ენერგეტიკა არის საკმაოდ მრავალკომპონენტიანი, გეოპოლიტიკასთან და ეკონომიკასთან მჭიდროდ დაკავშირებული დარგი, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას სემეკის თავმჯდომარემ დავით ნარმანიამ განაცხადა.

„ეს არის ძალიან მნიშვნელოვანი საერთაშორისო ფორუმი, როცა სამ წელიწადში ერთხელ მსოფლიოს ენერგეტიკის მარეგულირებლები იკრიბებიან ერთად. მათი გაერთიანებები, საერთაშორისო-საფინანსო ინსტიტუტები, რომლებიც ენერგეტიკის განვითარებას უჭერენ მხარს, სამთავრობო დაწესებულებების წარმომადგენლები, რომლებიც ენერგეტიკაზე მუშაობენ - ძალიან საინტერესო ფორუმია.

სხვათა შორის, აღნიშნული ფორუმი პირველად ტარდება არა მხოლოდ საქართველოში, არამედ ჩვენს რეგიონში და პირველად ტარდება პატარა ქვეყანაში. ადრე ძალიან დიდ ქვეყნებს ერგოთ პატივი, რომ ემასპინძლათ ამ ფორუმისთვის - შეერთებულ შტატებს, კანადას, საფრანგეთს, გერმანიას და ასე შემდეგ.

ჩვენ სამი წლის წინ მოვიპოვეთ, ძალიან დიდი შრომისა და წვალების შედეგად, რომ საქართველოს ჰქონოდა შესაძლებლობა და აქ ჩაგვეტარებინა აღნიშნული ფორუმი.
გვაქვს ძალიან დიდი სამზადისი. საკმაოდ ბევრი - 400-მდე უცხოელი სტუმარია უკვე დარეგისტრირებული და რეგისტრაცია ბოლო დღემდე გრძელდება, საერთაშორისო წესების შესაბამისად. ასევე, ამ ფორუმში მონაწილეობას მიიღებენ ადგილობრივი ენერგეტიკული ორგანიზაციები, გაერთიანებები, სამთავრობო დაწესებულებები, რომლებიც მუშაობენ ენერგეტიკის საკითხებზე.

პირველი დღე, 21 სექტემბერი, იქნება მასტერკლასები, ანუ სწავლება სხვადასხვა გამოცდილი ენერგეტიკული ორგანიზაციისა და მარეგულირებლების მხრიდან უცხოური გამოცდილების გაზიარების თვალსაზრისით. ჩვენთან არსებულ ენერგეტიკულ ორგანიზაციებს, ჩვენს თანამშრომლებს და, ასე შემდეგ, დაინტერესებულ პირებს შესაძლებლობა აქვთ, დარეგისტრირდნენ და ისწავლონ ძალიან ბევრი საინტერესო რამ.

არის ერთ-ერთი ძლიერი, ფლორენციის ენერგეტიკის სკოლა, რომელიც სპეციალურად ატარებს ამ მასტერკლასებს.

22-ში იქნება ღონისძიების გახსნა. 22, 23 და 24 სექტემბერს, სამი დღის განმავლობაში, იქნება ძალიან დატვირთული პანელური შეხვედრები, დისკუსიები ენერგეტიკის აქტუალურ საკითხებზე და რეგულირებასთან დაკავშირებულ საკითხებზე.

ვინაიდან ენერგეტიკა არის საკმაოდ მრავალკომპონენტიანი, გეოპოლიტიკასთან და ეკონომიკასთან მჭიდროდ დაკავშირებული დარგი, იქნება ძალიან საინტერესო რეგიონული მიმოხილვები ენერგეტიკასთან დაკავშირებით, ისევე როგორც საუბარი რეგულირებაში არსებულ სიახლეებზე, მათ შორის თანამედროვე ციფრული ტექნოლოგიების, ხელოვნური ინტელექტის როლზე და იმაზე, თუ როგორ გამოვიყენოთ ეს ყველაფერი სწორად ენერგეტიკის მართვის ოპტიმიზაციისთვის.
ამგვარ ძალიან ბევრ საინტერესო სიახლეს მიიღებენ ის პირები, რომლებიც დაესწრებიან ფორუმს“, - აცხადებს დავით ნარმანია.