თბილისში Co-working სივრცეების ბაზარი ბოლო წლებში მკვეთრი ზრდის შემდეგ დასტაბილურდა, - აცხადებს Galt & Taggart-ის სექტორული კვლევების უფროსი ზუკა თავყელიშვილი. მისი თქმით, 2022-2023 წლებში მიგრაციის ტალღების ფონზე სწრაფი გაფართოების შემდეგ 2024-2025 წლებში ნაწილი სივრცე დაიხურა, თუმცა ბაზარი მაინც 2022 წლამდე არსებულ დონეს მნიშვნელოვნად აღემატება.

„შეგვიძლია ვთქვათ, რომ თუ სამი-ოთხი წლის წინანდელ პერიოდს შევედრებით, ბევრად უფრო პოპულარული მიმართულება არის დღეს. წინაღობები იყო, თუმცა 2022-23 წლებში მიგრაციის ტალღებთან ერთად საკმაოდ სწრაფად უპასუხა ბაზარმაც ამ ყველაფერს და პირიქით, 2023 წლისთვის საკმაოდ დიდი რაოდენობა გვქონდა Co-working სივრცეების, ძალიან სწრაფად გაიზარდა მიწოდება, თუმცა 2024-2025 წლებში რამდენიმე Co-working-ი დაიკეტა და აი შეგვიძლია ვთქვათ, რომ დასტაბილურდა ბაზარი. იმაზე მეტი რაოდენობის Co-working სივრცე გვაქვს ვიდრე გვქონდა 2022 წლამდე. ფასშიც ზუსტად იგივე დინამიკა გვქონდა - 2023 წელს პიკურ მაჩვენებელს მიაღწია და 2024-25 წლებში მცირედი შემცირებით თავის ჯანსაღ ნიშნულზე დასტაბილურდა“, - ამბობს Galt & Taggart-ის სექტორული კვლევების უფროსი.

შეგახსენებთ, რომ  Galt & Taggart-მა კვლევა „სავაჭრო უძრავი ქონება თბილისში“ გამოაქვეყნა, სადაც აღნიშნულია, რომ 2025 წელს, თბილისის ძირითადი სავაჭრო უძრავი ქონების ბაზრის მოცულობამ 1.3 მლნ კვ.მ შეადგინა, საიდანაც 58% ბაზრობებზე, 33% მოლებზე, ხოლო 9% ცენტრალურ სავაჭრო ქუჩებზე მოდის. ეს ფორმატები სხვადასხვა მოთხოვნას ემსახურება: მოლები - ბრენდირებულ და ტრაფიკზე დამოკიდებულ ვაჭრობას, ცენტრალური ქუჩები - პრემიუმ და ტურისტულ სეგმენტს, ბაზრობები კი ფასზე ორიენტირებულ მომხმარებელს.

„2025 წელს მოლების გასაქირავებელი ფართობი 430 ათასი კვ.მ იყო, ხოლო დაგეგმილი პროექტების ფონზე, იმ შემთხვევაში თუ ყველა განხორციელდება, 2030 წლამდე დამატებით 140 ათასი კვ.მ-ის მიწოდებაა მოსალოდნელი. მიუხედავად ზრდისა, ჭარბი მიწოდების რისკი ბაზარზე ჯერ არ იკვეთება. საცალო ვაჭრობის ბრუნვა 2019-25 წლებში გაორმაგდა, ელ-კომერციის წილი კი ჯერ მცირეა და ფიზიკურ ფორმატებზე მნიშვნელოვან ზეწოლას არ ქმნის.

მოლებში ვაკანტურობა 2025-ში 6.6% იყო, ქირები კი ბოლო წლებში სწრაფად გაიზარდა. 2026-30 წლებში ახალი მიწოდების ფონზე ქირის ზრდა დასტაბილურდება.

მოლებისთვის მთავარი შესაძლებლობა ლუქს სეგმენტის განვითარებაა, რადგან ქართველების საზღვარგარეთ დანახარჯების დიდი ნაწილი სწორედ ლუქს ბრენდის ტანსაცმელსა და აქსესუარებზე მოდის, მაშინ როცა ქართულ მოლებში ასეთი ბრენდების წილი მცირეა“, - განმარტებულია Galt & Taggart-მა კვლევაში.