„საქართველოს საგარეო ვაჭრობაში პოზიტიური ტენდენციები გრძელდება, რაც განსაკუთრებით ადგილობრივი ექსპორტის მკვეთრ ზრდაში აისახა" - აცხადებს ეკონომიკისა და მდგრადი განვითარების მინისტრის მოადგილე ვახტანგ ცინცაძე.

მისი განმარტებით, მარტში ადგილობრივი ექსპორტის რეკორდული მოცულობა დაფიქსირდა, წლიურად დაახლოებით 83%-ით გაიზარდა და 463 მლნ აშშ დოლარს აჭარბებს. ასევე რეკორდულია იანვარ–მარტის ექსპორტისა და ადგილობრივი ექსპორტის მაჩვენებლები, კერძოდ იანვარ-მარტში ადგილობრივი ექსპორტის დაახლოებით 75%-იანი ზრდა ფიქსირდება, ხოლო ადგილობრივი ექსპორტის მოცულობა 1 მლრდ 120 მლნ აშშ დოლარს აღემატება.

მინისტრის მოადგილის განცხადებით, მიღწეული შედეგები კიდევ ერთხელ ადასტურებს ქვეყანაში გატარებული ეკონომიკური პოლიტიკის ეფექტიანობას.

„საგარეო ვაჭრობის მიმდინარე შედეგების მიხედვით კიდევ ერთხელ დასტურდება, რომ საქართველოს გააჩნია სწორი და თანმიმდევრული ეკონომიკური პოლიტიკა, რომელიც ხელს უწყობს ადგილობრივი წარმოების განვითარებას და ეხმარება კერძო სექტორს რომ თავიანთი პროდუქციის ექსპორტი განახორციელონ მსოფლიოს მასშტაბით არაერთ ქვეყანასთან თავისუფალი ვაჭრობის შეთანხმებების ფარგლებში", - განმარტავს ვახტანგ ცინცაძე.

მისივე თქმით, მთავრობის პროგნოზით აღნიშნული ტენდენცია მომდევნო თვეებშიც შენარჩუნდება.

„მსგავსი ტენდენციები შეუწყობს ქვეყანაში მაღალი ეკონომიკური ზრდის შენარჩუნებას, დამატებითი სამუშაო ადგილების შექმნას და საბოლოო ჯამში, პოზიტიურად აისახება მოსახლეობის კეთილდღეობის ზრდაზე", - აღნიშნა მინისტრის მოადგილემ.