გეგმურად მივყვებით პროექტის გრაფიკს - მიმდინარეობს მზადება 1380მ სიგრძის ტალღმტეხის მოსაწყობად, რომელიც წლიურ ჭრილში 95 %-ით უზრუნველყოფს ნავსადგურში დიდი გემების მიღება-მომსახურებას l კომპანია Jan De Nul N.V. - ის პროექტის დირექტორი
ანაკლიის ნავსადგურში საზღვაო ინფრასტრუქტურის სამუშაოებს ვიწყებთ. ამჟამად მიმდინარეობს მზადება ტალღმტეხის მოსაწყობად, - განაცხადა კომპანია Jan De Nul N.V.- ის პროექტის დირექტორმა ერიკ ბეიტსმა, რომელმაც, ქართველ პარტნიორებთან ერთად, ეკონომიკისა და მდგრადი განვითარების მინისტრს მარიამ ქვრივიშვილს ანაკლიის ნავსადგურში მიმდინარე სამუშაოები გააცნო.
მისი თქმით, კომპანია გეგმურად მიჰყვება პროექტის გრაფიკს და ფსკერის დაღრმავების სამუშაოები წლის ბოლოსთვის დასრულდება.
„ტალღმტეხის მოწყობასთან დაკავშირებული სამუშაოები მომავალი წლის ბოლომდე გაგრძელდება, რის შემდეგაც საზღვაო ინფრასტრუქტურის მთლიანი პროექტი დასრულდება,“ - აღნიშნა კომპანია Jan De Nul N.V.- ის პროექტის დირექტორმა.
ერიკ ბეიტსის შეფასებით, ანაკლიის პროექტი მნიშვნელოვანია როგორც უშუალოდ Jan De Nul N.V.- ისთვის, ისე საქართველოს ეკონომიკის სტიმულირების თვალსაზრისით. მისი თქმით, ტალღმტეხის მთლიანი სიგრძე 1380 მეტრია, ის წლიურ ჭრილში 95 %-ით ნავსადგურის ღიაობას უზრუნველყოფს და დიდი გემების მიღება - მომსახურებას შეძლებს.
„რაც შეეხება დაღრმავების სამუშაოებს, ჯამში თითქმის 6 მილიონი კუბური მეტრი გრუნტის ამოღებაა დაგეგმილი, რაც კომპანია Jan De Nul N.V.- ისთვის საკმაოდ მასშტაბური პროექტია,“ - აღნიშნა ერიკ ბეიტსმა.
Jan De Nul N.V. ევროპული ე.წ. „დიდი ოთხეულში!“ შემავალი კომპანიაა, რომელიც ანაკლიაში ნავსადგურის აკვატორიის დაღრმავების და ტალღამტეხის პროექტირება - მშენებლობის სამუშაოებს ახორციელებს.
დღის ტოპ 10 სიახლე
სხვა სიახლეები
თამარ იოსელიანი კომპანია Jan De Nul N.V.-ის საქართველოს ფილიალის დირექტორს შეხვდა, სადაც ანაკლიის ღრმაწყლოვანი ნავსადგურის სამშენებლო სამუშაოების მიმდინარეობაზე იმსჯელეს
12.08.2026.17:27
ეკონომიკისა და მდგრადი განვითარების მინისტრის მოადგილე თამარ იოსელიანი კომპანია Jan De Nul N.V.-ის საქართველოს ფილიალის დირექტორს, ტიმ დევოლდერს შეხვდა. შეხვედრაზე ანაკლიის ღრმაწყლოვანი ნავსადგურის სამშენებლო სამუშაოების მიმდინარეობაზე იმსჯელეს.
შეხვედრა ანაკლიის ნავსადგურის ტერიტორიაზე შედგა, სადაც თამარ იოსელიანი კომპანიის წარმომადგენელთან ერთად, ტალღმტეხის არხის მოსაწყობად მიმდინარე ფსკერდაღრმავების სამუშაოებს გაეცნო.
შეხვედრაზე აღინიშნა, რომ სამუშაოები წინასწარ განსაზღვრული გეგმა-გრაფიკის შესაბამისად, ყველა ძირითადი კომპონენტის გათვალისწინებით მიმდინარეობს. მხარეებმა იმსჯელეს შესრულებულ და მიმდინარე სამუშაოებზე, ტექნიკურ პროცესებზე, ასევე იმ ღონისძიებებზე, რომლებიც უზრუნველყოფს პროექტის შეუფერხებელ და დროულ განხორციელებას.
შეხვედრაში მონაწილეობა მიიღო შპს "ანაკლიის საზღვაო ნავსადგურის" დირექტორმა ზურაბ სიჭინავამ.
