Kairos Logistics-ის გენერალური დირექტორი მიხეილ ნამადოვი აცხადებს, რომ ჩრდილოეთის დერეფნის ალტერნატივად ყარსი–ახალქალაქის მიმართულება შესაძლოა ჩამოყალიბდეს და რეგიონში სერიოზული კონკურენცია შექმნას. მისი თქმით, ჩინეთი ამჟამად აქტიურად იყენებს ჩრდილოეთის მარშრუტს, რომელიც ლიტვასა და ბელარუსის გავლით დუისბურგამდე გადაზიდვებს მოიცავს, თუმცა ალტერნატიული მიმართულებები, მათ შორის საქართველოზე გამავალი რკინიგზა, სულ უფრო კონკურენტუნარიანი ხდება. ნამადოვის შეფასებით, რკინიგზით გადაზიდვების ღირებულება ხშირად ზღვით ტრანსპორტირების ფასებს უტოლდება, რაც, ენერგომატარებლების ფასების არასტაბილურობის ფონზე, ამ სექტორს დამატებით პერსპექტივას აძლევს.

„დღეს ჩინეთი აქტიურად იყენებს ჩრდილოეთის დერეფანს, რაც გულისხმობს ტვირთების რკინიგზით გადაზიდვას ბელარუსსა და ლიეტუვამდე, სადაც ხდება ვაგონების ბორბლების გამოცვლა, რის შემდეგაც ტვირთი მოძრაობას აგრძელებს. ძირითადი გამანაწილებელი ცენტრი გერმანიაში, კერძოდ, დუისბურგში მდებარეობს.

ამ მარშრუტის ერთ-ერთი უმნიშვნელოვანესი ალტერნატივა, რა თქმა უნდა, ბაქო-თბილისი-ყარსის (ახალქალაქის) მიმართულება იქნება, რომელიც საკმაოდ დიდ კონკურენციას გაუწევს არსებულ დერეფნებს, განსაკუთრებით სამხრეთ და აღმოსავლეთ ევროპის მიმართულებით. ვფიქრობ, ჩვენ შეგვიძლია ტვირთების ნაწილი ამ მარშრუტზე გადმოვრთოთ, სადაც მოცულობები საკმაოდ დიდია.

თუნდაც დღეს, მაგალითისთვის რომ ავიღოთ, ჩინეთიდან კონტეინერის საზღვაო ტრანსპორტით გადაზიდვის ღირებულება თითქმის იგივეა, რაც რკინიგზით საქართველომდე ტრანსპორტირება. სწორედ ამიტომ, მომავალი ამ მიმართულებისაა. ჩვენ ვხედავთ, რომ ნავთობზე ფასები საკმაოდ არასტაბილურია და მიმდინარე კონფლიქტები მასზე ძალიან დიდ გავლენას ახდენს. რკინიგზის თვითღირებულება კი, როგორც მოგეხსენებათ, ელექტროენერგიაზეა დამოკიდებული, რაც მას ბევრად უფრო სტაბილურს ხდის.

ამ პროექტს საკმაოდ დიდი პერსპექტივა აქვს. მიუხედავად იმისა, რომ დღეს ზუსტი პროგნოზების გაკეთება რთულია, ეს  მთლიანი რეგიონისთვის უდიდესი დოვლათის მომტანი და ლოგისტიკის ეფექტიანობის ამაღლების წინაპირობა იქნება“, - აღნიშნა ნამადოვმა.

მისივე თქმით, საქართველო შეუძლია არა მხოლოდ საკუთარი ექსპორტ-იმპორტის მომსახურება, არამედ მესამე ქვეყნებისთვის ლოგისტიკური მომსახურების გაწევაც, მისი თქმით, უკვე არსებობს რეგიონის მაგალითები, როგორიცაა ყაზახეთი და აზერბაიჯანი, რომლებიც საკუთარი ინფრასტრუქტურის გამოყენებით მესამე ქვეყნების ტვირთების გადაზიდვაზეც მუშაობენ. ნამადოვის შეფასებით, საქართველოს შეუძლია ამ მიმართულებით მნიშვნელოვანი პოტენციალის რეალიზება, რაც ქვეყნისთვის დამატებითი შემოსავლის წყარო გახდება და საერთაშორისო ლოგისტიკურ ბაზარზე მის როლს გააძლიერებს.

„თუ დღეს საერთაშორისო ლოგისტიკაში არსებულ ეკონომიკურ სალდოს ავიღებთ, მომსახურებაში უფრო მეტს ვიხდით, ვიდრე თავად გავცემთ. ამ მიდგომით კი პირიქით  შეგვიძლია ჩვენი წილი გავზარდოთ. მით უმეტეს, ჩვენი მდებარეობისა და დღევანდელი გეოპოლიტიკური აქტუალურობის გათვალისწინებით, პატარა ქვეყნებისთვის ეს მომსახურება შეიძლება იქცეს ექსპორტის ერთ-ერთ უმნიშვნელოვანეს წყაროდ ისევე, როგორც ტურიზმი, IT სექტორი, დეველოპმენტი და სხვა“,- აღნიშნა Kairos Logistics-ის გენერალურმა დირექტორმა.