ეროვნულმა ბანკმა დამატებით $100 მლნ-ის ღირებულების მონეტარული ოქრო შეიძინა
საქართველოს ეროვნული ბანკის საბჭოს გადაწყვეტილებით, სებ-მა საერთაშორისო რეზერვებისთვის დამატებით 100 მლნ აშშ დოლარის ღირებულების უმაღლესი სინჯის (999.9) LBMA სტანდარტის ოქროს ზოდები შეიძინა.
მიმდინარე შესყიდვის შედეგად, მონეტარული ოქროს წილი საქართველოს ეროვნული ბანკის საერთაშორისო რეზერვებში 15.5%-ს მიაღწევს. აღსანიშნავია საერთაშორისო რეზერვების ზრდის ტრენდი, რის შედეგადაც რეზერვებმა ისტორიულ მაქსიმუმს - 7.0 მლრდ აშშ დოლარს მიაღწია, ხოლო მათი მოცულობა საერთაშორისო სავალუტო ფონდის რეზერვების ადეკვატურობის (ARA) მაჩვენებლის 114.8%-ს შეადგენს.
აღნიშნული გადაწყვეტილება წარმოადგენს ეროვნული ბანკის საერთაშორისო რეზერვების მართვის გრძელვადიანი სტრატეგიის ნაწილს და მიზნად ისახავს სარეზერვო აქტივების შემდგომ დივერსიფიკაციას, რეზერვების მდგრადობის გაუმჯობესებასა და მათი ინფლაციური რისკებისაგან დაცვას. მონეტარული ოქრო მსოფლიოს ცენტრალური ბანკების მიერ ფართოდ აღიარებული სარეზერვო აქტივია, რომელიც ხელს უწყობს პორტფელის გეოპოლიტიკური რისკების მიმართ მდგრადობის გაზრდასა და რისკების შემცირებას.
ეროვნული ბანკი მომავალშიც განაგრძობს საერთაშორისო რეზერვების მართვას უსაფრთხოების, ლიკვიდურობისა და მომგებიანობის პრინციპების დაცვით. საერთაშორისო რეზერვების ზრდის პარალელურად, სებ-ი კვლავ განიხილავს დივერსიფიკაციის შესაძლებლობებს და გადაწყვეტილებებს მიიღებს გრძელვადიანი სტრატეგიული მიზნებისა და საერთაშორისო საუკეთესო პრაქტიკის შესაბამისად.
აღსანიშნავია, რომ სწორედ ძლიერმა მაკროეკონომიკურმა ფუნდამენტურმა ფაქტორებმა მისცა ეროვნულ ბანკს შესაძლებლობა 2025 წელს მნიშვნელოვნად შეევსო საერთაშორისო რეზერვები. კერძოდ, გასულ წელს სებ-მა 2.4 მლრდ დოლარი შეისყიდა და რეზერვები წლის ბოლოსათვის 6.16 მლრდ დოლარამდე, ხოლო 2026 წლის თებერვალში ისტორიულად მაღალ მაჩვენებლამდე, 6.65 მლრდ-მდე გაზარდა.
აღსანიშნავია ის ფაქტიც, რომ საერთაშორისო ბაზრებზე ცენტრალური ბანკები კვლავ განაგრძობენ ოქროს შესყიდვის მიღებულ პრაქტიკას და მხოლოდ 2026 პირველ კვარტალში 970 ტონაზე მეტი შეისყიდეს, რაც დაახლოებით 80%-ია მთელ 2025 წლის შესყიდვებთან მიმართებაში (1235 ტონა). ცენტრალური ბანკების მთლიანი შესყიდვები ზედიზედ ოთხი წლის განმავლობაში (2022-2025) 1000 ტონაზე მაღალ ნიშნულზე ნარჩუნდება. აღსანიშნავია, ისიც, რომ ცენტრალური ბანკების მხრიდან მოთხოვნა ნაკლებად არის ოქროს ფასზე დამოკიდებული, რაც ძირითადად ოქროს ფასის ქვედა ზღვრის სტაბილურობას უზრუნველყოფს. უკრაინაში კონფლიქტის გაგრძელება, შუა აღმოსავლეთში ესკალაცია, აშშ-ის და ჩინეთის სავაჭრო დაძაბულობა, ასევე 2026 წლის თებერვალში დაწყებული აშშ-ის და ირანის კონფლიქტი - ყველა ეს ფაქტორი თანმიმდევრულად ქმნიდა და აძლიერებდა სტრუქტურულ რისკის პრემიას ოქროს ფასში და ზრდიდა მისი, როგორც უსაფრთხო და დაცული აქტივის ღირებულებას.
