საქართველოს ეკონომიკის განვითარების კორპორაციის გენერალური დირექტორის, ირაკლი გაბრიაძის განცხადებით, კორპორაციის პორტფელში ბიზნესის დაფინანსების მიმართულება კვლავ ერთ-ერთ ყველაზე აქტიურ კომპონენტად რჩება. მისი თქმით, სესხის პროცენტის სუბსიდირების პროგრამის ფარგლებში უკვე 3 500-ზე მეტი პროექტი დაფინანსდა, მხარდაჭერა მიიღო 2 000-ზე მეტმა ბენეფიციარმა, ხოლო განხორციელებული ინვესტიციების ჯამურმა მოცულობამ დაახლოებით 6 მილიარდ ლარს მიაღწია.

„ჩვენი პროგრამების ფარგლებში კვლავ საკმაოდ აქტიურია ბიზნესსესხების მიმართულება. ჩვენს პორტფელში არსებული ყველაზე დიდხნიანი პროგრამა სესხის პროცენტის სუბსიდირებას გულისხმობს, რომლის ფარგლებშიც უკვე 3 500-ზე მეტი პროექტი დაფინანსდა, ბენეფიციართა რაოდენობა 2 000-ს აჭარბებს, ხოლო განხორციელებული ინვესტიციების მოცულობამ დაახლოებით 6 მილიარდ ლარს მიაღწია.

ასევე საინტერესოა ჩვენი საკრედიტო-საგარანტიო სქემა. აქაც, 2 000-ზე მეტი სესხი გვყავს მხარდაჭერილი და სესხების მოცულობა ამ პროგრამაში 1.5 მილიარდ ლარამდეა. ჩვენ ამ პროგრამის ფარგლებში მხარს ვუჭერთ კომპანიებს გარანტიის მექანიზმით - 80%-ის გარანტორი ამ პროგრამაში სესხზე სახელმწიფოა. და ძალიან წარმატებით მუშაობს ეს მრავალ სექტორში, იქ სადაც განსაკუთრებით არსებობს უზრუნველყოფის პრობლემა.

ასევე აღსანიშნავია და გამოვყოფდი მცირე სესხების პროგრამას, მიკრო სესხების პროგრამას, რომელიც არის 20-დან 50 ათას ლარამდე პროგრამა, რომელიც შეიქმნა სააგენტოში, სააგენტოსვე დიზაინით. და ამ პროგრამის ფარგლებში 1 700-ზე მეტი ბენეფიციარი გვყავს უკვე დაფინანსებული და ბენეფიციარებს საშუალება აქვთ, რომ 50 ათას ლარამდე სესხი უპროცენტოდ აიღონ საქართველოს მასშტაბით. და ისარგებლონ ასევე 80 პროცენტიანი გარანტიით. გვაქვს ასევე ქეშბექ მექანიზმები და ასე შემდეგ, რაც ძალიან კარგ საფუძველს ქმნის იმისათვის, რომ სტარტაპებზე გაიცეს აღნიშნული სესხები და გვყავს ძალიან საინტერესო ბენეფიციარები მრავალ სხვადასხვა სექტორში“, - განმარტა ირაკლი გაბრიაძემ.

მისივე თქმით, საქართველოს ეკონომიკის განვითარების კორპორაციის მიზანია მხარდაჭერის მექანიზმები ბიზნესის ყველა სეგმენტსა და განვითარების ყველა ეტაპზე მყოფ კომპანიას შესთავაზოს. კორპორაციის ხელმძღვანელის განმარტებით, მიკრობიზნესისთვის უკვე მოქმედებს მიკროსესხების პროგრამა, რომლის გაფართოება და ლიმიტების გაზრდაც იგეგმება, ხოლო წარმატებული ბენეფიციარები დამატებით მხარდაჭერას მიიღებენ განვითარების შემდეგ ეტაპზე გადასასვლელად. საშუალო ბიზნესისთვის ხელმისაწვდომი იქნება სესხის პროცენტის სუბსიდირების, საკრედიტო-საგარანტიო და ექსპორტის მხარდაჭერის მექანიზმები, ხოლო შედარებით მსხვილი კომპანიები კაპიტალის ბაზრებსა და საინვესტიციო ფონდების განვითარების პროგრამებზე წვდომას მიიღებენ.

„ჩვენი ამბიცია და ხედვაა, რომ ყველა ტიპის ბიზნესს შევთავაზოთ მხარდაჭერის მექანიზმები და ყველა ტიპის, ყველა განვითარების ეტაპზე მყოფ ბიზნესს შევთავაზოთ მხარდაჭერის მექანიზმები. მიკრო სესხების მიმართულებით უკვე გვაქვს პროგრამა და მომავალში ვგეგმავთ აღნიშნული პროგრამის გაფართოებას, ვგეგმავთ ლიმიტების გაზრდას და ვგეგმავთ ასევე, რომ ჩვენს წარმატებულ ბენეფიციარებს აღნიშნულ პროგრამაში შევთავაზოთ მეორე ნაბიჯის გადადგმაში მხარდაჭერა, რაც იმედი გვაქვს, რომ მათ ზრდას დაეხმარება.

რაც შეეხება საშუალო ტიპის ბიზნესისთვის, უკვე მცირე და საშუალო ტიპის ბიზნესისთვის, რომელიც აღარ არის დამწყებ ეტაპზე, იქ გვაქვს სესხის პროცენტის სუბსიდირების პროგრამა, იქ გვაქვს საკრედიტო-საგარანტიო მექანიზმები, იქ გვაქვს ტექნიკური დახმარების არაერთი პროგრამა, იქ გვექნება ექსპორტის მხარდაჭერის ახალი მექანიზმები, რომლებიც მრავალ ასპექტს დაფარავენ.

და ცოტა უფრო მსხვილი ბიზნესისთვის უკვე გვაქვს კაპიტალის ბაზრებზე წვდომის მხარდაჭერის პროგრამა და ასევე ფონდების განვითარების, საინვესტიციო ფონდების განვითარების პროგრამა მათ ინტერესებს მოემსახურება უფრო მეტად. ანუ ყველა, განვითარების ყველა ეტაპზე მყოფ ბიზნესებს დავეხმარებით კორპორაციიდან ახალი ან განახლებული მექანიზმით, რომელიც იქნება კორპორაციის პორტფელში“, - აღნიშნა ირაკლი გაბრიაძემ.