ეკონომიკური პოლიტიკის კომიტეტის სხდომაზე ფინანსთა მინისტრის მოადგილემ მიხეილ დუნდუამ „ლატარიების, აზარტული და მომგებიანი თამაშობების მოწყობის შესახებ" საქართველოს კანონში ცვლილების შეტანის თაობაზე" და „ლიცენზიებისა და ნებართვების შესახებ" საქართველოს კანონში ცვლილების შეტანის თაობაზე" კანონპროექტები პირველი მოსმენით წარადგინა.

მთავრობის საკანონმდებლო ინიციატივის თანახმად, სათამაშო ბიზნესის სფეროში სანებართვო პირობების შეუსრულებლობისთვის დაწესებული ჯარიმები იზრდება.

მინისტრის მოადგილის განცხადებით, კანონპროექტის თანახმად, სანებართვო პირობების დარღვევისთვის განსაზღვრული ჯარიმების გაზრდა სათამაშო ბიზნესის სფეროში დადგენილი რეგულაციების უფრო ეფექტიან დაცვას და კონტროლის მექანიზმების გაძლიერებას უზრუნველყოფს. ცვლილებების მიხედვით, სანებართვო პირობების დარღვევისთვის ადეკვატური და პროპორციული სანქციები დაწესდება. კერძოდ, სამორინეს მოწყობის ნებართვის მფლობელთა მიმართ ჯარიმის ოდენობა 7 000 ლარის ნაცვლად, 20 000 ლარი იქნება; სათამაშო აპარატების სალონის მოწყობის ნებართვის მფლობელთა მიმართ ჯარიმის ოდენობა 1 000 ლარის ნაცვლად, 10 000 ლარი; აზარტული კლუბის მოწყობის ნებართვის მფლობელთა მიმართ ჯარიმის ოდენობა 2 000 ლარის ნაცვლად, 10 000 ლარი; აზარტული ან/და მომგებიანი თამაშების მიწოდების ნებართვის მფლობელთა მიმართ ჯარიმის ოდენობა 2 000 ლარის ნაცვლად, 10 000 ლარით განისაზღვრება, ხოლო სისტემურ-ელექტრონული ფორმით სამორინის, სათამაშო აპარატების და ტოტალიზატორის თამაშობების ორგანიზების ნებართვის მფლობელთა მიმართ დაწესებული ჯარიმის ოდენობა 7 000 ლარის ნაცვლად, 20 000 ლარი გახდება.

სხდომაზე კომიტეტის თავმჯდომარის პირველმა მოადგილემ ირაკლი მეზურნიშვილმა „საჯარო და კერძო თანამშრომლობის შესახებ" საქართველოს კანონში ცვლილების შეტანის შესახებ" კანონპროექტი წარადგინა. ცვლილების თანახმად, საჯარო და კერძო თანამშრომლობის სააგენტოს სახელწოდება - „ინვესტიციების და ექსპორტის სააგენტოს" სახელწოდებით იცვლება. ამასთან, სააგენტო, რომელსაც დამატებითი ფუნქციები მიენიჭება, ეკონომიკისა და მდგრადი განვითარების სამინისტროს დაქვემდებარებაში გადავა. შესაბამისად, სამინისტროს მის განკარგულებაში არსებული ინვესტიციებისა და ექსპორტის მხარდაჭერისთვის განსაზღვრული პროგრამული კოდებით გათვალისწინებული საბიუჯეტო ასიგნებების სააგენტოსთვის გადაცემა დაევალება.

საპარლამენტო უმრავლესობის წევრების მიერ მომზადებული საკანონმდებლო ინიციატივა პარლამენტში დაჩქარებული წესით განიხილება.

ეკონომიკური პოლიტიკის კომიტეტმა განხილული კანონპროექტების პლენარულ სხდომაზე პირველი მოსმენით გატანას მხარი დაუჭირა.