უნივერსიტეტი, ერთი მხრივ, არის სივრცე, სადაც აქცენტი უფრო აკადემიურ ცოდნაზე კეთდება. პროფესიული განათლება კი უფრო პრაქტიკულია და ორიენტირებულია იმაზე, რომ სტუდენტმა ოპტიმალურ დროში შეიძინოს კონკრეტული უნარები დასასაქმებლად, - აცხადებს  სქილვილ შვეიცარიული კოლეჯის დამფუძნებელი და თბილისის შვეიცარიული საერთაშორისო სკოლის სამეთვალყურეო საბჭოს წევრი გიორგი მარიამიძე, რომელიც ტელეკომპანია „მაესტროს“ ეთერში გადაცემა Business Insider Georgia-ს სტუმარი იყო.

გიორგი მარიამიძის შეფასებით, საკანონმდებლო ცვლილება, რომლის მიხედვითაც აბიტურიენტებს ერთიან ეროვნულ გამოცდებთან ერთად პროფესიული სასწავლებლების არჩევის შესაძლებლობაც მიეცათ, მნიშვნელოვნად წაახალისებს პროფესიული განათლების განვითარებას და კადრების ეფექტიან დასაქმებას შეუწყობს ხელს.

„საკანონმდებლო ნაწილში ზოგადი ტენდენცია და დინამიკა ცალსახად პოზიტიურია. განათლების მიმართულებით გამოვყოფდი ძალიან მნიშვნელოვან ცვლილებას. აბიტურიენტებს, რომლებიც ერთიან ეროვნულ გამოცდებს აბარებენ, უკვე აქვთ შესაძლებლობა, უნივერსიტეტებთან ერთად პროფესიული სასწავლებლებიც აირჩიონ. ეს ფაქტი ძალიან გვახარებს, რადგან ამ პროცესში უნივერსიტეტსა და კოლეჯს თავისი მკაფიო როლი აქვთ.

უნივერსიტეტი, ერთი მხრივ, არის სივრცე, სადაც აქცენტი უფრო აკადემიურ ცოდნაზე კეთდება. პროფესიული განათლება კი უფრო პრაქტიკულია და ორიენტირებულია იმაზე, რომ სტუდენტმა ოპტიმალურ დროში შეიძინოს კონკრეტული უნარები დასასაქმებლად. სამწუხაროდ, ამ ეტაპზე პროფესიული სასწავლებლების პრესტიჟი ჯერ კიდევ არ არის გათანაბრებული წამყვან უმაღლეს სასწავლებლებთან და ხშირად კოლეჯში სწავლა ნაკლებად პრესტიჟულად მიიჩნევა. ის ფაქტი, რომ საკანონმდებლო დონეზე ეს არჩევანი გათანაბრდა, ვფიქრობ, მნიშვნელოვნად წაახალისებს პროფესიული განათლების სექტორს და, საბოლოო ჯამში, ხელს შეუწყობს კადრების ეფექტიან დასაქმებას“, - აღნიშნა მარიამიძემ.