ეტაპობრივად უნდა მოვახდინოთ უპატრონო ცხოველების სტერილიზაცია-კასტრაცია იმის გამო, რომ შევამციროთ ჰიპერპოპულაცია - ლაშა ავალიანი
საქართველოში შინაური ბინადარი ცხოველების იდენტიფიკაცია-რეგისტრაცია სავალდებულო გახდება. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას გარემოს დაცვისა და სოფლის მეურნეობის მინისტრის მოადგილემ ლაშა ავალიანმა განაცხადა, შესაბამისი რეგულაციები მთავრობის დადგენილებით განისაზღვრება და მიზნად ისახავს როგორც პატრონიანი, ისე უპატრონო ცხოველების აღრიცხვას.
„გასულ წელს, ივლისის თვეში მიღებულ იქნა ნამდვილად ძალიან მნიშვნელოვანი კანონი, რომელიც არეგულირებს შინაურ ბინადარ ცხოველთა საკითხებს ქვეყნის დონეზე. ნამდვილად დაგეთანხმებით იმაში, რომ ძალიან ბევრი ადამიანი არის დაინტერესებული შინაურ ბინადარ ცხოველთა ბედით. თუმცა აქ უნდა აღინიშნოს, რომ საზოგადოება ორ ნაწილად არის გაყოფილი: გარკვეული ნაწილისთვის ეს საშიშროებას წარმოადგენს, მათ ეშინიათ ამ ცხოველების. გარკვეული ნაწილისთვის, პირიქით, ეს არის სიყვარულის და მათი მოვლა-შენახვის შინაგანი ვალდებულება. აქედან გამომდინარე, ეს კანონი სწორედ ორივე მათგანს არეგულირებს. საზოგადოების ორივე ნაწილი ერთმანეთს ვერ ეთანხმება ბუნებრივია, თუმცა თანხმდებიან ერთ ყველაზე მთავარ საკითხზე, რომ ქუჩაში ძაღლები და კატები არ უნდა იყოს. ამაზე ყველა ვთანხმდებით, რომ არ უნდა იყოს, თუმცა დღევანდელი სამწუხარო არსებული მდგომარეობიდან სასურველ და საოცნებო მდგომარეობამდე ბევრი გზა არის გასავლელი. სწორედ ამ გზების გავლის პირველი ყველაზე მნიშვნელოვანი, აქტივობები არის დაგეგმილი არა კანონის, არამედ უკვე კანონქვემდებარე ნორმატიული აქტების, ანუ მთავრობის დადგენილებებისა და განკარგულების სახით, რომელზეც უნდა ვისაუბროთ და ერთ-ერთი მნიშვნელოვანი ეს არის შინაურ ბინადარ ცხოველთა იდენტიფიკაცია-რეგისტრაცია. ჩვენ აქამდე, 2012 წლიდან ეტაპობრივად განვახორციელეთ სხვადასხვა ცხოველების (ძირითადად ფერმის ცხოველებს ეხებოდა: ეს იყო მსხვილფეხა საქონელი, წვრილფეხა საქონელი, ღორი, ფუტკარი) იდენტიფიკაცია-რეგისტრაცია, გვაქვს ნორმატიული აქტი - 483-ე მთავრობის დადგენილება, სადაც შედის ცვლილებები და ამას ემატება შინაურ ბინადარ ცხოველთა იდენტიფიკაცია-რეგისტრაცია. მოკლედ რომ განვსაზღვროთ, რას მოიცავს ეს - ეს არის ქვეყნის მასშტაბით ადგენს წესებს ცხოველთა იდენტიფიკაცია-რეგისტრაციის და აი ეს არის მაიდენტიფიცირებელი საშუალებები, ამ შემთხვევაში მიკროჩიპი, ან საყურე ნიშანი. მიკროჩიპი ამ შემთხვევაში პატრონიანი ცხოველების შემთხვევაში განიხილება, ხოლო სატდე უკვე უპატრონო და მიკედლებული ცხოველების შემთხვევაში“, - აღნიშნა ლაშა ავალიანმა.
მინისტრის მოადგილის განმარტებით, საქართველოში უპატრონო ცხოველების რაოდენობის შემცირება ჰუმანური მეთოდებით იგეგმება. ლაშა ავალიანის განცხადებით, ამისთვის პატრონიან და უპატრონო ცხოველებზე სტერილიზაცია-კასტრაციის ღონისძიებები ეტაპობრივად განხორციელდება.
