ევროპის რეკონსტრუქციისა და განვითარების ბანკი (EBRD) და მწვანე კლიმატის ფონდი (GCF) ურბანულ გარემოში კლიმატის ცვლილებასთან დაკავშირებული ღონისძიებების მხარდასაჭერად თანამშრომლობას აფართოებენ. აღნიშნული ინიციატივის ფარგლებში GCF-მა EBRD-ის „მწვანე ქალაქების“ პროგრამისთვის 87 მილიონი ევროს მოცულობის დაფინანსების მეორე ტრანში დაამტკიცა.

ახალი ტრანშის გამოყოფის შედეგად, პროგრამისთვის ხელმისაწვდომი GCF-ის შეღავათიანი დაფინანსების მოცულობა გაორმაგდა და 174 მილიონ ევროს მიაღწია. აღნიშნული რესურსი პროგრამაში მონაწილე ქვეყნების ქალაქებს დაეხმარება კლიმატის ცვლილების შერბილებასა და მასთან ადაპტაციასთან დაკავშირებული მნიშვნელოვანი გამოწვევების დაძლევაში, ინვესტიციების განხორციელების, პოლიტიკის მხარდაჭერის, ინსტიტუციური შესაძლებლობების გაძლიერებისა და მწვანე დაფინანსებაზე ხელმისაწვდომობის გაუმჯობესების გზით.

EBRD-ის „მწვანე ქალაქების“ პროგრამაში 60-ზე მეტი ქალაქია ჩართული. პროგრამა მხარს უჭერს ინვესტიციებს ისეთ მიმართულებებში, როგორებიცაა ურბანული ტრანსპორტი, ცენტრალიზებული ენერგომომარაგება, მყარი ნარჩენების მართვა, განახლებადი ენერგეტიკა, ჭკვიანი ტექნოლოგიური გადაწყვეტილებები, წყალმომარაგება და წყალარინება, შენობები, ელექტროენერგიის გამანაწილებელი ქსელები, ქუჩების განათება, კლიმატის ცვლილების მიმართ მდგრადობა და ბუნებაზე დაფუძნებული გადაწყვეტილებები.

GCF-ის შეღავათიანი დაფინანსება ქალაქებს შესაძლებლობას აძლევს, განახორციელონ უფრო ამბიციური საინვესტიციო პროექტები, დაძლიონ დაფინანსების ხელმისაწვდომობასა და პროექტების ფინანსურ სიცოცხლისუნარიანობასთან დაკავშირებული შეზღუდვები და მოიზიდონ დამატებითი სახელმწიფო და კერძო კაპიტალი.

დაფინანსება ხელმისაწვდომია 15 ქვეყნის ქალაქებისთვის, კომუნალური მომსახურების კომპანიებისა და კერძო სექტორის წარმომადგენლებისთვის. ეს ქვეყნებია: ალბანეთი, სომხეთი, ბოსნია და ჰერცეგოვინა, საქართველო, იორდანია, ყაზახეთი, ყირგიზეთის რესპუბლიკა, მოლდოვა, მონღოლეთი, მაროკო, ჩრდილოეთი მაკედონია, სერბეთი, ტაჯიკეთი, ტუნისი და უზბეკეთი.

მხარდაჭერა ხორციელდება პოლიტიკის შემუშავების, მდგრად ინფრასტრუქტურაში ინვესტირების, ტექნიკური დახმარების, ინსტიტუციური შესაძლებლობების გაძლიერებისა და მწვანე დაფინანსებაზე ხელმისაწვდომობის გაუმჯობესების ღონისძიებების მეშვეობით.

GCF-ის დაფინანსების პირველი ტრანშის ფარგლებში დასრულდა „მწვანე ქალაქების“ რვა სამოქმედო გეგმის (GCAP) შემუშავება და ათი საინვესტიციო პროექტის განხორციელება. აღნიშნული სამოქმედო გეგმები ქალაქების საჭიროებებზე მორგებული სტრატეგიული დოკუმენტებია, რომლებიც მათ ყველაზე მნიშვნელოვანი გარემოსდაცვითი გამოწვევების გამოვლენაში, პრიორიტეტების განსაზღვრასა და შესაბამისი ღონისძიებების განხორციელებაში ეხმარება.

დაფინანსების მეორე ტრანში პროგრამას შესაძლებლობას მისცემს, მონაწილე ქალაქებში საინვესტიციო პროექტების მხარდაჭერა კიდევ უფრო გააფართოოს.

დაფინანსების დამტკიცება ემთხვევა პერიოდს, როდესაც EBRD-ისა და GCF-ის ფართო პარტნიორობასა და ერთობლივი პროექტების აქტიურ განხორციელებას თითქმის 10 წელი უსრულდება.

გასული ათწლეულის განმავლობაში ორი ინსტიტუტი სხვადასხვა პროგრამისა და სექტორის ფარგლებში თანამშრომლობდა კლიმატის ცვლილების შერბილებისა და მასთან ადაპტაციის ხელშეწყობის მიზნით. აღნიშნული თანამშრომლობა აერთიანებს GCF-ის შეღავათიან ფინანსურ რესურსებს, EBRD-ის დაფინანსებასა და ტექნიკურ ექსპერტიზას, ასევე კერძო სექტორის კაპიტალის მობილიზების შესაძლებლობებს.