ADB სექტემბრის განახლებულ პროგნოზებს აქვეყნებს. ანგარიშის თანახმად, აზიის განვითარების ბანკმა (ADB) საქართველოს 2026 წლის ეკონომიკური ზრდის პროგნოზი ივლისის 5.5%-დან 6.3%-მდე გაზარდა.

,,საქართველოს ეკონომიკური ზრდის პროგნოზი 0.8 პროცენტული პუნქტით, ხოლო უზბეკეთის 0.3 პროცენტული პუნქტით გაიზარდა, წლის პირველ ნახევარში მოსალოდნელზე უკეთესი ეკონომიკური შედეგების ფონზე, რასაც მდგრადი შიდა მოთხოვნა განაპირობებდა. სომხეთის, ყაზახეთის, ყირგიზეთისა და თურქმენეთის პროგნოზები უცვლელი დარჩა", - აღნიშნულია ანგარიშში.

აზიის განვითარების ბანკის (ADB) შეფასებით, კავკასიის ქვეყნებში ეკონომიკური ზრდის ტემპები 2026 წლის პირველ ნახევარში ერთმანეთისგან განსხვავებული იყო.
,,საქართველოს [ეკონომიკურმა შედეგებმა] მოლოდინებს გადააჭარბა, რასაც ხელი შეუწყო მომსახურების სექტორის ძლიერმა აქტივობამ, მოხმარებამ და ექსპორტმა. ეკონომიკური აქტივობის მოსალოდნელზე მაღალი მაჩვენებლისა და რეგიონული გავლენების შეზღუდული მასშტაბის გათვალისწინებით, 2026 წლის ეკონომიკური ზრდის პროგნოზი 5.5%-დან 6.3%-მდე გაიზარდა, ხოლო 2027 წლის პროგნოზი 5.2%-ზე უცვლელი დარჩა.

სომხეთში ეკონომიკური ზრდის ტემპი შენელდა, რაც სუსტი მოთხოვნის ფონზე მოხდა. საჯარო ინფრასტრუქტურისა და უძრავი ქონების სექტორში აქტივობით მხარდაჭერილმა ძლიერმა მშენებლობამ და მრეწველობის აღდგენამ ნაწილობრივ დააკომპენსირა მომსახურების სექტორის ზრდის შენელება და სოფლის მეურნეობის შემცირება. პროგნოზები უცვლელი დარჩა 5.0% 2026 წლისთვის და 5.5% 2027 წლისთვის. ზრდას ხელს შეუწყობს შიდა მოთხოვნა, მშენებლობა, მომსახურების სექტორი და ტურიზმი.

ეკონომიკური ზრდის ყველაზე სუსტი მაჩვენებელი აზერბაიჯანში დაფიქსირდა, სადაც ეკონომიკაზე გავლენა იქონია ნახშირწყალბადების მოპოვების შემცირებამ და სამშენებლო აქტივობის შესუსტებამ. 2026 წლის ზრდის პროგნოზი 2.0%-დან 1.6%-მდე შემცირდა, ხოლო 2027 წლის პროგნოზი 1.8%-ზე შენარჩუნდა, რაც ეკონომიკის მოსალოდნელ აღდგენას ასახავს," - წერს აზიის განვითარების ბანკი (ADB).

ADB-ის შეფასებით, რეგიონში ფისკალური პოლიტიკა 2026 წლის პირველ ნახევარში, ძირითადად, ფრთხილი იყო, რასაც ხელი შეუწყო როგორც შემოსავლების ძლიერმა მაჩვენებლებმა, ისე ხარჯების მიზანმიმართულმა შეკავებამ.
,,თურქეთმა ბოლო წლების განმავლობაში ფისკალური კუთხით ერთ-ერთი საუკეთესო შედეგი აჩვენა - ცენტრალური მთავრობის ბიუჯეტის დეფიციტი მშპ-ის 2.6%-მდე შემცირდა. სასაქონლო სექტორთან დაკავშირებული შემოსავლების ზრდამ სომხეთის ბიუჯეტის დეფიციტის შემცირებას შეუწყო ხელი, ხოლო საქართველოში ფისკალური პროფიციტის მიღწევას ხელი შეუწყო. აზერბაიჯანში ფისკალური პროფიციტი კაპიტალური ხარჯების შემცირების შედეგად დაფიქსირდა. თურქმენეთი და უზბეკეთი კვლავ მიზნად ისახავენ დაბალანსებულ ბიუჯეტებს ან შეზღუდულ დეფიციტს, მკაფიოდ განსაზღვრული საშუალოვადიანი ფისკალური ჩარჩოების ფარგლებში", - აღნიშნულია ანგარიშში.

აზიის განვითარების ბანკი საქართველოს კონტექსტში უფრო დეტალურ ანალიზსაც წარმოადგენს და წერს, რომ ეკონომიკამ 2026 წლის პირველ ნახევარში გარე შოკების მიუხედავად მდგრადობა შეინარჩუნა.

