ჩვენ ვმუშაობთ, რათა შევქმნათ სისტემა, რომელიც იქნება უფრო უსაფრთხო, დივერსიფიცირებული, კონკურენტული, მდგრადი და, რაც მთავარია, მეტად დაკავშირებული როგორც რეგიონულ, ისე საერთაშორისო ენერგეტიკულ სივრცესთან - ინგა ფხალაძე
„ჩვენ ვმუშაობთ, რათა შევქმნათ სისტემა, რომელიც იქნება უფრო უსაფრთხო, დივერსიფიცირებული, კონკურენტული, მდგრადი და, რაც მთავარია, მეტად დაკავშირებული როგორც რეგიონულ, ისე საერთაშორისო ენერგეტიკულ სივრცესთან", - განაცხადა ეკონომიკისა და მდგრადი განვითარების მინისტრის მოადგილე ინგა ფხალაძემ ენერგეტიკის რეგულირების შესახებ მე-9 მსოფლიო ფორუმის გახსნის ღონისძიებაზე სიტყვით გამოსვლისას.
როგორც მინისტრის მოადგილემ აღნიშნა, ფორუმი საქართველოში პირველად ტარდება, რაც კიდევ უფრო მნიშვნელოვანია იმ ფონზე, რომ დღეს საქართველოს წინაშე სტრატეგიული მნიშვნელობის ენერგეტიკული ამოცანები დგას. ამასთან, ინგა ფხალაძის შეფასებით, მნიშვნელოვანია, რომ ასეთი ღონისძიებები გულისხმობს არა მხოლოდ საუბარს ენერგეტიკის გამოწვევებსა და მომავალზე, არამედ საფუძველს უყრის იმ წესების, ინსტიტუტებისა და გადაწყვეტილებების ჩამოყალიბებას, რომლებიც ენერგეტიკულ მომავალს ქმნიან.
„ამ პროცესში კი, ცხადია, ფუნდამენტურია რეგულირების როლი. ენერგეტიკული ტრანსფორმაცია დღეს უკვე აღარ არის მხოლოდ ტექნოლოგიური ცვლილებების ერთობლიობა. განახლებადი ენერგიის სწრაფი განვითარება, ელექტროენერგიის ბაზრების ინტეგრაცია, ენერგიის შემნახველი სისტემები, კიბერუსაფრთხოება, კლიმატის ცვლილება და ხელოვნური ინტელექტი - ეს ყველაფერი ერთად ქმნის ახალ ტექნოლოგიურ, სოციალურ და ეკონომიკურ რეალობას", - აღნიშნა მინისტრის მოადგილემ.
სიტყვით გამოსვლისას ინგა ფხალაძემ ისაუბრა არსებულ რეალობაში მარეგულირებელი ორგანოების როლსა და ენერგეტიკის სექტორის დამოუკიდებელი და პროფესიონალური რეგულირების მნიშვნელობაზე.
„ნამდვილი ტრანსფორმაცია მხოლოდ მაშინ ხდება შესაძლებელი, როდესაც ახალი სიმძლავრეები დაკავშირებულია ძლიერ ქსელთან, ინვესტიციები - პროგნოზირებად წესებთან, ბაზრის განვითარება - სამართლიან კონკურენციასთან, ხოლო ენერგეტიკული პოლიტიკა - მომხმარებლის ინტერესებთან, რაც დამოუკიდებელი და პროფესიონალური რეგულირების გარეშე შეუძლებელია", - განაცხადა მინისტრის მოადგილემ.
ენერგეტიკის რეგულირების შესახებ მე-9 მსოფლიო ფორუმი თბილისში სემეკის ორგანიზებით იმართება - ევროპისა და სხვადასხვა ქვეყნის ენერგეტიკული გაერთიანების, ასოციაციების წევრი ქვეყნების წარმომადგენლების, სამთავრობო უწყებების, ენერგეტიკული და დონორი ორგანიზაციების პირველი პირების მონაწილეობით.
სხვა სიახლეები
აშშ-ში ინფლაცია კვლავ ზედმეტად მაღალია - FED-ის წარმომადგენელი
22.09.2026.15:00
მინეაპოლისის ფედერალური სარეზერვო ბანკის პრეზიდენტმა ნილ კაშკარიმ კვირას განაცხადა, რომ აშშ-ის ეკონომიკის ყველა სექტორში ინფლაცია კვლავ ზედმეტად მაღალია და პრობლემა მხოლოდ ნავთობის ფასების ზრდას არ უკავშირდება.
„ენერგიის ფასებს, რომლებიც საკმაოდ მერყეობს, თუ გამოვაკლებთ, და საკვებსაც გამოვაკლებთ თუმცა მათ დიდი მნიშვნელობა აქვს ეკონომიკის სამომავლო მიმართულების თვალსაზრისით, ინფლაცია მაინც ზედმეტად მაღალია“, - განაცხადა კაშკარიმ.
კაშკარიმ მხარი დაუჭირა გასულ კვირას მიღებულ გადაწყვეტილებას, რომლის შედეგადაც საპროცენტო განაკვეთი 0.25 პროცენტული პუნქტით, 3.75%-4.00%-მდე გაიზარდა.
ის ფედერალური რეზერვის წინა სხდომაზე იმ სამ წარმომადგენელს შორის იყო, რომლებიც განაკვეთის ზრდას უჭერდნენ მხარს, მაშინ როდესაც ფედერალური ღია ბაზრის კომიტეტის (FOMC) უმრავლესობამ განაკვეთის უცვლელად დატოვება გადაწყვიტა.
განაკვეთის ზრდასთან ერთად გამოქვეყნებულმა პროგნოზებმა აჩვენა, რომ ფედერალური რეზერვის მხოლოდ ორი წარმომადგენლის გარდა, ყველა სხვა წევრი წელს საპროცენტო განაკვეთის მინიმუმ კიდევ ერთი, 0.25 პროცენტული პუნქტით ზრდას ელოდება.
საპროცენტო განაკვეთების ფიუჩერსების ბაზარი დაახლოებით ორი მესამედის ალბათობას აფასებს, რომ ფედერალური რეზერვის საბაზისო განაკვეთი 2026 წლის ბოლოს 4.00% - 4.25%-ის ფარგლებში იქნება. ამასთან, მაღალია იმის ალბათობაც, რომ 2027 წლის შუა პერიოდისთვის განაკვეთი ამ ნიშნულზე კიდევ მინიმუმ 0.25 პროცენტული პუნქტით გაიზრდება.
