Google Street View-ის პროექტის წარმატებით განხორციელების შემდეგ, საქართველო და Google-ი თანამშრომლობის გაფართოებაზე, მათ შორის ხელოვნური ინტელექტისა და საგანმანათლებლო რესურსების მიმართულებით მუშაობას გეგმავენ. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას GITA - ს თავმჯდომარემ, ავთანდილ კასრაძემ აღნიშნა, Google-მა საქართველოს მთავრობასთან თანამშრომლობის პროცესის ეფექტიანობა განსაკუთრებით დადებითად შეაფასა, ხოლო მხარეებმა შეთანხმება გამოთქვეს, რომ რუკების პროექტის წარმატება ახალი, უფრო ფართომასშტაბიანი ინიციატივების საფუძველი გახდეს.

„ნამდვილად, Google-ის მხრიდან კიდევ ერთხელ გაესვა ხაზი იმას, რომ საქართველოს მთავრობამ ძალიან სწრაფ ტემპებში უზრუნველყო ყველა საჭირო ინსტრუმენტის გადაცემა ამ პროცესის დროულად დასაწყებად. მათ აღნიშნეს, რომ სხვა არცერთ ქვეყანაში მსგავსი პრაქტიკა არ ჰქონიათ.

ჩვენი მესიჯიც სწორედ ის იყო, რომ ეს წარმატება ძალიან კარგი სიგნალი უნდა გახდეს Google-ისთვის, რათა ვითანამშრომლოთ არა მხოლოდ რუკების, არამედ ბევრი სხვა მიმართულებითაც. რა თქმა უნდა, განსაკუთრებული აქცენტი ხელოვნური ინტელექტის სფეროში პარტნიორობაზე გავაკეთეთ, ვინაიდან Google-ის ხელოვნური ინტელექტი ქართული ენის მხარდაჭერის კუთხით ერთ-ერთი ყველაზე განვითარებულია. შესაბამისად, მნიშვნელოვანია ამ ინსტრუმენტების გამოყენება საგანმანათლებლო თუ სხვადასხვა სამუშაო პროცესში.

გარდა ამისა, Google-ს აქვს უამრავი საგანმანათლებლო რესურსი, რომელთა ხელმისაწვდომობაც საქართველოს მოქალაქეებისთვის ძალზედ პრიორიტეტულია. საბოლოოდ, ჩვენ შევთანხმდით, რომ Google Maps-თან დაკავშირებული ეს წარმატებული თანამშრომლობა უფრო ფართომასშტაბიან, ახალ პარტნიორობაში გადაიზარდოს. ამ მიმართულებით Google-ის მხრიდანაც ძალიან დიდი ინტერესი ფიქსირდება“, - აღნიშნა კასრაძემ.