2026 წელი Vinotells-ისთვის ახალი პარტნიორობების, ბრენდის პოზიციონირების გაძლიერებისა და განვითარების მიმართულებით აქტიურად მიმდინარეობს. Business Insider Georgia-ს კომპანიის მარკეტინგისა და საზოგადოებასთან ურთიერთობის მენეჯერი მარი ჭყოიძე მიმდინარე სიახლეების, ქართული ღვინის მიმართ მომხმარებლის ინტერესისა და სამომავლო გეგმების შესახებ ესაუბრა.

რა სიახლეები გაქვთ მიმდინარე პერიოდში და როგორ შეაფასებთ მომხმარებლის ინტერესს ქართული ღვინოების მიმართ?

მიმდინარე პერიოდში Vinotells-ისთვის რამდენიმე მნიშვნელოვანი სიახლეა. ჩვენი ღვინოები უკვე წარმოდგენილია მაღალი კატეგორიისა და პრემიუმ სეგმენტის რამდენიმე რესტორნის ღვინის ბარათში. ასეთ სივრცეებში ღვინის წარმოდგენა ჩვენთვის განსაკუთრებით მნიშვნელოვანია, რადგან ეს არა მხოლოდ გაყიდვების ზრდას, არამედ ბრენდის პოზიციონირებასა და ხარისხის მიმართ პროფესიული ნდობის გამოხატულებასაც წარმოადგენს. ჩვენთვის მნიშვნელოვანია, რომ Vinotells ასოცირდებოდეს ხარისხთან, გამორჩეულ ქართულ ჯიშებთან და თანამედროვე მეღვინეობის კულტურასთან.

ამასთან, მზარდ ინტერესს ვხედავთ Duty Free-ს მიმართულებითაც, სადაც ბოლო პერიოდში Vinotells-ის ღვინოებზე მოთხოვნა გაიზარდა. ჩვენთვის ეს განსაკუთრებით საინტერესო ტენდენციაა, რადგან Duty Free-ის სივრცე ქართული ღვინის საერთაშორისო სტუმრებთან და უცხოელ მომხმარებელთან წარდგენის ერთ-ერთი მნიშვნელოვანი არხია. ვფიქრობთ, ამ მიმართულების კიდევ უფრო გაძლიერება Vinotells-ის ცნობადობისა და გაყიდვების ზრდისთვის მნიშვნელოვან შესაძლებლობას წარმოადგენს.

აქტიურად ვემზადებით რთველისთვის. წელსაც, როგორც ბოლო 5 წლის განმავლობაში ჩავატარეთ მწვანე რთველი - პროცესი, რომელიც ჩვენთვის განსაკუთრებით მნიშვნელოვანია, რადგან ვენახში მოსავლის რაოდენობისა და მტევნების რაოდენობის წინასწარ რეგულირება საბოლოო პროდუქტის ხარისხზე პირდაპირ აისახება. მწვანე რთველი საშუალებას გვაძლევს, მცენარის რესურსი დარჩენილ მტევნებზე გადავანაწილოთ და მივიღოთ უფრო კონცენტრირებული, დაბალანსებული და მაღალი ხარისხის ყურძენი. შესაბამისად, ეს ჩვენთვის არა მხოლოდ აგროტექნიკური პროცესია, არამედ მაღალი ხარისხის ღვინის შექმნის ერთ-ერთი მნიშვნელოვანი წინაპირობა.

როგორია კომპანიის სამომავლო გეგმები ასორტიმენტის ზრდისა და საერთაშორისო მიმართულებით გაფართოების კუთხით?

კომპანიის სამომავლო განვითარების ერთ-ერთი მთავარი მიმართულება ასორტიმენტის ეტაპობრივი გაფართოებაა. წლების განმავლობაში Vinotells-ის მთავარი აქცენტი ქვევრის ღვინოებზე იყო - ტრადიციული ქართული მეთოდით დამზადებული ღვინო წარმოადგენს ჩვენი მეღვინეობის იდენტობისა და ფილოსოფიის მნიშვნელოვან ნაწილს. თუმცა, ბოლო წლებში გადავდგით კიდევ ერთი მნიშვნელოვანი ნაბიჯი და კლასიკური, ევროპული ტექნოლოგიით დამზადებული ღვინოების წარმოებაც დავიწყეთ. ამ მიმართულებამ მოლოდინი გაამართლა და მომხმარებლის მხრიდან საკმაოდ კარგი გამოხმაურება მივიღეთ.

ამ გამოცდილების გათვალისწინებით, წელსაც ვგეგმავთ კლასიკური კატეგორიის ღვინოების გარკვეული რაოდენობით წარმოებას. მათ შორის განსაკუთრებით გამოვყოფდი მუსკატურ რქაწითელსა და ნაფარეულ თეთრს, რომლებზეც უკვე გვაქვს დადებითი გამოცდილება და ვფიქრობთ, რომ მათ მნიშვნელოვანი პოტენციალი აქვთ როგორც ადგილობრივ, ისე საერთაშორისო ბაზრებზე.

მუსკატური რქაწითელი საინტერესოა თავისი გამორჩეული არომატული პროფილითა და ჯიშის ინდივიდუალური ხასიათით, ხოლო დაცული ადგილწარმოსობის ღვინო ნაფარეული თეთრი კიდევ ერთხელ გვაძლევს შესაძლებლობას, წარმოაჩინოთ ქართული თეთრი ღვინის პოტენციალი და იმ მიკროზონის უნიკალურობა, სადაც ჩვენი ვენახებია. ჩვენთვის მნიშვნელოვანია, რომ ასორტიმენტის გაფართოება მხოლოდ ახალი პროდუქტების დამატებას არ გულისხმობდეს - თითოეულ ღვინოს უნდა ჰქონდეს საკუთარი იდენტობა, ხარისხი და ის ისტორია, რომლის მოყოლაც საერთაშორისო მომხმარებლისთვისაც საინტერესო იქნება.

საერთაშორისო მიმართულებით ჩვენი მიზანია ეტაპობრივად გავზარდოთ Vinotells-ის ცნობადობა და გავაძლიეროთ პოზიციონირება ისეთ ბაზრებზე, სადაც ქართული ღვინის მიმართ ინტერესი მზარდია. ვფიქრობთ, ქვევრის ღვინოების ტრადიციული ხაზისა და თანამედროვე კლასიკური ღვინოების კომბინაცია სწორედ ის შესაძლებლობაა, რომელიც საშუალებას მოგვცემს, ქართული მეღვინეობის განსხვავებული მხარეები უფრო ფართო აუდიტორიას გავაცნოთ.