2036 წლამდე ჩვენს დადგმულ სიმძლავრეს დამატებით 4 000 მეგავატი უნდა დაემატოს, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას GREDA-ს აღმასრულებელმა დირექტორმა, მაია მელიქიძემ განაცხადა.

„გაცხადებული პოლიტიკა არის, რომ დამატებით 4000 მეგავატი უნდა დაემატოს ჩვენს დადგმულ სიმძლავრეს. დღეის მდგომარეობით, ეს გახლავთ 4800 მეგავატი. რეალურად, გაორმაგებაზე არის საუბარი, 2036 წლამდე უნდა მოხდეს ეს.
ამ 4000 მეგავატიდან 1000 არის ჰიდრო, შესაბამისად, 1700 და 1300 არის ქარი და მზე, ამიტომ, აქედან გამომდინარე, ვფიქრობთ, რომ ეს ძალიან სწორი და მყისიერად საინტერესო ნაბიჯია ჩვენი ქვეყნისთვის.

ერთადერთი, რა გამოწვევაც არის, ეს არის გადამცემი ქსელი, ვინაიდან გადამცემი ქსელი ამ ეტაპისთვის, დღეის მდგომარეობით, არ არის ისეთ მდგომარეობაში, რომ ამ რაოდენობის, ამ მოცულობის განახლებადი ენერგო წყაროებისგან წარმოებული ელექტროენერგიის ინტეგრაცია უზრუნველყოს.

სწორედ ამას ემსახურებოდა სემეკის გადაწყვეტილებაც მიმდინარე წლის პირველ აპრილს, როდესაც მოხდა ტარიფების ზრდა, ვინაიდან 5 წლის განმავლობაში გაიწერა ეს პროცესი, თუ „ენერგო-პრომ“ როდის უნდა განახორციელოს ინვესტიცია, კონკრეტულად რომელ რაიონში, რეგიონში, სოფელსა თუ ასე შემდეგ.

სხვათა შორის, დღეს მივიღე წერილი მარტვილიდან, ვინაიდან ქსელი ძალიან მძიმე მდგომარეობაშია და მოსახლეობა ითხოვს ძალიან სერიოზულ დახმარებას. ეს გაწერილი აქვს უკვე „ენერგო-პროს“ და მომავალ წელს აუცილებლად მოხდება რეაბილიტაცია და, მე ვიტყოდი, სრულიად გამოცვლა. აქ წერტილოვნად გამოსწორებაზე უკვე აღარ არის საუბარი, იმდენად ძველია ეს ყველაფერი.

აქვე არ შემიძლია, არ გამოვეხმაურო შუამავლების თემას, რომელიც ძალიან აქტუალური და მნიშვნელოვანი არის ბოლო პერიოდში, და სრული მხარდაჭერა გამოვუცხადო იმ უბრალო მიზეზის გამო, რომ ისტორიული ექსკურსიც რომ გავიხსენოთ, ჩვენს ბავშვობაში ხშირი იყო ხოლმე გათიშვა და არამხოლოდ გათიშვა, არამედ ელექტროენერგია საერთოდ არ გვქონდა შევარდნაძის დროს.

სწორედ მაშინ გაჩნდნენ ე.წ. შუამავლები, რომლებიც იმპორტს ახორციელებდნენ ელექტროენერგიისას. შემდეგ უკვე მოხდა ის, რომ შუამავალთა ჩახსნა მოხდა ამ პროცესისგან. ეს იყო ძალიან სწორი გადაწყვეტილება, ვინაიდან ამაში საკომისიოს აღება ხდება.

შემდეგ უკვე, დაახლოებით 2016 წელს, ჩნდებიან უკვე ეს შუამავლები. 2017 წელს უკვე უქმდება ენერგეტიკის სამინისტრო და ჩვენ მივესალმებით, რომ 10 წლის თავზე უკვე ეს გადაწყვეტილება იქნა მიღებული და შუამავლების ჩახსნა მოხდა.
ამისი მთავარი ამოსავალი წერტილი გახლავთ ის, რომ ის საკომისიო, რომელიც ემატებოდა აი ამ შემოტანას ელექტროენერგიისას, ეს იქნება, ბუნებრივია, ჩახსნილი და ის კომპონენტი იქნება ამოღებული აი ამ კალკულაციიდან“, - აცხადებს მაია მელიქიძე.