„ამიერიდან მთელ საქართველოში ვირტუალურად მოგზაურობა შეგვიძლია, ზუსტად ისე, როგორც ვიდეოებში ჩანს. შესაბამისად, ძალიან მნიშვნელოვანია, რომ Google-მა ეს პროექტი განახორციელა“, - განაცხადა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას GITA - ს თავმჯდომარემ.

ავთანდილ კასრაძის თქმით, Google Street View-ის ამოქმედება საქართველოში ხელს შეუწყობს როგორც ტურიზმის განვითარებას, ისე ადგილობრივი ბიზნესების პოპულარიზაციას და ციფრული რუკების სიზუსტის გაუმჯობესებას.

„ეს, პირველ რიგში, რა თქმა უნდა, ტურიზმისთვის არის უმნიშვნელოვანესი, რადგან უცხოელ ტურისტებს საშუალება ეძლევათ, წინასწარ აღმოაჩინონ სხვადასხვა ადგილები და ქვეყანაში ჩამოსვლის გადაწყვეტილება ასე მიიღონ. გარდა ამისა, აქ კიდევ ერთი კომპონენტია, რაზეც თავად Google-ის წარმომადგენლებმაც გაამახვილეს ყურადღება: ხშირად ხდება, როდესაც ქვეყნიდან დაბრუნებული მოგზაური ახლობლებსა და მეგობრებს რუკაზე უჩვენებს კონკრეტულ ადგილს, თუ სად იმყოფებოდა. ეს ბევრად მარტივს ხდის იმის ჩვენებას, თუ რა საოცარ გარემოში იმოგზაურა ადამიანმა, რაც სხვებსაც უბიძგებს, რომ საქართველოში ჩამოვიდნენ.

ეს პროექტი ასევე ძალზედ მნიშვნელოვანია მცირე, საშუალო, რეგიონალური და ლოკალური ბიზნესისთვის, რათა მათ მიერ შეთავაზებული გარემო უფრო თვალწარმტაცი და ხელშესახები გახდეს. მომხმარებლისთვის მხოლოდ იმის წაკითხვა კი არ იქნება საკმარისი, რომ ესა თუ ის ობიექტი, მაგალითად, რესტორანია, არამედ სრულ ვიზუალურ გამოსახულებას მიიღებს და სტუმრობის სურვილი გაუჩნდება.

გარდა ამისა, ზოგადად, ნებისმიერ ციფრულ რუკას იქნება ეს Google Maps-ი, Waze-ი თუ Apple Maps-ი  გარკვეული ცდომილება ყოველთვის აქვს. ალბათ ყველას გვქონია შემთხვევა, როდესაც მისამართი მიგვითითებია, თუმცა ნავიგაციას ზუსტ ადგილზე არ მივუყვანივართ. Street View ამ პრობლემას სრულად აგვარებს, რადგან რუკაზე არსებულ გეოლოკაციურ მონაცემებთან ერთად, ხელოვნურმა ინტელექტმა ვიზუალური მასალაც დაასინქრონა“, - განაცხადა ავთანდილ კასრაძემ.

GITA - ს თავმჯდომარის თქმით, Google Street View საქართველოში არა მხოლოდ ტურიზმისა და ადგილობრივი ბიზნესების პოპულარიზაციას, არამედ ციფრული სერვისების განვითარებასა და ნავიგაციის სიზუსტის გაუმჯობესებასაც შეუწყობს ხელს. მისივე თქმით, პლატფორმა მომხმარებლებს მისამართების უფრო ზუსტად იდენტიფიცირების შესაძლებლობას მისცემს, ხოლო სტარტაპებისთვის ახალი ინოვაციური პროდუქტებისა და სერვისების შექმნის დამატებით შესაძლებლობებს გააჩენს.