Georgia Capital-ის დირექტორთა საბჭომ დაამტკიცა მისი ქართული ჰოლდინგური კომპანიის JSC Georgia Capital-ის (JSC GCAP) 50 მილიონი აშშ დოლარის მოცულობის მდგრადობასთან დაკავშირებული ადგილობრივი ობლიგაციების ვადამდე სრულად გამოსყიდვა, GCAP-ის მიერ გათვალისწინებული ვადამდე გამოსყიდვის უფლების (call option) გამოყენებით.

გარიგების ანგარიშსწორება 2026 წლის აგვისტოს მეორე ნახევარშია მოსალოდნელი. მისი დასრულების შემდეგ GCAP სრულად დაფარავს ჰოლდინგური კომპანიის დონეზე არსებულ მთელ დარჩენილ სასესხო ვალდებულებას.

კომპანია ასევე აცხადებს, რომ მიმდინარე 50 მილიონი აშშ დოლარის მოცულობის აქციების გამოსყიდვისა და გაუქმების პროგრამა, რომლის ფარგლებშიც ამჟამად 10 მილიონი აშშ დოლარის რესურსია დარჩენილი, დამატებით 10 მილიონი აშშ დოლარით გაიზრდება. გაფართოებული პროგრამა დაუყოვნებლივ ამოქმედდება.

ამ ორი გადაწყვეტილების შედეგად GCAP 700 მილიონი ლარის კაპიტალის დაბრუნების პროგრამას დაგეგმილ ვადაზე მნიშვნელოვნად ადრე სრულად დაასრულებს. ეს კომპანიის ისტორიაში კაპიტალის დაბრუნების ერთ-ერთი ყველაზე მასშტაბური ინიციატივაა.

პროგრამის ფარგლებში განხორციელდება 150 მილიონი აშშ დოლარის ობლიგაციების გამოსყიდვა და 110 მილიონი აშშ დოლარის მოცულობის აქციების გამოსყიდვა და გაუქმება.

კაპიტალის დაბრუნების პროგრამა თავდაპირველად 2025 წლის აგვისტოში გამოცხადდა და მისი დასრულება 2027 წლის ბოლომდე იყო დაგეგმილი.

„მოხარული ვარ, რომ GCAP კიდევ ერთხელ ადასტურებს კაპიტალის განაწილებისადმი თავის დისციპლინირებულ მიდგომას. კიდევ უფრო გაძლიერებული ბალანსის პირობებში, ჩვენ მტკიცედ ვაგრძელებთ სტრატეგიული პრიორიტეტების განხორციელებას და ჩვენი აქციონერებისთვის მდგრადი, გრძელვადიანი ღირებულების შექმნას.

განსაკუთრებით სასიხარულოა, რომ ბოლო პერიოდში მიღწეულმა პროგრესმა შესაძლებლობა მოგვცა, 700 მილიონი ლარის კაპიტალის დაბრუნების პროგრამა დაგეგმილ ვადაზე წელიწად-ნახევრით ადრე დავასრულოთ.

პროგრამის დასრულების შემდეგ და მომდევნო რამდენიმე წლის განმავლობაში თავისუფალი ფულადი ნაკადების ძლიერი გენერირების მოლოდინის გათვალისწინებით, დირექტორთა საბჭო განიხილავს კაპიტალის მართვის განახლებულ პროგრამას, რომელიც მოიცავს როგორც ბიზნესში ინვესტიციებს, ისე მომავალში კაპიტალის დაბრუნების მნიშვნელოვან ინიციატივებს.

ამასთან დაკავშირებით დამატებითი ინფორმაცია ჯგუფის 2026 წლის აგვისტოში გამოსაქვეყნებელ ნახევარწლიურ ფინანსურ შედეგებთან ერთად გახდება ცნობილი“, - განაცხადა GCAP-ის დირექტორთა საბჭოს თავმჯდომარემ და აღმასრულებელმა დირექტორმა, ირაკლი გილაურმა, განაცხადა.