თუ ადამიანში მებრძოლი ხასიათი, ცნობისმოყვარეობა და შრომისმოყვარეობა ჩამოყალიბდა, ის ნებისმიერ სფეროში მიაღწევს წარმატებას - ალექსანდრე ჯეჯელავა
კონკურენტულ შრომის ბაზარზე წარმატების მთავარი საფუძველი უკვე არა მხოლოდ პროფესიული ცოდნა, არამედ ისეთი პიროვნული უნარებია, როგორიცაა ცნობისმოყვარეობა, მებრძოლი ხასიათი და სწავლის სწრაფად ათვისების უნარი. - ამის შესახებ ტელეკომპანია „მაესტროს“ ეთერში, გადაცემა Business Insider Georgia-ში, სტუმრობისას კომპანია „ფლომასტერის“ დამფუძნებელმა ალექსანდრე ჯეჯელავამ განაცხადა. მისი თქმით, დღეს, როდესაც ხელოვნური ინტელექტი და ონლაინ კურსები ცოდნის მიღებას მარტივს ხდის, გადამწყვეტი ხდება ადამიანის ხასიათი და სწავლისადმი მიდგომა, მაშინ როცა საგანმანათლებლო სისტემა ჯერ კიდევ ტრადიციულ, საზეპირო და ფორმალურ სწავლების მოდელზეა დაფუძნებული.
„დღეს ამბობენ, დაიქირავეთ ადამიანი ხასიათის მიხედვით, დაიქირავეთ მებრძოლი, ცნობისმოყვარე ადამიანი და ის ყველაფერს ისწავლის. აგერ არის ხელოვნური ინტელექტი, აგერაა ონლაინ კურსები - ყველაფერი ხელმისაწვდომია. ამის მიუხედავად, ჩვენი საგანმანათლებლო სისტემა ხშირ შემთხვევაში მაინც ძველ რელსებზე დგას. ორიენტირებულია იმაზე, რომ კონკრეტული საგანი ისწავლო, პარასკევისთვის მეხუთე თავი მოამზადო, ნახევრად ზეპირად ჩააბარო და ამით შემოიფარგლო. მთავარი მაინც საკუთარი ადგილისა და როლის გამორკვევაა. მე წლების განმავლობაში ვასწავლიდი გრენობლის ბიზნესსკოლაში. ერთ-ერთ წელს დეკანატს მივწერე, რომ სასწავლო პროცესში ხელოვნური ინტელექტის გამოყენებას ვაპირებდი. იქიდან პასუხი მოვიდა, არავითარ შემთხვევაში, ეს მკაცრად აკრძალულიაო. მე ვუპასუხე, რომ აკრძალვას აზრი არ ჰქონდა, რადგან მაინც გამოიყენებდნენ. და რა მოხდა? ზუსტად მომდევნო წელს, ყველა ლექტორმა მიიღო ახალი ინსტრუქცია, მაქსიმალურად გამოიყენეთ ხელოვნური ინტელექტიო.
ეს არის ძალიან ვიწრო, გარდამავალი ტერიტორია, სადაც დროულად უნდა მიხვდე, რა არის გასაკეთებელი. ასეთ დროს კი ხასიათი და სიმტკიცე ხდება მთავარი. ჩვენ გვჭირდება მებრძოლი ადამიანი - ის, ვისაც აქვს კონკრეტული გეგმა და ხედვა. ადამიანი, რომელიც თავის ყოველდღიურ, ჩვეულებრივ ცხოვრებაში შეიძლება სტუდენტი იყოს, მაგრამ ფლობს უნარს, საჭირო მომენტში სრულად მოახდინოს საკუთარი თავისა და რესურსების მობილიზება.
თანაც, უნარების სწავლება ისეთი ადვილი გახდა, როგორიც არასდროს ყოფილა. ხელოვნური ინტელექტის დახმარებით დღეს ეკონომიკურ რეალობას თუ პროგრამირების ინსტრუმენტებს ისე ეფექტიანად აუხსნი ადამიანს, როგორც სხვაგვარად ვერასოდეს აუხსნიდი. თუმცა, ხასიათი და სიმტკიცე პირიქით - გაცილებით მეტი გვჭირდება. რაც უფრო მეტი ალტერნატივაა ირგვლივ, მით უფრო მეტი სიმტკიცეა საჭირო, რომ შენი გზა იპოვო და ამ უამრავი არჩევანის დევნაში საკუთარი თავი არ დაკარგო.