,,საქართველოს ეკონომიკამ 2026 წლის პირველ ნახევარში გარე შოკების მიუხედავად მდგრადობა შეინარჩუნა. ეკონომიკური ზრდა მაღალი იყო და 7.9% შეადგინა, 2025 წლის ანალოგიურ პერიოდში დაფიქსირებული 8.3%-ის შემდეგ. მიწოდების მხარეს, პირველი კვარტლის მონაცემებით, ეკონომიკური ზრდის მთავარი მამოძრავებელი მომსახურების სექტორი იყო, რომელმაც 13.9%-ით მოიმატა და წინა წლის შესაბამის პერიოდთან შედარებით უცვლელი მაჩვენებელი შეინარჩუნა. საინფორმაციო და საკომუნიკაციო ტექნოლოგიების (ICT) მომსახურებები მნიშვნელოვნად გაიზარდა 36.0%-ით, ხოლო ტრანსპორტისა და დასაწყობების სექტორის ზრდა 8.4%-დან 18.0%-მდე გაორმაგებულზე მეტად დაჩქარდა. მოთხოვნის მხარეს, კერძო მოხმარების ზრდა 3.9%-დან 8.0%-მდე დაჩქარდა, რასაც საბანკო დაკრედიტების მდგრადი ზრდა უჭერდა მხარს. ფისკალური პოლიტიკა კვლავ ფრთხილი იყო 2026 წლის პირველ კვარტალში ბიუჯეტში პროფიციტი დაფიქსირდა, მაშინ როცა ერთი წლით ადრე დეფიციტი იყო. სახელმწიფო მოხმარების ზრდა მკვეთრად შენელდა და 21.5%-დან 1.8%-მდეშემცირდა, ხოლო საჯარო ინვესტიციების განხორციელების შედარებით ნელმა ტემპმა შიდა მოთხოვნა დამატებით შეზღუდა. ძირითადი კაპიტალის მთლიანი ფორმირების ზრდა 11.8%-დან 2.1%-მდე შენელდა. საგარეო მოთხოვნა გაძლიერდა საქონლისა და მომსახურების ექსპორტი 6.8%-ით გაიზარდა, 2025 წლის 5.2%-თან შედარებით, მაშინ როდესაც იმპორტის ზრდა მკვეთრად შენელდა და 11.8%-დან 2.3%-მდე შემცირდა. ეკონომიკური აქტივობის მოსალოდნელზე უკეთესი მაჩვენებლებისა და რეგიონული დაძაბულობის გაძლიერებით გამოწვეული უარყოფითი გავლენების შეზღუდული მასშტაბის გათვალისწინებით, 2026 წლის ეკონომიკური ზრდის პროგნოზი გაიზარდა. საქართველოს საგარეო პოზიცია 2026 წლის პირველ ნახევარში, ტურიზმის შესუსტების მიუხედავად, მდგრადი დარჩა. მიმდინარე ანგარიშის დეფიციტი პირველ კვარტალში მშპ-ის 3.8%-მდე შემცირდა, წინა წლის ანალოგიურ პერიოდში დაფიქსირებული 8.5%-დან.

საქონლის ექსპორტი წლის პირველ ნახევარში 20.0%-ით გაიზარდა, რაც ნაწილობრივ გლობალურ სასაქონლო ფასების ზრდას ასახავდა. იმპორტი, ძირითადად, უცვლელი დარჩა და მხოლოდ 0.7%-ით გაიზარდა, რადგან ავტომობილების იმპორტის შემცირებამ ენერგოიმპორტის გაზრდილი ხარჯები დააბალანსა.

გადამუშავებული ნავთობპროდუქტები ექსპორტის სიდიდით მეორე კატეგორია გახდა, რომლის ექსპორტიც თითქმის 11-ჯერ გაიზარდა. ასევე მნიშვნელოვნად გაიზარდა ძვირფასი ლითონებისა და სპილენძის მადნის ექსპორტი - შესაბამისად, 74.3%-ით და 287.4%-ით. საავტომობილო საშუალებების რეექსპორტი, მიუხედავად 22.9%-იანი შემცირებისა, კვლავ ექსპორტის ყველაზე მსხვილ კატეგორიად დარჩა.
მიუხედავად იმისა, რომ ახლო აღმოსავლეთის კონფლიქტის საერთო გავლენა შეზღუდული იყო, რეგიონში საჰაერო მიმოსვლის შეფერხებამ ტურიზმის სექტორის შესუსტება გამოიწვია. ტურიზმიდან მიღებული შემოსავლები 2026 წლის პირველ ნახევარში 2.0%-ით შემცირდა, მაშინ როდესაც ერთი წლით ადრე 3.8%-იანი ზრდა დაფიქსირდა.

სხვა მომსახურებებმა ეს შემცირება ნაწილობრივ დააბალანსა - პირველ კვარტალში მომსახურების მთლიანი ექსპორტი 7.2%-ით გაიზარდა, რასაც ძირითადად ICT მომსახურების ექსპორტის 65.7%-იანი ზრდა განაპირობებდა.

ფულადი გზავნილებიც 2026 წლის პირველ ნახევარში 4.0%-ით გაიზარდა, წინა წლის ანალოგიურ პერიოდში დაფიქსირებული 3.5%-იანი ზრდის შემდეგ.
უცხოური ვალუტის ძლიერი შემოდინება ლარის სტაბილურობასა და საერთაშორისო რეზერვების დაგროვებას უწყობდა ხელს. რეზერვების მოცულობამ საერთაშორისო სავალუტო ფონდის რეზერვების ადეკვატურობის შეფასების (ARA) მაჩვენებლის 118%-ს გადააჭარბა", - აღნიშნულია ანგარიშში.