EBRD საქართველოში ყველაზე დიდი მზის ელექტროსადგურის მშენებლობისთვის $19.6 მილიონის დაფინანსების გამოყოფას გეგმავს. პროექტი მოიცავს 40.6 მეგავატი სიმძლავრის ახალი მზის ფოტოელექტრული (PV) სადგურის მშენებლობის დაფინანსებას, ასევე ადგილობრივი ბანკიდან მანამდე მოზიდული ხიდური დაფინანსების რეფინანსირებას ხუთი უკვე მოქმედი მზის ფოტოელექტრული სადგურისთვის, რომელთა ჯამური დადგმული სიმძლავრე 12.2 მეგავატს შეადგენს.

აღნიშნული დაფინანსება EBRD-ის მიერ კომპანიების - შპს „კახეთის მზის“, შპს „მზის ველის“, შპს „ველის“ და შპს „ალაზნის მზის“ სასარგებლოდ შეიძლება მიიმართოს სესხის გამოყოფას სახით. აღნიშნული კომპანიები საქართველოში 52.8 მეგავატი ჯამური სიმძლავრის მზის ელექტროსადგურების (SPP) მშენებლობისა და განვითარების მიზნით არიან დაფუძნებული.

პროექტის შესახებ Business Insider Georgia ექსკლუზიურად ნინო მჭედლიშვილს, საინვესტიციო კომპანია „ფერი“ ჯგუფში შემავალი კომპანიების („ალაზნის მზისა“ და „კახეთის მზის“) დირექტორს ესაუბრა.

,,ქვეყნისთვის ნებისმიერი მოზიდული ინვესტიცია განსაკუთრებულად მნიშვნელოვანია, რადგან სწორედ ინვესტიციებია ეკონომიკური განვითარების ერთ-ერთი მთავარი წინაპირობა. ჩვენც აქტიურად ვმუშაობთ, რომ მოვიზიდოთ იაფი და ხელმისაწვდომი ფინანსური რესურსები, კომპანიაში დავნერგოთ ევროპული სტანდარტები და სრულად დავაკმაყოფილოთ EBRD-ის მოთხოვნები. შედეგად, ვგეგმვთ რომ ჩვენი პროექტები მაღალი ხარისხით განხორციელდეს როგორც დაგეგმვის ეტაპზე, ისე მშენებლობისა და შემდგომი ოპერირების პროცესშიც.

აღნიშნული პროექტის ფარგლებში 40.6 მეგავატის სიმძლავრეზეა საუბარი, რაც წარმოადგენს საშუალო სიმძლავრეს და ერთ-ერთი პირველი ელექტროსადგური იქნება ,,Utility-Scale Greed”-ზე (ერთ-ერთი პირველი ქსელზე დაერთებული კომერციული სადგური) დაერთებული. რა თქმა უნდა დივერსიფიკაცია მნიშვნელოვანია ენერგეტიკისთვის და კარგია ზოგადად ელექტროენერგიის ბაზრის განვითარებისთვის“, - განაცხადა ნინო მჭედლიშვილმა.

ცნობისთვის, პროექტის არა-ტექნიკური რეზიუმის თანახმად, ველი შპს არის საქართველოში რეგისტრირებული კომპანია, რომელიც ავითარებს, ფლობს და ახორციელებს მზის ელექტროსადგურების (მზის ელექტროსადგური) ექსპლუატაციას. ამჟამად ველი-ს საკუთრებაშია 5 მზის ელექტროსადგური (საერთო დადგმული სიმძლავრე: 12 მვტ), რომლებიც 2025 წლის სექტემბერში გადაეცა ექსპლუატაციაში, და კომპანია კიდევ 5-ს ავითარებს, სულ 12 მზის ელექტროსადგურის პორტფელის ფორმირების მიზნით. ევროპის რეკონსტრუქციისა და განვითარების ბანკი (EBRD) განიხილავს ამ პორტფელის დაფინანსებას. მზის ელექტროსადგურები განლაგებულია კახეთში, აღმოსავლეთ საქართველოში, საერთო დადგმული სიმძლავრით 52,5 მვტ (ყველა ერთობლივად მოხსენიებულია, როგორც „პროექტი“). პროექტი განხორციელდება სამშენებლო-სამონტაჟო სამუშაოების (EPC) ხელშეკრულების ფარგლებში. ექსპლუატაცია და ტექნიკური მომსახურება (O&M) წარიმართება O&M ხელშეკრულების საფუძველზე. პროექტი კატეგორიზებულია „B" კატეგორიად EBRD-ის 2024 წლის გარემოსდაცვითი და სოციალური პოლიტიკის შესაბამისად. პროექტის გარემოსდაცვითი და სოციალური სათანადო გამოკვლევა ჩატარდა 2026 წლის იანვარში EBRD-ის გარემოსდაცვითი და სოციალური მოთხოვნების (ESR) შესაბამისად პროექტის სტრუქტურირების მიზნით. წინამდებარე დოკუმენტი მიზნად ისახავს საზოგადოებისთვის პროექტის შესახებ ზოგადი ინფორმაციის მიწოდებას.