„ფოკუსი გვაქვს ჰიპერპოპულაციაზე, ანუ მომატებულ პოპულაციაზე და ჩვენ უნდა შევეცადოთ ყველამ - საზოგადოებამ, სახელმწიფომ, რომ ჰუმანური მეთოდებით ვმართოთ ჰიპერპოპულაცია. ამის მთელი რიგი საშუალებები არსებობს, რომელიც აპრობირებულია საერთაშორისო პრაქტიკით და ასევე ჩვენთანაც დაწყებულია არაერთი წელია. კონკრეტულ მაგალითებზე რომ ვისაუბროთ, საზოგადოება ბოლომდე შეიძლება ყველა ვერ აცნობიერებს იმას, რომ ქუჩაში არსებული უპატრონო ცხოველები - ეს მხოლოდ უპატრონო ცხოველების გამრავლების შედეგი არ არის. ეს არის მათ შორის პატრონიანი ცხოველების მიერ მათი მიტოვების, გამოგდების, ვერ შენახვის და ბევრი-ბევრი მიზეზების გამო. ან დაუგეგმავი მაკეობის და ასე შემდეგ. აქედან გამომდინარე, საკითხი არის კომპლექსური და ჩვენ ორივე მიმართულებით უნდა ვიმუშაოთ: ერთი პატრონიან ცხოველებში და ამ მიმართულებით სტერილიზაცია-კასტრაციის საყოველთაო მოთხოვნები უნდა შეიქმნას იმ გარკვეული გამონაკლისებით, რომელიც არის დაშვებული კანონის მიხედვით და ასევე უნდა ეტაპობრივად უნდა მოვახდინოთ უპატრონო ცხოველების სტერილიზაცია-კასტრაცია იმის გამო, რომ შევამციროთ ჰიპერპოპულაცია.
ჰიპერპოპულაციის შემცირება და პოპულაციის ეტაპობრივი და პირველი სამი წელი მნიშვნელოვანი ცვლილებები უნდა იყოს და ესეც არის გათვალისწინებული, რაც მოგვცემს საშუალებას, რომ გარდამტეხი, ასე ვთქვათ, მომენტი შევქმნათ და წამოვიყვანოთ პოპულაცია შემცირებისკენ. რაღაცა პერიოდის შემდგომ უკვე უფრო ადვილი იქნება ამ ცხოველებისთვის პატრონების მოძებნა მასიურად და მივიდეთ იმ სანუკვარ შედეგამდე, რომელიც იქნება, რომ გარეთ, ქუჩაში უპატრონო ცხოველი არ იქნება“, - აღნიშნავს ლაშა ავალიანი.
სხვა სიახლეები
ბოლო ოთხ კვარტალში რეზერვების 2.3 მილიარდი აშშ დოლარით ზრდის დაახლოებით 90% სწორედ ფინანსურმა შემოდინებებმა, უპირველეს ყოვლისა ბანკების მიერ საზღვარგარეთიდან მოზიდულმა სახსრებმა, უზრუნველყო - TBC Capital
20.11.2026.19:00
სავალუტო შემოდინებები შენელდა, თუმცა ლარი სტაბილური რჩება.
სექტემბრის მკვეთრი კლების შემდეგ, ოქტომბერში უცხოური ვალუტის წმინდა შემოდინებების მაჩვენებელი გაუმჯობესდა და წლის საშუალო დონეს დაუბრუნდა. თუმცა ფაქტორები, რომლებიც სავალუტო ბაზარზე უცხოური ვალუტის სიჭარბეს განაპირობებს, ბოლო თვეებში გარკვეულწილად შესუსტდა: ექსპორტის ზრდა შენელდა, იმპორტის ზრდა დაჩქარდა, ფულად გზავნილებზე უარყოფითად აისახა გადარიცხვების ერთ-ერთი მსხვილი რუსული სისტემის წინააღმდეგ დაწესებული სანქციები, ხოლო ტურიზმში, ოქტომბრამდე ძლიერი ზრდის შემდეგ, შენელების ნიშნები გამოჩნდა. ამ ფონზე, სებ-ის სავალუტო შესყიდვები, ჩვენი შეფასებით, საგრძნობლად შემცირდა, აშშ დოლართან ლარის გაცვლითი კურსი კი 2.59–2.60-ის ფარგლებში დასტაბილურდა.
მნიშვნელოვანია, რომ, თიბისი კაპიტალის შეფასებით, სავალუტო ბაზარზე კვლავ სიჭარბე ფიქსირდება. ასეთ პირობებში შემოდინებების კლება უფრო მეტად სებ-ის მიერ რეზერვებისთვის შესასყიდი უცხოური ვალუტის მოცულობას ამცირებს, ვიდრე უშუალოდ ლარის გაცვლით კურსზე ქმნის ზეწოლას. ამას ისიც ადასტურებს, რომ ბოლო პერიოდში, როდესაც აშშ დოლარი გლობალურად გამყარდა და სავაჭრო პარტნიორების ვალუტები გაუფასურდა, ლარი სტაბილური დარჩა.
