ჩვენ დავიწყეთ ცვლილებები და კვლავ განვაგრძობთ საჭიროებებზე ადეკვატურ რეაგირებას - რევაზ სოხაძე
„მთავრობის მიერ მომზადებული ინფრასტრუქტურული პროექტების მარეგულირებელი ნორმების ცვლილებათა პაკეტი, სექტორში პასუხისმგებლობიანი და მდგრადი გარემოს შექმნას ისახავს მიზნად“, - განაცხადა ინფრასტრუქტურის მინისტრმა რევაზ სოხაძემ სამშენებლო კომპანიებისა და კომერციული ბანკების წარმომადგენლებთან გამართულ შეხვედრაზე.
მინისტრმა აღნიშნა, რომ სახელმწიფო ბიზნესის წარმომადგენლებთან აქტიურ კომუნიკაციას და არსებულ გამოწვევებზე ჯანსაღ რეაგირებას განაგრძობს.
რევაზ სოხაძემ ასევე განაცხადა, რომ უახლოეს პერიოდში სახელმწიფო ახალ საბაზრო ფასებს გამოაქვეყნებს, რომლითაც ინფრასტრუქტურული პროექტების შესყიდვები გაგრძელდება.
„ჩვენ ყველანი მზად ვართ ჯანსაღი გადაწყვეტილებისთვის. იმისთვის, რაც მომგებიანს და ლიკვიდურს გახდის ამ დარგს. ბოლო პერიოდში მნიშვნელოვანი ნაბიჯები გადაიდგა არსებული პრობლემების გადასაჭრელად და იმ ე.წ მანკიერი წრის დასაძლევად, რაც, საბოლოოდ სახელმწიფოს ინტერესს აზიანებდა“, -აღნიშნა მინისტრმა.
კონტრაქტორებთან დაკავშირებით რევაზ სოხაძემ განმარტა, რომ ვალდებულებების დარღვევის შემთხვევაში მათთან თანამშრომლობა და კონტრაქტი მყისიერად შეწყდება, თუმცა, კეთილსინდისიერ კონტრაქტორებს მთავრობა მაქსიმალურად ხელს შეუწყობს, მათ შორის მიმდინარეობს მუშაობა ბიუროკრატიული პროცედურების გამარტივების მიმართულებით.
მინისტრმა უწყების მიერ განსახორციელებელ მასშტაბურ პროექტებზე საუბრისას აღნიშნა, რომ დაგეგმილია არაერთი მნიშვნელოვანი პროექტის განხორციელება, მათ შორის ასობით სკოლის მშენებლობა, საგზაო ინფრასტრუქტურის განვითარება, წყალმომარაგების სისტემის გაუმჯობესება და ინფრასტრუქტურის კომპლექსური მოწესრიგება.
„ეს არ არის დასასრული - ჩვენ დავიწყეთ ცვლილებები და განვაგრძობთ გამოკვეთილ საჭიროებებზე ადეკვატურ რეაგირებას“, -განაცხადა რევაზ სოხაძემ.
სამშენებლო კომპანიებისა და კომერციული ბანკების წარმომადგენლებთან გამართულ შეხვედრა, რომელსაც პრემიერ-მინისტრი ირაკლი კობახიძე ესწრებოდა, ინტერაქტიურ ფორმატში წარიმართა.
დღის ტოპ 10 სიახლე
სხვა სიახლეები
მნიშვნელოვანია, რომ კომპანია „ჰანიველ პარტნერსი“ სრულიად არის გაქართულებული, ადგილობრივი ჯგუფი მართავს ამ კომპანიას, რამაც მოგვცა უზარმაზარი წინსვლა და ის გზა, რომელიც ჩვენ გავიარეთ, არის ზუსტად ამის შედეგი - ირაკლი რუხაძე
15.05.2026.15:15
მნიშვნელოვანია, რომ კომპანია „ჰანიველ პარტნერსი“ სრულიად არის გაქართულებული, ადგილობრივი ჯგუფი მართავს ამ კომპანიას, რამაც მოგვცა უზარმაზარი წინსვლა და ის გზა, რომელიც ჩვენ გავიარეთ, არის ზუსტად ამის შედეგი, - განაცხადა კომპანია „ჰანიველ პარტნერსის“ მმართველმა პარტნიორმა ირაკლი რუხაძემ კასპის ქარხანაში ახალი 70 მილიონი აშშ დოლარის ღირებულების საინვესტიციო პროექტის დაწყების ცერემონიაზე.