თუ ადამიანში მებრძოლი ხასიათი, ცნობისმოყვარეობა და შრომისმოყვარეობა ჩამოყალიბდა, მერე დანარჩენი უკვე წმინდა წყლის ტექნიკის საკითხია - ის ნებისმიერ საგანს აუღებს ალღოს და ნებისმიერ სფეროში მიაღწევს წარმატებას“, - აღნიშნა ჯეჯელავამ.
სხვა სიახლეები
სილქნეტი "დაჭრილ მებრძოლთა თანადგომის ფონდის" საქმიანობის ანგარიშს აქვეყნებს
07.07.2026.17:05
სილქნეტის მიერ დაფუძნებული „დაჭრილ მებრძოლთა თანადგომის ფონდი“ აგრძელებს ვეტერანების და სამხედრო მოსამსახურეების მხარდაჭერას. იანვრიდან დღემდე ფონდმა 60-მდე ბენეფიციარს გაუწია დახმარება. მათ შორის იყო გადაუდებელი ოპერაციების დაფინანსება როგორც ადგილობრივ, ისე საზღვარგარეთ კლინიკებში, დაშავებული სამხედროების მედიკამენტებით უზრუნველყოფა, საცხოვრებელი ფართის ადაპტირება, პროფესიული გადამზადების კურსების ორგანიზება, ასევე ბენეფიციართა ოჯახის წევრთა საგანმანათლებლო თუ სხვა საჭიროებებისთვის თანხების გამოყოფა.
2026 წელს ფონდში შემოწირულობებმა 561 000 ლარი შეადგინა. აქედან ბოლო ექვს თვეში 280 000 ლარი მოხმარდა 58 ბენეფიციარს, რომელთა შორის 13 ვეტერანი და 45 სამხედრო მოსამსახურეა.
დახმარებები გაიცა შემდეგ კატეგორიებში:
1. გადაუდებელი ოპერაციები 64 677 ლარი
2. 50% თანადაფინანსება 106 160 ლარი
3. სამედიცინო მომსახურება 36 030 ლარი
4. მედიკამენტები 6 925 ლარი
5. შვილების დახმარება 31 314 ლარი
6. მეუღლეების დახმარება 21 677 ლარი
7. პროფესიული გადამზადება 11 821 ლარი
8. ადაპტაცია 987 ლარი
„დაჭრილ მებრძოლთა თანადგომის ფონდი“ 2018 წელს სილქნეტის ინიციატივით დაარსდა. კომპანია ფონდის მთავარი დონორი გახდა, რითაც მხარდაჭერა გამოუ-ცხადა საქართველოს ტერიტორიული მთლიანობისათვის ბრძოლებსა და საერთაშორისო სამშვიდობო მისიებში დაჭრილ დაშავებულ ვეტერანებსა და სამხედრო მოსამსახურეებს. ფონდის შემომწირველები ასევე გახდნენ ფიზიკური პირები, ადგილობრივი და საერთაშორისო ორგანიზაციები, ბიზნეს სექტორი.
“დაჭრილ მებრძოლთა თანადგომის ფონდი” იმ ქვეყნების წარმატებულ გამოცდილებას იზიარებს, სადაც მებრძოლთა და ვეტერანთა მხარდაჭერის პრაქტიკა არსებობს. ფონდის საქმიანობა გამჭვირვალეა. მისი ფინანსური და წლიური ანგარიშები ფონდის ვებ გვერდზეა განთავსებული.
დონაციის მსურველებისთვისშექმნილია საქველმოქმედო ნომერი 0 901 777 771 (1 ზარი-1 ლარი) და გახსნილია ანგარიშები, სადაც ნებისმიერი თანხით შესაძლებელია გმირი მებრძოლების თანადგომა. ვეტერანებისა და სამხედროების მხარდასაჭერად ტრადიციულად იმართება საქველმოქმედო გარბენი, რომელიც საზოგადოების ჩართულობას და ცნობიერების ამაღლებას უწყობს ხელს.
გავერთიანდეთ ჩვენი გმირებისთვის!