ამასთან, გასათვალისწინებელია, რომ ოპერატიული მონაცემები, რომელთაც მიმდინარე მდგომარეობის რეალურ დროში შესაფასებლად ვიყენებთ, საგარეო ნაკადების სრულ სურათს ვერ ასახავს. ჩვენი შეფასებით, მიმდინარე ანგარიშის ბალანსი, რეინვესტირებული მოგების გარეშე, რომელიც წლის პირველ ნახევარში ძირითადად ინფორმაციული და საკომუნიკაციო ტექნოლოგიების (ICT) მომსახურების ექსპორტმა გააუმჯობესა, მესამე კვარტალშიც დადებითი დარჩა. თუმცა მეტად თუ არა, არანაკლებ მნიშვნელოვანიფინანსური ნაკადებია, რომელთა შესახებ ოპერატიული მონაცემები ნაკლებად არის ხელმისაწვდომი. ბოლო ოთხ კვარტალში რეზერვების 2.3 მილიარდი აშშ დოლარით ზრდის დაახლოებით 90% სწორედ ფინანსურმა შემოდინებებმა, უპირველეს ყოვლისა ბანკების მიერ საზღვარგარეთიდან მოზიდულმა სახსრებმა, უზრუნველყო. უახლესი დინამიკის გათვალისწინებით, მოსალოდნელია, რომ 2026 წლის მიმდინარე ანგარიშის პროფიციტი, რეინვესტიციის გამორიცხვით, დაახლოებით მშპ-ის 0.5% იქნება, მაშინ როდესაც წინა პროგნოზი 0.7-0.8%-ს შეადგენდა.
უშუალოდ კომპონენტების დინამიკის კუთხით, საგარეო ვაჭრობაში ექსპორტის წლიური ზრდა იანვარ-აგვისტოს 22%-დან სექტემბერ-ოქტომბერში დაახლოებით 5%-მდე შენელდა, იმპორტის ზრდა კი 9%-დან დაახლოებით 15%-მდე დაჩქარდა. ექსპორტის შენელების დიდი ნაწილი ავტომობილების რე-ექსპორტის კლებას და ერთჯერად ფაქტორებს უკავშირდება: სპილენძის მადნების ექსპორტი სექტემბერში შეჩერდა (ოქტომბერში განახლდა), გასული წლის სექტემბერში კი ნახატებისა და თვითმფრინავების ერთჯერადი ექსპორტი დაფიქსირდა. თუმცა ზრდა სხვა პროდუქტებზეც, ძირითადად სურსათსა და სასმელებზე, შენელდა. ავტომობილების რე-ექსპორტის კლება ავტომობილების იმპორტის შემცირებამ თითქმის სრულად დააბალანსა, იმპორტის დაჩქარება კი ძირითადად ნავთობისა და ნავთობპროდუქტების შემოტანამ განაპირობა. მართალია, ნედლი ნავთობის იმპორტი ნავთობპროდუქტების ექსპორტთან ერთად იზრდება, თუმცა სექტემბერ-ოქტომბერში ნავთობისა და საწვავის იმპორტზე ხარჯი ორჯერ მეტით გაიზარდა, ვიდრე ნავთობპროდუქტების ექსპორტიდან მიღებული შემოსავალი. მთლიანობაში, იანვარ-ოქტომბერში საქონლით ვაჭრობის დეფიციტი მშპ-სთან მიმართებით, წინა წლებთან შედარებით, კვლავ მნიშვნელოვნად დაბალია. ამასთან, გასული წლის ძლიერი ნოემბრის გამო, მიმდინარე წლის ნოემბერში ექსპორტი წლიურ ჭრილში შესაძლოა შემცირდეს კიდეც.
სავაჭრო ბალანსზე მოქმედი ფაქტორების მხრივ, აღსანიშნავია ისიც, რომ სავაჭრო პირობები - ექსპორტის ფასების ფარდობა იმპორტის ფასებთან - კვლავ გაუარესდა. თუკი წლის დასაწყისში საექსპორტო საქონლის ფასები იმპორტის ფასებზე მეტად იყო გაზრდილი, ძირითადად ლითონების გაძვირების ხარჯზე, ბოლო რამდენიმე თვის განმავლობაში, უპირველეს ყოვლისა ნავთობის მკვეთრი გაძვირების გამო, ეს პოზიტიური ეფექტი მიილია. საყურადღებოა, რომ ნოემბერში ნავთობის ფასი გლობალურ ბაზრებზე საგრძნობლად შემცირდა, ხოლო საქართველოშიც საწვავის ფასებმა მცირედით უკვე იკლო. თუ ეს ტენდენცია შენარჩუნდა, მოსალოდნელია, რომ სავაჭრო პირობებზე წმინდა ეფექტი დადებითი იქნება.
