2024 წლიდან სასაწყობე სექტორში მიწოდების ტემპი გახუთმაგდა და წლიურად 180 000 კვადრატული მეტრი ემატება თბილისს - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას Galt & Taggart-ის სექტორული კვლევების უფროსმა ზუკა თავყელიშვილმა განაცხადა.

„გეთანხმებით იმაში, რომ თვითონ ეს ინდუსტრია ძალიან ბევრ სექტორს ეხება და ბევრი ჩართული მხარე არის სასაწყობე მიმართულებით.

რაც შეეხება მდებარეობებს, თუ შევხედავთ, თბილისში ბუნებრივია, რომ საწყობების უდიდესი ნაწილია კონცენტრირებული. 2025 წელს 1 260 000 კვადრატული მეტრის სასაწყობე ფართი იყო მიწოდება. მას მოჰყვება ბათუმი 340 000 კვადრატული მეტრით და ფოთი 170 000 კვადრატული მეტრით.

თუ შევადარებთ, ფოთში, მაგალითად, თუ ავიღებთ საბაჟო საწყობების წილს ჯამურ საწყობებში, არის დაახლოებით 70%. შესადარისად, თბილისში ეს არის მხოლოდ 23%, ანუ თბილისში არსებული საწყობები ძირითადად ადგილობრივი მოსახლეობის მოთხოვნილებებს აკმაყოფილებს და ფოთში ემსახურება საერთაშორისო ტვირთს ძირითადად.

სექტორს ზრდისა და გაფართოების პოტენციალი ცალსახად აქვს. ახლა მიწოდების მხარეს, როგორც აღვნიშნე, საკმაოდ გაზრდილი არის ტემპი.

თუ შევხედავთ, მაგალითად, წინა ათწლეულს - 2014-დან 2024 წლამდე რომ გადავხედოთ საკმაოდ ნელი ტემპით იზრდებოდა მიწოდება და წლიურად საშუალოდ 35 000 კვადრატული მეტრის სასაწყობე სივრცეები შენდებოდა.

2022-2023 წელს გაზრდილ მოთხოვნას ის მოჰყვა, რომ 2024 წლიდან უკვე მიწოდების მხარეს ვნახეთ შესაბამისი პასუხი და გახუთმაგდა მიწოდების ტემპი, ანუ საშუალოდ წლიურად 180 000 კვადრატული მეტრი ემატება თბილისს 2024 წლიდან.
თუ შევხედავთ მომდევნო ორ წელს 2026-2027 წლებში რაც უნდა აშენდეს, ჯამში თითქმის 400 000 კვადრატული მეტრის მიწოდება უკვე დაგეგმილია და ნებართვები არის ამაზე გაცემული, რაც იქნება 2025 წელთან დაახლოებით 31%-იანი ზრდა.
ანუ მიწოდების ტემპი საკმაოდ მაღალ დონეზე ნარჩუნდება და ეს, ბუნებრივია, სექტორის აქტუალობაშიც აისახება“, - აცხადებს ზუკა თავყელიშვილი.