძე.
კომპანიამ გუნდი გააფართოვა და ახალი კადრებით დააკომპლექტა.
„ჩვენს სფეროში პროფესიონალი კადრების დეფიციტია, თუმცა უნდა აღნინიშნოს, რომ თითქმის ყველა მაღალი დონის გრუმერი, ჩვენს გუნდს შეუერთდა. რაც უფრო ძლიერი პროფესიონალები გყავს, მით უფრო იზრდება მომხმარებელთა რაოდენობა, ფინანსური შესაძლებლობები და შესაბამისად, ბიზნესის განვითარების ტემპიც.
განსაკუთრებულად მინდა აღვნიშნო ჩვენი დირექტორი, თორნიკე მიდელაშვილი, რომელიც თბილისის ერთ-ერთი საუკეთესო გრუმერია. „ცუგრუმელას“ დღევანდელ წარმატებაში მისი წვლილი ძალიან დიდია - სწორედ მან შეკრიბა ძლიერი პროფესიონალების გუნდი და მნიშვნელოვანი როლი ითამაშა კომპანიის განვითარებაში.
პარალელურად, მოლაპარაკებებს ვაწარმოებთ სხვადასხვა ქვეყანაში მოღვაწე ცნობილ გრუმერებთან. ახალი ფილიალის გახსნის შემდეგ ვგეგმავთ მასტერკლასების, სემინარებისა და ვორქშოფების ორგანიზებას. აქტიურად მუშაობს ჩვენი აკადემიაც, სადაც უკვე გვყავს მოსწავლეები და ახალი სპეციალისტების მომზადებას ვაგრძელებთ.
ზოგადად, ეს სფერო ძალიან სწრაფად ვითარდება. შინაური ცხოველების მოვლის კულტურა საქართველოში მნიშვნელოვნად გაიზარდა, რაც მომხმარებელთა რაოდენობის მუდმივ ზრდაზეც აისახება“, - აღნიშნავს კომპანიის დამფუძნებელი.
ოპერირებს და საკუთარ მომხმარებელს მეგობარი ცხოველებისთვის სხვადასხვა სერვისს სთავაზობს.
დღის ტოპ 10 სიახლე
სხვა სიახლეები
საქართველოს ბანკმა 100-მდე საერთაშორისო ინვესტორსა და ანალიტიკოსს Investor Day-ზე უმასპინძლა
30.06.2026.17:07
Lion Finance Group -მა ყოველწლიური Investor Day გამართა, რომელსაც 100-მდე საერთაშორისო ინვესტორი და ანალიტიკოსი დაესწრო. ღონისძიების ფარგლებში ჯგუფის მენეჯმენტმა, საქართველოს ბანკისა და Ameriabank-ის გუნდის წევრებთან ერთად, სტუმრებს ჯგუფის სტრატეგიული მიმართულებები, ფინანსური შედეგები და ხედვები გააცნო.
Investor Day-ს ესწრებოდნენ ისეთი წამყვანი საერთაშორისო საინვესტიციო კომპანიებისა და ფინანსური ინსტიტუტების წარმომადგენლები, როგორებიც არიან Firebird, M&G Investments, Morgan Stanley, , JPMorgan Chase და სხვები.
შეხვედრაზე განსაკუთრებული ყურადღება დაეთმო საქართველოს მაკროეკონომიკურ გარემოს, ქვეყნის ეკონომიკური განვითარების პერსპექტივებსა და იმ სტრატეგიულ გადაწყვეტილებებს, რომლებმაც საქართველოს ბანკის და მთლიანად Lion Finance Group-ის მდგრად ზრდას შეუწყო ხელი. ასევე, განხილული იყო ციფრული ბანკინგისა და ტექნოლოგიების მიმართულებით განხორციელებული მნიშვნელოვანი ნაბიჯები, რომელთა შედეგადაც საქართველოს ბანკმა Global Finance-ისგან ზედიზედ ორჯერ მსოფლიოს საუკეთესო ციფრული ბანკის ჯილდო მოიპოვა.
Investor Day-ის ერთ-ერთი თემა ასევე იყო Lion Finance Group-ის FTSE 100 ინდექსში გაწევრიანება. საქართველოს ბანკი პირველი კომპანიაა საქართველოდან, რომელმაც ლონდონის საფონდო ბირჟის FTSE 100 ინდექსში დაიკავა ადგილი. დღეს ჯგუფი ისეთ საერთაშორისო კომპანიებთან ერთადაა წარმოდგენილი, როგორებიც არიან HSBC, BP, Unilever, Rolls-Royce Holdings, Shell და Barclays.
„Investor Day მნიშვნელოვანი შესაძლებლობაა, საერთაშორისო ინვესტორებს გავუზიაროთ ჩვენი სტრატეგიული ხედვა, ფინანსური შედეგები და განვითარების გეგმები. განსაკუთრებით საამაყოა, რომ წელს Lion Finance Group FTSE 100 ინდექსის წევრი გახდა. ეს ჩვენი გუნდის მრავალწლიანი, თანმიმდევრული მუშაობისა და სტრატეგიის შედეგია. რაც მთავარია, ვაგრძელებთ ინვესტირებას ტექნოლოგიებში, ინოვაციებსა და მომხმარებლის გამოცდილების გაუმჯობესებაში, რათა შევქმნათ გრძელვადიანი ღირებულება ჩვენი მომხმარებლებისა და ინვესტორებისთვის”, - განაცხადა საქართველოს ბანკის გენერალურმა დირექტორმა, არჩილ გაჩეჩილაძემ.
Investor Day წარმოადგენს Lion Finance Group-ისა და მისი შვილობილი კომპანიების საერთაშორისო საინვესტიციო საზოგადოებასთან კომუნიკაციის ერთ-ერთ უმნიშვნელოვანეს პლატფორმას, რომელიც ინვესტორებს ჯგუფის სტრატეგიის, ფინანსური შედეგებისა და გრძელვადიანი ხედვების შესახებ ამომწურავ ინფორმაციას აწვდის.
