ჩინეთში სამუშაო ვიზიტის ფარგლებში, თამარ იოსელიანი შანხაის პორტის ოპერატორი კომპანიის - Shanghai International Port Group-ის (SIPG) ვიცე-პრეზიდენტს ჟენ ჟუეის შეხვდა
ჩინეთში სამუშაო ვიზიტის ფარგლებში, საქართველოს ეკონომიკისა და მდგრადი განვითარების მინისტრის მოადგილე თამარ იოსელიანი, შანხაის პორტის ოპერატორი კომპანიის - Shanghai International Port Group-ის (SIPG) ვიცე-პრეზიდენტს ჟენ ჟუეის შეხვდა.
თამარ იოსელიანი შანხაის პორტის ოპერირების თანამედროვე სისტემებს, ტვირთების გადამუშავებისა და მართვის, ასევე საპორტო ინფრასტრუქტურისა და ლოგისტიკური სერვისების ურთიერთკავშირსა და კოორდინაციის პროცესებს გაეცნო.
მინისტრის მოადგილის განცხადებით, შანხაის პორტი მსოფლიოში ყველაზე დატვირთული საკონტეინერო პორტი და საერთაშორისო ვაჭრობის ერთ-ერთი უმნიშვნელოვანესი ლოგისტიკური ცენტრია, რომელიც თანამედროვე ტექნოლოგიებით, ეფექტიანი საოპერაციო სისტემებითა და საპორტო ინფრასტრუქტურის მართვის მაღალი სტანდარტებით გამოირჩევა.
მისივე თქმით, შანხაის პორტის გამოცდილების გაცნობა მნიშვნელოვანია საქართველოს საპორტო სექტორის განვითარების, საოპერაციო ეფექტიანობის ამაღლებისა და თანამედროვე მართვის პრაქტიკის დანერგვის თვალსაზრისით.
შეხვედრაზე განსაკუთრებული ყურადღება დაეთმო შუა დერეფნის განვითარების პერსპექტივებს და საქართველოს, როგორც აზიასა და ევროპას შორის მნიშვნელოვანი სატრანსპორტო-ლოგისტიკური დამაკავშირებელი რგოლის, როლის გაძლიერებას.
შეხვედრაში საქართველოს რკინიგზის გენერალური დირექტორი ლაშა აბაშიძე მონაწილეობდა.
სხვა სიახლეები
საგანმანათლებლო სივრცის პროექტის ფარგლებში, ეროვნულ ბანკში არასაბანკო სექტორისთვის სამუშაო შეხვედრა შეხვედრა სახელწოდებით - „არასაბანკო სექტორის მდგრადობა: გამჭვირვალობა და ანგარიშგება“ გაიმართა
04.11.2026.18:18
საგანმანათლებლო სივრცის პროექტის ფარგლებში, ეროვნულ ბანკში არასაბანკო სექტორისთვის სამუშაო შეხვედრა შეხვედრა სახელწოდებით - „არასაბანკო სექტორის მდგრადობა: გამჭვირვალობა და ანგარიშგება“ გაიმართა.
შეხვედრებზე სებ-მა ანგარიშგების მიმართულებით განახლებული მოთხოვნები წარადგინა, რომელიც საოპერაციო საქმიანობის ანგარიშგების სტანდარტების გაუმჯობესებასა და გამჭვირვალობას უზრუნველყოფს.
მონაწილეები გაეცნენ ფინანსური ანგარიშგების შევსებისა და ელექტრონული პორტალის გამოყენების განახლებულ ინსტრუქციას. განსაკუთრებული ყურადღება დაეთმო ფულის გათეთრებასთან ბრძოლისა და მომხმარებელთა უფლებების დაცვის საკითხებს.
სემინარები ინტერაქტიულ ფორმატში წარიმართა. მონაწილეებს შესაძლებლობა ჰქონდათ გაეზიარებინათ თავიანთი გამოცდილება, ემსჯელათ არასაბანკო სექტორის გამოწვევებსა და საჭიროებებზე, ასევე რეგულარული საგანმანათლებლო შეხვედრების აუცილებლობაზე.
შეხვედრებს თბილისის 120-ზე მეტი ვალუტის გადამცვლელი პუნქტის წარმომადგენელი და სესხის გამცემი სუბიექტი დაესწრო. შეხვედრებში ასევე მონაწილეობდნენ საქართველოს ვალუტის გადამცვლელთა ასოციაციის წარმომადგენლები. ღონისძიების დასასრულს, მონაწილეებს სერტიფიკატები გადაეცათ.
საინფორმაციო შეხვედრების წლევანდელმა სერიამ დედაქალაქსა და რეგიონებში ჯამში 300-ზე მეტი არასაბანკო სექტორის სუბიექტი მოიცვა. აღსანიშნია, რომ მსგავსი შეხვედრები ქვეყნის მასშტაბით ბოლო სამი წელია ტარდება და მასში მონაწილეთა რაოდენობა ყოველწლიურად მზარდია.
დღეის მდგომარეობით, ჩვენ მეტი განახლებადი რესურსი გვაქვს, ვიდრე ევროპის ქვეყნებს - მარიამ ჩახვაშვილი
04.11.2026.13:18
მარიამ ქვრივიშვილი, ჩინეთის სახალხო რესპუბლიკაში სამუშაო ვიზიტის ფარგლებში, მსხვილი ჩინური სავაჭრო ქსელის, HotMaxx-ის თანადამფუძნებელს ჭანგ ნინგს შეხვდა
04.11.2026.11:49
