თურქეთი, აზერბაიჯანი, ბულგარეთი და საქართველო შავი ზღვის გავლით ელექტროენერგიის გადამცემი წყალქვეშა ხაზის მშენებლობის საკითხს განიხილავენ. ამის შესახებ თურქეთის რესპუბლიკის ენერგეტიკისა და ბუნებრივი რესურსების მინისტრმა ალფარსლან ბაირაქთარმა განაცხადა.

მინისტრმა აღნიშნულ საკითხზე ოთხი ქვეყნის მთავრობებს შორის სუფთა ენერგიის სფეროში სტრატეგიული პარტნიორობის შესახებ გაფორმებული შეთანხმების კომენტირებისას ისაუბრა.

„დღეს ხელმოწერილი დოკუმენტი ერთ-ერთი ასეთი პროექტია. საუბარია მასშტაბურ მწვანე ენერგეტიკულ დერეფანზე, რომლის შექმნასაც საქართველოსთან, აზერბაიჯანთან და ბულგარეთთან ერთად ვგეგმავთ. გარდა ამისა, ამ ქვეყნებთან და რუმინეთთან ერთად განვიხილავთ შავი ზღვის გავლით ელექტროენერგიის გადამცემი ხაზის მშენებლობას. აუცილებელია უზრუნველვყოთ დიდი მოცულობის ელექტროენერგიის გადაცემა აღმოსავლეთიდან დასავლეთისკენ და ჩრდილოეთიდან სამხრეთისკენ“, - განაცხადა ალფარსლან ბაირაქთარმა.

მინისტრის თქმით, თურქეთი ენერგეტიკული ინტეგრაციის მასშტაბურ პროექტებზე რამდენიმე სხვა ქვეყანასთანაც აწარმოებს მოლაპარაკებებს.

მისივე განცხადებით, ანკარის მიზანია აღნიშნული პროექტების საერთაშორისო დონეზე ხელშეწყობა და გაეროს კლიმატის ცვლილების ჩარჩო კონვენციის მხარეთა 31-ე კონფერენციის (COP31) ფარგლებში კონკრეტული ინიციატივების განვითარება.

„დღეს ამ შეთანხმების ხელმოწერით ჩვენ ამ მიმართულებით ერთ-ერთი ვალდებულება შევასრულეთ. ეს პროექტები წარმოაჩენს იმ კონკრეტულ ნაბიჯებს, რომლებსაც თურქეთი 2040 წლამდე განსაზღვრული ენერგეტიკული სტრატეგიისა და ელექტრიფიკაციის მიზნების ფარგლებში დგამს, ასევე მის წვლილს გლობალური ენერგეტიკული ტრანსფორმაციის პროცესში“, - განაცხადა მინისტრმა.