„იგლ ჰილსის“ მასშტაბური პროექტი საქართველოს ტურისტულ სექტორს ხარისხობრივად გარდაქმნის და ქვეყანაში მაღალმხარჯველუნარიანი ვიზიტორების მოზიდვას უზრუნველყოფს, - ამის შესახებ პარლამენტის ეკონომიკური პოლიტიკის კომიტეტის თავმჯდომარემ, შოთა ბერეკაშვილმა განაცხადა. მისი თქმით,  2025 წელს ტურიზმიდან მიღებული რეკორდული 4.7 მილიარდი აშშ დოლარის ფონზე, სამშენებლო-დეველოპერული სექტორი ქვეყნის ტურისტული პოტენციალის გაძლიერებასა და სექტორის შემდგომ განვითარებას უწყობს ხელს.

„დეველოპერული სექტორის როლი განსაკუთრებით მნიშვნელოვანია, რადგან ქვეყნის მზარდი დაკავშირებადობა და შუა დერეფნის ფუნქციის გაძლიერება საქართველოს საინვესტიციო და ტურისტულ მიმზიდველობას ზრდის. აღსანიშნავია, რომ 2025 წელს საქართველოში ტურისტულმა შემოსავალმა რეკორდულ მაჩვენებელს მიაღწია და 4.7 მილიარდ აშშ დოლარი შეადგენდა, რაც უაღრესად მნიშვნელოვანი წარმატებაა.

სამშენებლო-დეველოპერული სექტორი ამ მიმართულებას კიდევ უფრო ავითარებს. ჩვენთვის 2025 წელს განსაკუთრებით დიდი მოვლენა იყო „იგლ ჰილსის“ საქართველოში შემოსვლა. ეს მასშტაბური პროექტია, რომელიც მომდევნო 6-7 წლის განმავლობაში მილიარდობით აშშ დოლარის ინვესტიციას ითვალისწინებს და, ვფიქრობ, სრულად გარდაქმნის ტურისტულ სექტორს. ამ გარდაქმნაში ვგულისხმობ არა მხოლოდ ვიზიტორთა რაოდენობის ზრდას, არამედ მათი მსყიდველუნარიანობის ხარისხობრივ გაუმჯობესებას.

თუ, მაგალითად, დღეის მდგომარეობით თითოეული ვიზიტორი საქართველოში საშუალოდ 650-დან 700 აშშ დოლარამდე ხარჯავს, დეველოპერული სექტორისა და სერვისების განვითარებით ჩვენ შევძლებთ აღნიშნული ციფრის გაორმაგებას. დარწმუნებული ვარ, რომ „იგლ ჰილსის“ მსგავსად საქართველოში არაერთი დიდი საერთაშორისო კომპანია შემოვა და დეველოპერულ ბაზარს კიდევ უფრო კონკურენტუნარიანს გახდის. ეს პოზიტიური პროცესია როგორც ადგილობრივი ბიზნესებისთვის, ისე ქვეყნის საერთაშორისო პოზიციონირების გაძლიერებისთვის“, - განაცხადა გადაცემა „იმედის დილაში“, რუბრიკა Business Insider Georgia-ში სტუმრობისას  შოთა ვერეკაშვილმა.