არაბთა გაერთიანებული საამიროები და საქართველო საინვესტიციო პარტნიორობის გაფართოების შესაძლებლობებს განიხილავენ | Economy Middle East სტატიას აქვეყნებს.

სტატიის თანახმად, არაბთა გაერთიანებული საამიროების ეკონომიკისა და ტურიზმის მინისტრი საქართველოს ვიცე-პრემიერს, ეკონომიკისა და მდგრადი განვითარების მინისტრს, მარიამ ქვრივიშვილს შეხვდა. შეხვედრის მიზანი არაბთა გაერთიანებულ საამიროებსა და საქართველოს შორის ეკონომიკური ურთიერთობების გაძლიერების საკითხების განხილვა იყო.

შეხვედრაზე მხარეებმა განიხილეს თანამშრომლობის შესაძლებლობები ახალი ეკონომიკის, ცირკულარული ეკონომიკის, სასურსათო უსაფრთხოების, მდგრადი განვითარებისა და ლოგისტიკის მიმართულებით. ასევე იმსჯელეს ორ ქვეყანას შორის ეკონომიკური პარტნიორობის გაფართოების ახალ შესაძლებლობებზე.
არაბთა გაერთიანებული საამიროები საქართველოსთან საინვესტიციო შესაძლებლობების გაფართოებას გეგმავს.

დუბაიში, არაბთა გაერთიანებული საამიროების ეკონომიკისა და ტურიზმის სამინისტროს სათავო ოფისში გამართულ ორმხრივ შეხვედრაზე აბდულა ბინ ტუკ ალ მარიმ აღნიშნა, რომ ქვეყანა აგრძელებს გლობალური ეკონომიკური პარტნიორის პოზიციების განმტკიცებას. ეს ხორციელდება ეკონომიკური საკანონმდებლო და ინსტიტუციური გარემოს განვითარებით, საერთაშორისო პარტნიორობების გაფართოებითა და კონკურენტული ბიზნესგარემოს ხელშეწყობით, რაც ხელს უწყობს ინვესტიციებსა და ინოვაციებს, ეკონომიკის დივერსიფიკაციასა და კერძო სექტორის კონკურენტუნარიანობის ზრდას.

მინისტრმა ხაზი გაუსვა არაბთა გაერთიანებული საამიროების მზადყოფნას, გააძლიეროს ეკონომიკური ურთიერთობები საქართველოსთან საინვესტიციო შესაძლებლობების გაფართოების, პრიორიტეტულ სექტორებში თანამშრომლობის დივერსიფიკაციისა და ერთობლივი პროექტების განვითარების გზით, რომლებიც ორივე ქვეყნის ეკონომიკისთვის დამატებით ღირებულებას შექმნის.

შეხვედრაზე ასევე განიხილეს ორ ქვეყანას შორის საინვესტიციო ნაკადების ზრდისა და ერთობლივი პროექტების განხორციელების შესაძლებლობები, კერძო სექტორის დონეზე დიალოგის გაძლიერება და პერსპექტიულ ეკონომიკურ სექტორებში არსებული შესაძლებლობების შესახებ ინფორმაციის გაცვლა.

არაბთა გაერთიანებული საამიროები და საქართველო ტურიზმის სფეროში თანამშრომლობის შესაძლებლობებს განიხილავენ.

გარდა ამისა, მხარეებმა ტურიზმისა და სტუმარმასპინძლობის სფეროებში თანამშრომლობის პერსპექტივებიც განიხილეს. განსაკუთრებული ყურადღება დაეთმო ინვესტიციების გაფართოებას, ტურისტული და სასტუმრო პროექტების განვითარებას, ტურისტული მიმართულებების მართვის სფეროში გამოცდილებისა და ექსპერტიზის გაზიარებას, ტურისტული დანიშნულების ადგილების მიმზიდველობის გაზრდას, ასევე სექტორში მოქმედ ორგანიზაციებსა და კომპანიებს შორის პარტნიორობის წახალისებას.

ამასთან, სტატიაში აღნიშნულია, რომ არაბთა გაერთიანებული საამიროები და საქართველო ცირკულარული ეკონომიკის მიმართულებით თანამშრომლობის შესაძლებლობებს განიხილავენ.

მდგრადი განვითარების მიმართულებით მხარეებმა ცირკულარული ეკონომიკის პრინციპებზე დაფუძნებული გადაწყვეტილებებისა და ინიციატივების ფარგლებში თანამშრომლობის შესაძლებლობები განიხილეს. ყურადღება გამახვილდა რესურსების გამოყენების ეფექტიანობის ზრდაზე, გადამუშავების მასშტაბების გაფართოებასა და წარმოებისა და მოხმარების უფრო მდგრადი პრაქტიკის განვითარებაზე.

მინისტრებმა აღნიშნეს, რომ ცირკულარული ეკონომიკის მოდელებზე გადასვლა ორივე ქვეყნის კომპანიებისა და კერძო სექტორისთვის მდგრადი პარტნიორობის, ინოვაციებისა და ცოდნის გაზიარების უფრო ფართო შესაძლებლობებს ქმნის.