სქილვილ შვეიცარიული კოლეჯის დამფუძნებლისა და თბილისის შვეიცარიული საერთაშორისო სკოლის სამეთვალყურეო საბჭოს წევრის გიორგი მარიამიძის შეფასებით, ICT სექტორის განვითარება პირველ რიგში მთავრობის მიერ გატარებული პოლიტიკის შედეგია, რომელმაც სექტორის წახალისებას შეუწყო ხელი მათ შორის სპეციალური საგადასახადო რეჟიმებით საერთაშორისო კომპანიებისთვის და ინოვაციების მიმართულებით GITA-ს საქმიანობით. როგორც გიორგი მარიამიძემ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა, ამ ფაქტორების ერთობლიობამ განაპირობა, რომ ICT სექტორმა ეკონომიკაში მნიშვნელოვანი როლი დაიკავა და საქართველოში მსოფლიო დონის ტექნოლოგიურმა კომპანიებმა ოფისების გახსნა დაიწყეს.

„ვფიქრობ მიმდინარე შედეგი, პირველ რიგში, მთავრობის სწორი პოლიტიკის დამსახურებაა, რამაც ხელი შეუწყო სექტორის წახალისებას. განსაკუთრებით მნიშვნელოვანია სპეციალური საგადასახადო პირობები საერთაშორისო სტატუსის მქონე იმ კომპანიებისთვის, რომლებიც ექსპორტზე მუშაობენ და ქვეყანაში IT სერვისებიდან მიღებული შემოსავლები შემოაქვთ. ასევე, აღსანიშნავია GITA-ს მუშაობა ინოვაციების მიმართულებით. ამ ფაქტორების ერთობლიობამ განაპირობა ის, რომ ICT სექტორმა ეკონომიკაში მნიშვნელოვანი როლი დაიკავა. საქართველოში შემოვიდნენ მსოფლიო დონის წამყვანი კომპანიები, რომლებსაც გლობალურად ათიათასობით თანამშრომელი ჰყავთ. მათ ოფისების გახსნა ჩვენს ქვეყანაში დაიწყეს, რაც ძალიან სერიოზული პროგრესია“, ამბობს მარიამიძე.

მისივე განმარტებით, განვითარების პოტენციალი ICT სექტორში კვლავ მაღალია და ამ მხრივ არსებობს ირლანდიის მაგალითი, სადაც დროთა განმავლობაში თითქმის ყველა წამყვანი ტექნოლოგიური კომპანია: Google, Microsoft, Meta და IBM არის წარმოდგენილი, მაშინ როცა საქართველოში მსგავსი მასშტაბის გლობალური მოთამაშეები ჯერ არ ოპერირებენ, რაც ზრდის მნიშვნელოვან შესაძლებლობაზე მიუთითებს.

გიორგი მარიამიძის განცხადებით, საქართველოში მეტი საერთაშორისო ტექნოლოგიური კომპანიის მოსაზიდად აუცილებელია მაღალი ღირებულების ინდუსტრიებზე ფოკუსირება, განათლებაში მასშტაბური ინვესტიციების განხორციელება და რეგულაციებისა და საგადასახადო გარემოს კონკურენტუნარიანობის გაზრდა. 

„რა თქმა უნდა, აქ „ველოსიპედს ვერ გამოვიგონებთ“. ისევ ირლანდიის მაგალითს რომ დავუბრუნდეთ, სამი მთავარი საკითხია გადამწყვეტი: პირველი, უნდა მოხდეს ფოკუსირება მაღალი დამატებული ღირებულების მქონე ინდუსტრიაზე, რადგან IT ზოგადად ძალიან ფართო სფეროა და მასში კონკრეტული მიმართულებების შერჩევაა საჭირო.

მეორე, აუცილებელია განათლებაში მასშტაბური ინვესტიციების განხორციელება. როდესაც საერთაშორისო კომპანიები ქვეყანაში შემოდიან, მათთვის ერთ-ერთი გადამწყვეტი ფაქტორი ადგილობრივი შრომითი ბაზარია. მართალია, მათ ჩამოჰყავთ თავისი თანამშრომლები და შემოაქვთ საკუთარი ნოუჰაუ, მაგრამ განვითარებისთვის ადგილობრივი ტალანტები და უნარები მათთვის ნამდვილად საინტერესო და მნიშვნელოვანია.

მესამე ფაქტორი კი რეგულაციებისა და გადასახადების მიმართულებით მაღალკონკურენტული გარემოს შექმნაა. ვფიქრობ, ეს არის ის ძირითადი კომპონენტები, რომლებიც პროგრესს განაპირობებს. ჩვენ სწორი მიმართულებით მივდივართ და მჯერა, რომ წინ კიდევ უფრო მეტი წარმატება გველის“, - ამბობს  სქილვილ შვეიცარიული კოლეჯის დამფუძნებელი და თბილისის შვეიცარიული საერთაშორისო სკოლის სამეთვალყურეო საბჭოს წევრი.