სხვა სიახლეები
საქსტატის სანდოობა იმითაც განისაზღვრება, რომ ჩვენი თანამშრომლები უშუალოდ არიან ჩართული საერთაშორისო მეთოდოლოგიების შემუშავების პროცესში - გოგიტა თოდრაძე
10.06.2026.12:40
საქსტატის აღმასრულებელი დირექტორის განმარტებით, საქართველოში აბსოლუტური სიღარიბის დონე ბოლო პერიოდში რამდენიმე პროცენტული პუნქტით შემცირდა, ხოლო მოსახლეობის ცხოვრების დონის შესაფასებლად საქსტატი საერთაშორისო სტანდარტების შესაბამის არაერთ მაჩვენებელს, მათ შორის ფარდობით სიღარიბესა და ჯინის ინდექსს ითვლის.
მისივე თქმით, ასევე არის ფარდობითი სიღარიბის მაჩვენებლები, რომლებიც უთანასწორობის საზომია და ასევე ჯინის ინდექსი, რომელიც შემოსავლების დიფერენციაციას ზომავს.
„რაც შეეხება აბსოლუტური სიღარიბის დონეს - უპირველეს ყოვლისა იანგარიშება აბსოლუტური სიღარიბის ზღვარი, მთელი რიგი დეტალური მეთოდოლოგია გვაქვს წარმოდგენილი და ამ ზღვარს ქვემოთ მყოფი ადამიანები, მათი პროცენტული წილი მთელ მოსახლეობაში განისაზღვრება როგორც აბსოლუტური სიღარიბის დონის მაჩვენებელი. გარდა ამისა არსებობს საერთაშორისო სიღარიბის ზღვარი. მაგალითად 3 დოლარზე ნაკლებს ვინც ხარჯავს მსყიდველობითი უნარის პარიტეტის გათვალისწინებით, ასევე 4.6 და 8.3 დოლარზე ნაკლებს ვინც ხარჯავს. შესაბამისად ეს მსოფლიო ბანკის სტანდარტია და ამ მეთოდითაც ჩვენ ვითვლით ამ მაჩვენებლებს. მოკლედ მთელი რიგი მაჩვენებლები რაც კი არსებობს საერთაშორისო პრაქტიკაში იწარმოება ჩვენს მიერ და ეს გახლავთ საუკეთესო შესაძლებლობა დავახასიათოთ მოსახლეობის ცხოვრების დონის მაჩვენებელი“, - ამბობს საქსტატის აღმასრულებელი დირექტორი.
გოგიტა თოდრაძის შეფასებით, საქსტატის მიერ წარმოებული სტატისტიკური მონაცემების შესაბამისობას საერთაშორისო სტანდარტებთან პერიოდულად ისეთი ორგანიზაციები ამოწმებენ, როგორიცაა ევროსტატი, გაერო, საერთაშორისო სავალუტო ფონდი და მსოფლიო ბანკი.
„უპირველეს ყოვლისა ჩვენ ვაცხადებთ და ვასაბუთებთ მტკიცედ, რომ ვეყრდნობით საერთაშორისო სტანდარტებს და მეცნიერულად დასაბუთებულ მეთოდებს, მაგრამ ამის რევიზიას თუ რამდენად შესაბამისობაშია ჩვენი ნათქვამი ჩვენს მიერ გადადგმულ ნაბიჯებთან, შესრულებულ სამუშაოსთან, ამის რევიზიას რა თქმა უნდა ჩვენი საერთაშორისო პარტნიორები პერიოდულად უზრუნველყოფენ, ახდენენ. მათ შორის ევროსტატი, გაერო, საერთაშორისო სავალუტო ფონდი, მსოფლიო ბანკი და ასე შემდეგ და შეფასების ანგარიშები ფართო საზოგადოებისთვის რა თქმა უნდა ხელმისაწვდომია. გარდა ამისა ჩვენი ავტორიტეტი იმითაც განისაზღვრება, რომ ჩვენი კოლეგები, ჩვენი თანამშრომლები უშუალოდ ჩართული არიან ასე ვთქვათ საერთაშორისო მეთოდოლოგიების შემუშავების პროცესში და რაც მთავარია ჩვენ ღია ვართ ნებისმიერი განმარტების გაკეთების მიმართულებით, როცა ეხება ეს მაჩვენებლის გაანგარიშების მეთოდოლოგიას, როცა ეხება ეს ახსნას იმისას თუ რამ განაპირობა მაჩვენებლის ზრდა თუ შემცირება და შესაბამისად ეს ერთ დღეში არ ყალიბდება, ამას ათეულობით წლები სჭირდება და ეს კიდევ უნდა გაგრძელდეს ყოველდღიურად ჩვენს სამუშაო პროცესში“, - აღნიშნავს თოდრაძე.
ეკონომიკური ზრდის განსაზღვრისთვის რამდენიმე მიდგომა გვაქვს და თითოეული ეფუძნება საერთაშორისო სტანდარტს - გოგიტა თოდრაძე
10.06.2026.12:10
რა მეთოდოლოგიით ითვლის საქსტატი ქვეყანაში უმუშევრობის მაჩვენებელს გოგიტა თოდრაძის განმარტება
10.06.2026.11:50
საქსტატი უახლოეს პერიოდში ცხოვრების დონის სტატისტიკის მაჩვენებლების შესახებ ახალ ინტერაქტიულ პლატფორმას წარადგენს
10.06.2026.11:40
