ანაკლიის ღრმაწყლოვანი ნავსადგური უმნიშვნელოვანესი პროექტია შუა დერეფნის კონტექსტში, ჩვენ გავიმყარებთ პოზიციებს, როგორც ევროპასა და აზიას შორის დამაკავშირებელი კვანძის და ამ მიმართულებით, რა თქმა უნდა, შესაბამის ნაბიჯებს ვდგამთ - თამარ იოსელიანი
„ბუნებრივია, ანაკლიის ღრმაწყლოვანი ნავსადგურის მიმართ მაღალია ინტერესი, იქიდან გამომდინარე, რომ ეს არ არის მხოლოდ საქართველოს საპორტო სიმძლავრეების გაზრდისთვის არსებული პროექტი, ეს არის, ზოგადად, რეგიონისთვის ძალიან მნიშვნელოვანი პროექტი", - განაცხადა ეკონომიკისა და მდგრადი განვითარების მინისტრის მოადგილე თამარ იოსელიანმა ტელეკომპანია „იმედის" ეთერში ანაკლიის ნავსადგურის პროექტის მნიშვნელობაზე საუბრისას.
როგორც თამარ იოსელიანმა აღნიშნა, ანაკლიის ღრმაწყლოვანი ნავსადგური უმნიშვნელოვანესი პროექტია შუა დერეფნის კონტექსტში.
„ჩვენ გავიმყარებთ პოზიციებს, როგორც ევროპასა და აზიას შორის დამაკავშირებელი კვანძის და, ამ მიმართულებით, რა თქმა უნდა, ჩვენ შესაბამის ნაბიჯებს ვდგამთ. ახლაც, როდესაც ვსაუბრობთ, ანაკლიის ღრმაწყლოვანი ნავსადგურის აკვატორიაში ხორციელდება შესაბამისი სამშენებლო სამუშაოები. „იან დე ნულ"-ის ფლოტში შემავალი ორი დამაღრმავებელი გემი ჩვენს აკვატორიაში დამაღრმავებელ სამუშაოებს ახორციელებს - შენდება ის ტალღმჭრელი, რომელმაც უნდა დაიცვას აკვატორია და შევძლოთ დიდი ზომის გემების მიღება, რასაც დღეს, ამ ეტაპზე, სამწუხაროდ, ვერ ვიღებთ საქართველოში", - აღნიშნა მინისტრის მოადგილემ.
თამარ იოსელიანმა ყურადღება გაამახვილა გასულ დღეებში ბათუმში გამართული საქართველოს საერთაშორისო საზღვაო ფორუმის ფარგლებში ანაკლიის ღრმაწყლოვანი პორტის პროექტის მიმართ არსებულ მაღალ ინტერესზე.
„როგორც მოგეხსენებათ, საქართველოს მთავრობამ მიიღო გადაწყვეტილება - ჩვენ გადავედით ე.წ. ლენდლორდ მოდელზე, რომელიც გულისხმობს, რომ სახელმწიფო ფლობს და აშენებს ძირითად საპორტო ინფრასტრუქტურას. ამასთან, სახელმწიფო აშენებს საგზაო და სარკინიგზო კავშირს ნავსადგურამდე და ჩვენ უკვე ღია ვართ, ჩვენს პარტნიორებს გავუზიარეთ ინფორმაცია, რომ სატერმინალო ოპერირებას განახორციელებს კერძო სექტორი. ამ კუთხით, რა თქმა უნდა, სახელმწიფო შესაბამის ნაბიჯებს დგამს, რომ შეირჩეს ისეთი პარტნიორები, რომლებიც შეძლებენ როგორც ინვესტიციების მოზიდვას, ასევე ტვირთის მოტანას და ამ მიმართულებით ექნებათ შესაბამისი გამოცდილება" - განაცხადა თამარ იოსელიანმა.
დღის ტოპ 10 სიახლე
სხვა სიახლეები
ვმუშაობთ იმისთვის, რომ ვიყოთ საიმედო პარტნიორები მსოფლიო სავაჭრო სისტემისთვის - თამარ იოსელიანი
09.09.2026.19:25
„ჩვენ უდიდეს მნიშვნელობას ვანიჭებთ სატრანსპორტო სექტორს და შესაბამისად, არსებობს ის გრძელვადიანი ხედვა, თუ როგორ უნდა განვითარდეს ეს სექტორი და ამ გეგმას ჩვენ თანმიმდევრულად მივყვებით" - ამის შესახებ ეკონომიკისა და მდგრადი განვითარების მინისტრის მოადგილემ, თამარ იოსელიანმა ბათუმში გამართულ საქართველოს საერთაშორისო საზღვაო ფორუმზე საუბრისას განაცხადა.
მინისტრის მოადგილის განცხადებით, საქართველოს საერთაშორისო საზღვაო ფორუმი იქცა მნიშვნელოვან პლატფორმად ქვეყნის მიერ განხორციელებული პროექტებისა და დაგეგმილი ღონისძიებების განხილვისთვის.
„რეგიონულ ჭრილში ვისაუბრეთ შუა დერეფნის როლზე მსოფლიო სავაჭრო სისტემებში და იმაზე, თუ რას ვაკეთებთ ჩვენ, პარტნიორი სახელმწიფოები ერთად იმისთვის, რომ შუა დერეფანი გახდეს უფრო კონკურენტუნარიანი და ამ მიმართულებით ვიყოთ საიმედო პარტნიორები მსოფლიოს სავაჭრო სისტემისთვის. ფორუმის ფარგლებში გვქონდა ძალიან მნიშვნელოვანი ორმხრივი შეხვედრებიც და გამოვყოფდი საერთაშორისო საზღვაო ორგანიზაციის როლს და გენერალური მდივნის ვიზიტს, იქიდან გამომდინარე, რომ მისი ვიზიტი ნამდვილად ხაზს უსვამს თვითონ ფორუმის და იმ თემების აქტუალობას, რომელიც ფორუმზე განვიხილეთ. გამოვყოფდი იმ კერძო სექტორსაც, რომელსაც ჩვენ შევხვდით, ეს იქნება Columbia Shipmanagement, რომელიც არის ერთ-ერთი ყველაზე მსხვილი დამსაქმებელი ქართველი მეზღვაურების, ასევე COSCO Shipping, რომელიც წარმოადგენს ერთ-ერთ ძირითად საკონტეინერო ხაზს და აქვე გამოვყოფდი Abu Dhabi Ports. მათთან გვქონდა ძალიან მნიშვნელოვანი ორმხრივი შეხვედრები" - აღნიშნა თამარ იოსელიანმა.
მინისტრის მოადგილის თქმით, ასევე მნიშვნელოვანი ორმხრივი შეხვედრები შედგა პარტნიორი ქვეყნების - ყაზახეთის, თურქეთისა და სომხეთის წარმომადგენლებთან, რომლებთანაც ძალიან მნიშვნელოვანი დისკუსიები გაიმართა.
„ასეთი მაღალი დონის დიალოგი ქმნის იმის შესაძლებლობას, რომ განვიხილოთ მნიშვნელოვანი თანამშრომლობის საკითხები, დავგეგმოთ მომავალი თანამშრომლობა და აქედან გამომდინარე, მივაღწიოთ იმ მნიშვნელოვან შედეგებს, რომელსაც წლების განმავლობაში უკვე საქართველოს სატრანსპორტო სექტორში ვხედავთ" - განაცხადა თამარ იოსელიანმა.
საქართველოს საერთაშორისო საზღვაო ფორუმი ბათუმში 7-8 სექტემბერს გაიმართა და მას 300-ზე მეტი დელეგატი ესწრებოდა.
