ინფრასტრუქტურის მშენებელთა ასოციაციის აღმასრულებელი დირექტორის, ირაკლი გიორგობიანის განცხადებით, ეკონომიკური ფორუმის 30-ე საიუბილეო ფორუმზე ინფრასტრუქტურისა და სამშენებლო სექტორისადმი მიძღვნილმა პანელმა განსაკუთრებული ინტერესი გამოიწვია, რაც როგორც დისკუსიის ხანგრძლივობით, ისე აუდიტორიის აქტიური ჩართულობით გამოიხატა. მისი თქმით, სექტორის მიმართ მზარდი ყურადღება და ხელისუფლებასთან მიმდინარე აქტიური დიალოგი ინფრასტრუქტურული მიმართულების მნიშვნელობას კიდევ ერთხელ ადასტურებს.

„ნამდვილად სასიხარულოა, რომ 30-ე საიუბილეო ეკონომიკური ფორუმის თემად ინფრასტრუქტურული და სამშენებლო სექტორი შეირჩა. პანელის წევრებისა და დამსწრე საზოგადოების მაღალი ინტერესიდან გამომდინარე, დისკუსია ნამდვილად საინტერესო აღმოჩნდა და, თავად ამ სექტორის მნიშვნელობის გათვალისწინებით, საკმაოდ დიდხანს გასტანა. მსჯელობა იმდენად დიდხანს გაგრძელდა, რომ შეიძლება ითქვას, სარეკორდოც კი იყო. დამსწრე საზოგადოებაც საოცრად აქტიურად ჩაერთო კითხვა-პასუხის რეჟიმში, რასაც ჩვენ, ცალსახად, ძალიან პოზიტიურად ვაფასებთ.

მოგეხსენებათ, ინფრასტრუქტურის მშენებელთა ასოციაცია ერთ-ერთი ყველაზე მსხვილი სექტორული გაერთიანებაა. ჩვენთვის ორმაგად სასიხარულო და მნიშვნელოვანია ის ფაქტი, რომ ბოლო პერიოდში მთავრობის მხრიდან ამ სექტორს განსაკუთრებული ყურადღება ექცევა და სხვადასხვა საკითხზე მუდმივად აქტიური დისკუსიები გვაქვს“, - აღნიშნა ინფრასტრუქტურის მშენებელთა ასოციაციის აღმასრულებელმა დირექტორმა.

ირაკლი გიორგობიანის განცხადებით, ინფრასტრუქტურის სამინისტროს მიერ მიმდინარე წლისთვის დაგეგმილი 3.5 მილიარდი ლარის ბიუჯეტის ეფექტიანი ათვისება სექტორის განვითარებისთვის გადამწყვეტ მნიშვნელობას ატარებს.

„ინფრასტრუქტურის სამინისტროს საკმაოდ ამბიციური გეგმა აქვს. როგორც მინისტრმა აღნიშნა, დაახლოებით 3,5 მლრდ ლარამდე არის მიმდინარე წლის ბიუჯეტი. ბიუჯეტის რეალიზება კრიტიკულად მნიშვნელოვანი არის სექტორისთვის და მნიშვნელოვანი ამბიციური პროექტები არის დაგეგმილი როგორც სამოქალაქო მიმართულებით, ასევე საგზაო და საგზაო ინფრასტრუქტურის განვითარების კუთხით და ცალსახად მნიშვნელოვანია, რომ  გეგმების რეალიზება კოორდინაციაში იყოს კერძო სექტორთან და განსაკუთრებით ადგილობრივ კომპანიებთან, რამე თუ დროულად მოხდეს იმ რესურსების მობილიზება, რაც არის საჭირო იმ ამოცანების მისაღწევად, რომელიც ინფრასტრუქტურის სამინისტროს აქვს როგორც ერთ-ერთ მსხვილ კაპიტალური ინვესტიციების განმახორციელებელ სამინისტროს. მოგეხსენებათ, რომ დღეს სამინისტროსთვის კრიტიკულად მნიშვნელოვანი გახდა ხარისხის კომპონენტი და ამ მიზნის მისაღწევად მნიშვნელოვანი იყო, რომ ბევრი რეფორმა განხორციელებულიყო ამბიციური მათ შორის ფასწარმოქმნის ნაწილში, რამეთუ ერთ-ერთი მნიშვნელოვანი ფაქტორი არის ფასი, რომელმაც უნდა უზრუნველყოს ხარისხი. ბოლო პერიოდში სექტორში ხარისხი ნაკლებად იყო პრიორიტეტი, აქცენტი უფრო ფასზე გადადიოდა და გვქონდა განცდა, რომ იაფად რაღაც ხარისხიანს ვიყიდდით. მაგრამ ცალსახად მივესალმებით იმას, რომ სახელმწიფომ მნიშვნელოვანი აქცენტი გადაიტანა ხარისხზე. ვფიქრობთ, ეს თავის მხრივ ხელისშემწყობი ფაქტორი იქნება იმისთვის, რომ დასახული მიზნების მიღწევის დროს მაქსიმალურად იმპლემენტირდეს თანამედროვე ტექნოლოგიები და საინჟინრო ინოვაციები“, - განაცხადა ირაკლი გიორგობიანმა.