ეკონომიკური ზრდის განსაზღვრისთვის რამდენიმე მიდგომა გვაქვს და თითოეული ეფუძნება საერთაშორისო სტანდარტს, - აცხადებს საქსტატის აღმასრულებელი დირექტორი. 

მისივე თქმით, ყოველთვიური ეკონომიკური ზრდის მაჩვენებელი დღგ-ის გადამხდელი საწარმოების ბრუნვის მონაცემებზე დაყრდნობით ითვლება, ხოლო მთლიანი შიდა პროდუქტი კვარტალური და წლიური კვლევების საფუძველზე სამი საერთაშორისო მეთოდით განისაზღვრება.

„ყოველთვიური ეკონომიკური ზრდის გაანგარიშებისას ჩვენ მთლიანად ვეყრდნობით ადმინისტრაციულ მონაცემთა წყაროს, კერძოდ დღგ-ს გადამხდელ საწარმოთა ბრუნვის მონაცემებს ყოველთვიურად. შემდგომ ხდება საბაზისო და საანგარიშო პერიოდების მონაცემების შედარება, მისი დეფლირება, ანუ ფასების ინდექსების გამოყენებით, რომლის საფუძველზეც ჩვენ ვიღებთ ეკონომიკური ზრდის მაჩვენებელს. მაგრამ უფრო ყოვლისმომცველი და დეტალური ინფორმაციის მიღების შესაძლებლობა გვაქვს ჩვენ კვარტალური და წლიური გამოკვლევის საფუძველზე,  ანუ ამ შემთხვევაში ეკონომიკის ხუთივე ინსტიტუციურ სექტორს შევისწავლით, მათ შორის ბიზნეს სექტორს, რომელსაც ეკონომიკაში დაახლოებით 60%-იანი წილი აქვს, არაკომერციული ორგანიზაციების სექტორს - NGO-ებს, შინამეურნეობის მომსახურე არაკომერციულ ორგანიზაციებს, ასევე არასაფინანსო და სადაზღვევო საქმიანობის სექტორს, შინამეურნეობებს და სახელმწიფო დაწესებულებებს. ამ შემთხვევაში ჩვენ ვიყენებთ კვლევებს და პლუს ვიყენებთ ადმინისტრაციულ მონაცემთა წყაროებს, მათ შორის სახელმწიფო ფინანსების ნაწილში ვეყრდნობით საქართველოს ფინანსთა სამინისტროს მონაცემებს, საფინანსო და სადაზღვევო საქმიანობის სექტორში საქართველოს ეროვნული ბანკის მონაცემებს. ამ შემთხვევაში სამი მეთოდით ვითვლით ჩვენ მთლიან შიდა პროდუქტს - მათ შორის წარმოების მეთოდით, დანახარჯების მეთოდით და შემოსავლების მეთოდით. ეს გახლავთ საერთაშორისოდ აღიარებული პრაქტიკა, რაც უზრუნველყოფს მონაცემთა შედარებადობას ნებისმიერ ქვეყანას შორის“. - აღნიშნა გოგიტა თოდრაძემ.