9.3%-იანი საშუალო ეკონომიკური ზრდა, 7 მილიარდ აშშ დოლარამდე გაზრდილი რეზერვები და შპ-სთან მიმართებით 35%-იანი საგარეო ვალის მაჩვენებელი საქართველოს ეკონომიკური სტაბილურობის მნიშვნელოვან საფუძველს წარმოადგენს. ეკონომიკური პოლიტიკის კომიტეტის თავმჯდომარის, შოთა ბერიკაშვილის განცხადებით, ქვეყნის ეკონომიკის წინა ხაზს ტრანსპორტი და ლოგისტიკა, ენერგეტიკა, მშენებლობა და დეველოპმენტი, ტურიზმი და IT წარმოადგენს, სადაც ხელოვნური ინტელექტის  ელემენტების ინტეგრაცია პროდუქტიულობას კიდევ უფრო ზრდის.

„მინდა აღვნიშნო, რომ ბოლო ხუთი წლის განმავლობაში საქართველომ მნიშვნელოვანი ეკონომიკური ზრდა აჩვენა და არსებით პროგრესს მიაღწია. ბოლო ხუთი წლის განმავლობბაში რეალური ეკონომიკის საშუალო წლიურმა ზრდამ 9.3% შეადგინა. ეს იმას ნიშნავს, რომ თუ ხუთი წლის წინ ერთ სულ მოსახლეზე შემოსავალი საქართველოში 4 200 აშშ დოლარი იყო, 2025 წლის ბოლოს ამ მაჩვენებელმა 10 200 აშშ დოლარს მიაღწია. მიმდინარე წლის პირველი კვარტალიც საკმაოდ შთამბეჭდავი აღმოჩნდა - რეალური ეკონომიკის ზრდამ 9.1% შეადგინა.

რას ნიშნავს ეს ყველაფერი ჩვენი მოსახლეობისთვის? პირველ რიგში, ქვეყანაში იქმნება ახალი სამუშაო ადგილები და ვითარდება ეკონომიკის წამყვანი მიმართულებები. ჩვენ არაერთხელ გვისაუბრია იმაზე, თუ რა წარმოადგენს ჩვენი ეკონომიკის წინა ხაზს. ესაა ტრანსპორტი და ლოგისტიკა, ენერგეტიკა, მშენებლობა და დეველოპმენტი, ტურიზმი და IT. განსაკუთრებით საინტერესოა ამ სექტორებში ხელოვნური ინტელექტის (AI) ელემენტების გამოყენება, რაც თითოეულ სფეროს უფრო ეფექტურსა და პროდუქტიულს ხდის. ხოლო ამ ყველაფრის საიმედო ზურგს ძლიერი ფინანსური და განათლების სისტემები წარმოადგენს.

აქვე უნდა აღინიშნოს, რომ დღეის მდგომარეობით საქართველოს ერთ-ერთი ყველაზე დაბალი საგარეო ვალის მაჩვენებელი აქვს - საგარეო ვალი მთლიან შიდა პროდუქტთან (მშპ) მიმართებით 35%-ს შეადგენს. ამასთანავე, ქვეყნის საერთაშორისო რეზერვებმა რეკორდულ მაჩვენებელს, 7 მილიარდ აშშ დოლარს მიაღწია, ხოლო მიმდინარე ანგარიშის დეფიციტი საკმაოდ დაბალი - დაახლოებით 2.6%-ია მშპ-თან მიმართებით.  ეს მაჩვენებლები ქვეყნის ეკონომიკური განვითარების უფრო სტაბილურ საფუძველს ქმნის და გვაძლევს შესაძლებლობას, შევინარჩუნოთ მაღალი ეკონომიკური ზრდის ტემპი.

საერთაშორისო სავალუტო ფონდის პროგნოზით, მომდევნო ოთხი წლის განმავლობაში საქართველოს რეალური ეკონომიკა 6.5%-ით გაიზრდება. თუ ქვეყანა სწორი მიმართულებით, რეფორმებითა და გააზრებული ნაბიჯებით გააგრძელებს განვითარებას, შესაძლებელი იქნება უახლოეს წლებში მაღალშემოსავლიანი ქვეყნების ჯგუფში გადასვლა. განსაკუთრებით მნიშვნელოვანია მაღალპროდუქტიული სექტორების განვითარება და სწორედ ამ სფეროებში ახალი სამუშაო ადგილების შექმნა“, - აღნიშნა გადაცემა „იმედის დილაში“, რუბრიკა Business Insider Georgia-ში სტუმრობისას  შოთა ბერეკაშვილმა.