ინფლაციის ზომიერი მონაცემების ფონზე, Fed-ისგან მომავალ თვეში საპროცენტო განაკვეთის უცვლელად დატოვებაა მოსალოდნელი.

ოთხშაბათს გამოქვეყნებული მონაცემები აჩვენებს, რომ ინფლაცია წლიურ ჭრილში ზედიზედ მეორე თვეა შენელდა, რაც სექტემბერში საპროცენტო განაკვეთის გაზრდის დამატებით საჭიროებაა ნაკლებად აჩვენებს. 

აშშ-ის შრომის სტატისტიკის ბიუროს ინფორმაციით, სამომხმარებლო ფასების ინდექსი ივლისში, წინა წლის იმავე პერიოდთან შედარებით, 3.4%-ით გაიზარდა, ივნისში დაფიქსირებული 3.5%-იანი ზრდის შემდეგ. მაჩვენებელი ეკონომისტების პროგნოზს შეესაბამებოდა. საკვებისა და ენერგიის მერყევი კომპონენტების გამოკლებით, ე.წ. საბაზო ინფლაციამ ივლისში წლიურად 2.5% შეადგინა, ივნისში დაფიქსირებული 2.6%-ის შემდეგ.

მონაცემების დეტალური ანალიზი ინფლაციის უფრო ფართო მასშტაბით გავრცელების გარკვეულ ნიშნებსაც აჩვენებს. ამასთან, ივნისთან შედარებით, ივლისში საბაზო საქონლის უფრო მეტ კატეგორიაში დაფიქსირდა ფასების ზრდა. ხელოვნურ ინტელექტზე გაზრდილი მოთხოვნის ფონზე, ტექნოლოგიური პროდუქტების ფასებიც მკვეთრად გაიზარდა.

ბენზინის ფასების შემცირებამ საერთო ინფლაციაზე კლების მიმართულებით იმოქმედა. თუმცა, გლობალური საწვავის ფასები მიმდინარე თვეში კვლავ გაიზარდა, რადგან აშშ-სა და ირანს შორის ომის ფონზე დაძაბულობა გრძელდება. ჰორმუზის სრუტე, რომლის გავლითაც კონფლიქტის დაწყებამდე, თებერვლის ბოლოს, მსოფლიოში ნავთობის მიწოდების დაახლოებით მეხუთედი გადიოდა, კვლავ დიდწილად ჩაკეტილია.

Fed-ის სამიზნე ინფლაციის მაჩვენებელი პირადი მოხმარების დანახარჯების ფასების ინდექსის წლიური ცვლილების მიხედვით 2%-ს შეადგენს.