ვცდილობთ, აქცენტები ნაწილობრივ შიდა ბაზარზე გადავიტანოთ, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას რესტორატორთა ასოციაციის დამფუძნებელმა კონსტანტინე  გაბრიჩიძემ განაცხადა

კონსტანტინე გაბრიჩიძის განცხადებით, კარგი იქნება თუ სექტორი შიდა ბაზარზე მეტი აქცენტის გადატანას და იმ უბნებში, რომლებიც ძირითადად უცხოელებზეა ორიენტირებული, ადგილობრივი მომხმარებლის დაბრუნებას სხვადასხვა აქტივობებით შეძლებს. 

„იცით, ჩვენ ახლა ვცდილობთ, აქცენტები ნაწილობრივ შიდა ბაზარზე გადავიტანოთ. ის ობიექტები, რომლებიც ქალაქის ცენტრში, შარდენის მიდამოებსა და სოლოლაკში მდებარეობს, იმდენად ორიენტირებულია უცხოელებზე, რომ ადგილობრივი მომხმარებელი მათ გარკვეული უნდობლობით უყურებს და იქ აღარ მიდის, რადგან ეს ადგილები მხოლოდ ტურისტულ უბნებად აღიქმება. რომშიც ასეა, ტურისტულ უბანში ადგილობრივი არასდროს გაივლის და დასასვენებლად არ დაჯდება. მსგავსი განცალკევება ჩვენთანაც არსებობს. ობიექტების 95%, რომლებიც ტურისტებზე არიან დამოკიდებულნი. გვსურს, სხვადასხვა აქტივობით იქ ადგილობრივი მომხმარებელიც მოვიზიდოთ. ეს ერთ-ერთი მთავარი თემაა. ძალიან მნიშვნელოვანია, რომ ამ მიმართულებით წინსვლა გვქონდეს. ეს არის პროექტი, უფრო სწორად კი, მუდმივი სამუშაო პროცესი ადგილობრივი ბაზრის ასათვისებლად“, - აცხადებს კონსტანტინე  გაბრიჩიძე.

მისი თქმით, საერთაშორისო პრაქტიკის მსგავსად, მნიშვნელოვანია შიდა ტურიზმის წახალისება საგანმანათლებლო პროექტებითაც, მათ შორის მოსწავლეების სხვადასხვა რეგიონში მოგზაურობის ხელშეწყობით, რაც ხელს შეუწყობს ქვეყნის უკეთ გაცნობას და მომავალში შიდა ტურიზმის განვითარებას.

„შესაძლებელია ისეთი პროექტის ჩაშვება, რომელიც იქნება არა ერთჯერადი ინიციატივა, არამედ მუდმივმოქმედი. ამ პროექტმა მუდმივი კვეთა უნდა ჰპოვოს როგორც განათლების, ისე ეკონომიკის სამინისტროების საქმიანობაში, რათა შეიქმნას რეალური პროდუქტი.

ხშირად ვიხსენებ ხოლმე შვეიცარიის მაგალითს. მათ ყველაზე დიდი შემოსავალი სწორედ ტურიზმიდან აქვთ.  ამ მაჩვენებლით მას ვერც საათების წარმოება და ვერც საბანკო სექტორი ვერ უთანაბრდება. ამასთან, ტურიზმიდან მიღებული შემოსავლების უდიდესი წილი სწორედ ადგილობრივ ტურისტებზე მოდის. ეს არის მსოფლიოში ერთ-ერთი ყველაზე მდიდარი ქვეყნის პირდაპირი მაგალითი, რომელიც შეგვიძლია ავიღოთ და გადმოვიტანოთ ჩვენს რეალობაში.

მსოფლიო ეკონომიკის უდიდესი მაგალითი თვალწინ გვიდევს. ძალიან კარგი იქნება, თუ ამის განხორციელებას შევძლებთ. მართალია, ეს საკმაოდ რთული თემა და პროექტია, თუმცა მისი შედეგი გრძელვადიანი და მუდმივი იქნება“, - აღნიშნავს რესტორატორთა ასოციაციის დამფუძნებელი.