ამასთან, ტურიზმიდან შემოსავლების ზრდა ოქტომბერში კვლავ ძლიერი იყო, თუმცა ბოლო კვირების მონაცემები გარკვეულ შენელებაზე მიუთითებს: ნოემბრის შუა რიცხვებისთვის საქართველოს აეროპორტებში ფრენების რაოდენობა წლიურად დაახლოებით 15%-ით იყო შემცირებული, ხოლო არარეზიდენტების უნაღდო დანახარჯები, რომლებიც ტურიზმიდან შემოსავლების შესაფასებლად გამოიყენება, სექტემბრის პიკთან შედარებით 2.5%-ით დაბალია. საპირისპიროდ, რეზიდენტების ხარჯვა კვლავ იზრდება.
ოქტომბერში საქართველოში ფულადი გზავნილები წინა წლის იმავე თვესთან შედარებით 9.5%-ით შემცირდა. კლების დიდი ნაწილი რუსეთიდან, ყაზახეთიდან და ყირგიზეთიდან გზავნილებზე მოდიოდა. სანქციების შემდეგ Zolotaya Korona-ს მეშვეობით საქართველოში გადმორიცხვები დროებით შეწყდა. სხვა სისტემებითრუსეთიდან გადმორიცხული თანხა სექტემბერთან შედარებით გაიზარდა და 11.2 მილიონ აშშ დოლარს მიაღწია, თუმცა ეს სანქციებამდე არსებული თანხის მხოლოდ მეოთხედია. ნოემბრის შუა რიცხვებში Zolotaya Korona-მ საქართველოში გადარიცხვები განაახლა, რაც მომდევნო თვეებში გზავნილების აღდგენას შეუწყობს ხელს, თუმცა აღდგენის ნაწილი შესაძლოა სხვა არხებიდან დაბრუნებულ თანხებსაც ასახავდეს.
იანვარ-სექტემბერში სებ-ის მიერ უცხოური ვალუტის შესყიდვამ 3.4 მილიარდ აშშ დოლარს მიაღწია, ოქტომბრის ბოლოს კი საერთაშორისო რეზერვები რეკორდულ 8.2 მილიარდ აშშ დოლარს გაუტოლდა, რაც საერთაშორისო სავალუტო ფონდის მიერ შეფასებული რეზერვების ადეკვატურობის ნორმის 130%-ია. საგარეო შემოდინებების ბალანსის გათვალისწინებით, მოსალოდნელია, რომ ოქტომბრის შესყიდვები სექტემბრის დონესთან ახლოს იქნება.
რაც შეეხება ლარის პერსპექტივას, სავალუტო ბაზარზე არსებული სიჭარბე კვლავ ლარის მხარდამჭერია, თუმცა წინა პერიოდთან შედარებით ნაკლებად. აგრეთვე, ჩვენი შეფასებით, ლარი კვლავ იმაზე სუსტია, ვიდრე ამას ფუნდამენტური ფაქტორები მოიაზრებს, როგორც მოკლევადიან ასევე გრძელვადიან ჭრილში. მეორე მხრივ, აშშ დოლარის გლობალურად გამყარება და უცხოელი ინვესტორების მხრიდან ლარის სახელმწიფო ფასიან ქაღალდებზე მოთხოვნის შენელება ლარის გამყარებისთვის უარყოფითი ფაქტორებია. ამასთან, შესყიდვების დღევანდელი ტემპით რეზერვების სასურველ დონემდე შევსებას შესაძლოა მეტი დრო დასჭირდეს.
საერთო ჯამში, შიდა ინფლაციური ზეწოლის გაძლიერებისა და გამკაცრებული საგარეო ფინანსური პირობებისფონზე, მაღალია ალბათობა, რომ დეკემბერში სებ მონეტარული პოლიტიკის განაკვეთს 8.25%-დან 8.5%-მდე გაზრდის. თუმცა, ნოემბრის დასაწყისში ნავთობის ფასების მკვეთრი კლება ამ გადაწყვეტილების საწინააღმდეგო ფაქტორია. საბოლოოდ, სებ-ის მიერ რეზერვების დაგროვების პრიორიტეტის გათვალისწინებით, ლარის გაცვლითი კურსის პროგნოზი უცვლელია: წლის ბოლოს ერთი აშშ დოლარი დაახლოებით 2.58 ლარის ფარგლებშია მოსალოდნელი, თუმცა, თუ წინა თვეებში ტენდენციები უფრო ძლიერი ლარისკენ იხრებოდა, ამჟამად დინამიკა მეტად დაბალანსებულია.
იხილეთ პუბლიკაციის სრული ვერსია შემდეგ ბმულზე:
https://tbccapital.ge/ge/publications/all-publications/singleview/30007781-macro-update-georgia