15 მაისს გამოქვეყნებული ანგარიშის თანახმად, Fitch-მა საქართველოს სუვერენული საკრედიტო რეიტინგი 'BB'  დონეზე დაადასტურა სტაბილური პერსპექტივით. 

,,საქართველოს ეკონომიკის ზრდა 2026 წლის პირველ კვარტალშიც ძლიერი დარჩა, მას შემდეგ რაც 2023–2025 წლებში საშუალო ეკონომიკური ზრდა 8%-ს ოდნავ აღემატებოდა. ზრდის მთავარი მამოძრავებელი საინფორმაციო და საკომუნიკაციო ტექნოლოგიების, ასევე სატრანსპორტო მომსახურების სექტორები იყო", - წერს Fitch-ი.

სარეიტინგო სააგენტოს შეფასებით, დასაქმების ზომიერი ზრდა შრომის ბაზარზე არსებულ სტრუქტურულ გამოწვევებს ასახავს.

აღსანიშნავია, რომ Fitch-ი საქართველოს სუვერენული საკრედიტო რეიტინგის ბოლო განახლებისას (21 ნოემბერი, 2025) საქართველოში 2026 წელს 5.3%-იან ეკონომიკურ ზრდას პროგნოზირებდა, ხოლო 15 მაისის განახლების თანახმად, აღნიშნული პროგნოზი ზრდის მიმართულებით გადაიხედა სარეიტინგო სააგენტოს მიერ და 6.5%-მდე გაუმჯობესდა.  

,,მოთხოვნის მხარეს თუ შევაფასებთ, ეკონომიკური ზრდა საკმაოდ დაბალანსებულია - ინვესტიციები აქტიურად იზრდება, შინამეურნეობების მოხმარების ზრდა რეალური განკარგვადი შემოსავლების მატებას შეესაბამება, ხოლო წმინდა ექსპორტსაც ეკონომიკურ ზრდაში დადებითი წვლილი შეაქვს. მიმდინარე წელს მოსალოდნელია ეკონომიკური ზრდის მცირედი შენელება და რეალურ გამოხატულებაში დაახლოებით 6.5%-ის ფარგლებში დაფიქსირება, თუმცა პროგნოზის მიხედვით, ეს მაჩვენებელი მაინც აღემატება 'BB'  კატეგორიის ქვეყნების მედიანურ დონეს, მიუხედავად მზარდი საგარეო გამოწვევებისა. საშუალოვადიან პერიოდში ეკონომიკური ზრდა შესაძლოა მთავრობის მიერ შეფასებულ დაახლოებით 5%-იან ნიშნულს დაუახლოვდეს", - აღნიშნულია ანგარიშში.

Fitch-ის თანახმად, აპრილში ინფლაციის მაჩვენებელზე გავლენა იქონია ენერგომატარებლების ფასების მკვეთრმა ზრდამ. ამასთან, სარეიტინგო სააგენტო ელის, რომ ინფლაცია შემდგომ პერიოდში ეტაპობრივად დაიწყებს შემცირებას და 3%-იან მიზნობრივ მაჩვენებელს მიუახლოვდება.

,,საქართველო სტაბილურად ინარჩუნებს ძლიერ ფისკალურ შედეგებს, რასაც გამჭვირვალე და სანდო ფისკალური ჩარჩო განაპირობებს. 2025 წელს ბიუჯეტის დეფიციტმა მშპ-ის 1.4% შეადგინა, ხოლო მთლიანი საგარეო ვალი მშპ-ის 35%-ზე ნაკლები იყო. ძლიერი ეკონომიკური ზრდა საგადასახადო შემოსავლების ზრდას უწყობს ხელს, ხოლო მთავრობა ხარჯების კონტროლს ეფექტიანად ახორციელებს", - წერს Fitch-ი.

სარეიტინგო სააგენტო ასევე აღნიშნავს, საქართველოს ეროვნული ბანკის მზარდ რეზერვების მოცულობას და წერს, 2026 წლის აპრილში რეზერვები 6.5 მილიარდ აშშ დოლარამდე გაიზარდა. Fitch-ის განმარტებით, ბოლო თვეების განმავლობაში ლარის გამყარების ფაქტორმა საქართველოს ეროვნულ ბანკს უცხოური ვალუტის შესყიდვის შესაძლებლობა მისცა. 

Fitch-ი ასევე განსაკუთრებულ ყურადღებას უთმობს საბანკო სექტორის სიმყარეს, არსებულ ჯანსაღ მაცჩვენებლებს. ,,ძლიერი შიდა ეკონომიკური პირობები კვლავაც ხელს უწყობს საქართველოს საბანკო სექტორის მყარ მაჩვენებლებს. სექტორი მომგებიანია, ხასიათდება ძლიერი კაპიტალიზაციით და აქტივების სტაბილური ხარისხით", - აღნიშნულია ანგარიშში. 

ცნობისთვის, Fitch-ი მორიგ ანგარიშს საქართველოს სუვერენული საკრედიტო რეიტინგის შესახებ 30 ოქტომბერს გამოაქვეყნებს.