ADB-მა CAREC-ის რეგიონში, მათ შორის საქართველოშიც საზღვრების მოდერნიზაციისა და ვაჭრობის ხელშეწყობისთვის ჯამურად $400 მილიონიანი დაფინანსება დაამტკიცა. 

400 მილიონი დოლარის მოცულობის რეგიონული დაფინანსების მექანიზმის მიზანია სასაზღვრო-გამშვები პუნქტების მოდერნიზება, სატრანსპორტო და ლოგისტიკური ხარჯების შემცირება და ცენტრალური აზიის რეგიონალური ეკონომიკური თანამშრომლობის (CAREC) რეგიონში ადამიანებისა და საქონლის გადაადგილების გაუმჯობესება.

Border Upgrades for Integration, Logistics, and Development (BUILD)-ის სახელწოდებით არსებული დაფინანსების მექანიზმი მხარს დაუჭერს პრიორიტეტულ ინვესტიციებს სასაზღვრო-გამშვები პუნქტების მოდერნიზებისა და CAREC-ის რეგიონში კავშირებისა და კონკურენტუნარიანობის გაძლიერების მიზნით.

„საზღვრები მხოლოდ საკონტროლო-გამშვები პუნქტები არ არის - არის კარიბჭე ახალი სამუშაო ადგილების, რეგიონული ბაზრებისა და შემოსავლის მიღების შესაძლებლობების შესაქმნელად“, - განაცხადა ADB-ის ცენტრალური და დასავლეთ აზიის დეპარტამენტის გენერალურმა დირექტორმა ლეა გუტიერესმა.

ვაჭრობისა და სატრანსპორტო კავშირების მიმართულებით ბოლო პერიოდში მიღწეული პროგრესის მიუხედავად, CAREC-ის დერეფნებში სასაზღვრო-გამშვები პუნქტები კვლავ მნიშვნელოვან შეფერხებებს ქმნის, რაც განპირობებულია ვაჭრობის მოცულობის ზრდით, ინფრასტრუქტურისა და გამტარუნარიანობის შეზღუდვებით, ასევე საზღვრის მართვის სისტემებისა და პროცედურების შემდგომი მოდერნიზების საჭიროებით.

ეს შეზღუდვები ეკონომიკურ დანაკარგებსა და სირთულეებს უქმნის სატრანსპორტო ოპერატორებს, მოვაჭრეებსა და მგზავრებს, ასევე ზრდის ადამიანით ვაჭრობის, გარემოსდაცვითი პრობლემებისა და საზოგადოებრივი ჯანმრთელობის რისკებს.

CAREC-ის პროგრამა წარმოადგენს ავღანეთის, აზერბაიჯანის, ჩინეთის სახალხო რესპუბლიკის, საქართველოს, ყაზახეთის, ყირგიზეთის რესპუბლიკის, მონღოლეთის, პაკისტანის, ტაჯიკეთის, თურქმენეთისა და უზბეკეთის პარტნიორობას, რომლებიც განვითარების პარტნიორებთან ერთად თანამშრომლობენ რეგიონული თანამშრომლობის გზით მდგრადი განვითარებისა და ეკონომიკური ზრდის ხელშეწყობის მიზნით. ADB CAREC-ის სამდივნოს მასპინძლობს.