მისივე თქმით, კომპანია აგრძელებს ზრდას და მათი მიზანია, საქართველოს განვითარებისთვის დაგეგმილ მნიშვნელოვან პროექტებში წვლილის შეტანა.
„ბატონო პრემიერო, ქალბატონო მინისტრო, ძალიან დიდი მადლობა, რომ გვეწვიეთ დღეს. ჩვენთვის ძალიან მნიშვნელოვანი დღეა. მე ამაყი ვარ, რომ ვარ ამ წარმოუდგენლად წარმატებული კომპანიის ნაწილი. ჩემი კომპანია და თანადაფინანსების ფონდი დაახლოებით, 8-9 წლის წინ შემოვიდა ამ კომპანიაში, გავხდით თანამფლობელები და ამ დროის განმავლობაში მოვახერხეთ 200 მილიონ დოლარზე მეტი დაგვებანდებინა ამ კომპანიის განვითარებაში. შევქმენით დამატებითი სამუშაო ადგილები, გვქონდა უპრეცედენტო ზრდა, გავაკეთეთ ახალი ინოვაციური პროექტები, მაგალითად ამ ხაზს, რომელსაც ხედავთ, ის დღეს საქართველოში გადაყრილი საბურავების დაახლოებით 10 პროცენტს ამუშავებს და ამას ყველაფერს ჩვენ კიდევ უფრო გავზრდით. ეს ყველაფერი ხდება, რა თქმა უნდა, ეკოლოგიურად სუფთა გზით.
რაც მთავარია, ეს კომპანია სრულებით გაქართულდა. რას ნიშნავს ეს, რომ ჩვენ გვყავს გენერალური დირექტორი, რომელიც არის ქართველი, დათო ჯუღაშვილი და მე თუ მკითხავთ, ამ გაქართულებამ და იმის შესაძლებლობამ, რომ ადგილობრივი ჯგუფი მართავს ამ კომპანიას, მოგვცა უზარმაზარი წინსვლა და ის გზა, რომელიც ჩვენ გავიარეთ, არის ზუსტად ამის შედეგი.
ჩვენ ველოდებით, რომ საქართველო გააგრძელებს განვითარებას. ის პროექტები, რომელიც ალბათ ყველაზე საინტერესოა ჩვენი ქვეყნის მომავლისთვის, ჯერ კიდევ არ მომხდარა - პორტები, ჰიდროელექტროსადგურები, ახალი აეროპორტი, პროექტები, რომელზეც ბევრი საუბარი მიდის და იმედი გვაქვს, რომ მალე დაიწყება. ამისთვის ვემზადებით ჩვენ, რომ მივაწოდოთ ის ცემენტი და ბეტონი, რომელიც ამ პროექტებს დასჭირდება. ამიტომ, ჩვენ ვამატებთ არა მხოლოდ კლინკერის წარმოებას, ჩვენ ქვეყანაში კლინკერის ერთადერთი მწარმოებლები ვართ, არამედ ასევე წისქვილის მოცულობებსაც. ჩვენ გავზრდით წისქვილის მოცულობებს, როგორც აღმოსავლეთ, ისევე დასავლეთ საქართველოში. მინდა წარმატება ვუსურვო ამ კომპანიას. უღრმესი მადლობა გადავუხადო ჩვენს თანამშრომლებს იმიტომ, რომ ამ კომპანიის სიძლიერე დგას მათზე და სწორედ მათ გამოა, რომ ამდენი ხალხი დაინტერესებულია ამ კომპანიით. ახლა სტუმრებს შორის არიან მსოფლიოში ყველაზე დიდი ცემენტის მწარმოებელი კომპანიის წარმომადგენლები, რომლებსაც აინტერესებთ, რომ ჩვენი თანამფლობელები გახდნენ და ეს თუ მოხდა კიდევ უფრო სხვა დონეზე გადაგვიყვანს ჩვენ, როგორც კომპანიას“, - აღნიშნა რუხაძემ.
