საქართველოს ეროვნული ბანკი ინფლაციური მოლოდინების აგვისტოს გამოკითხვის შედეგებს აქვეყნებს, რომელიც ეკონომიკური საქმიანობის მონაწილეთა ინფლაციურ მოლოდინებსა და ეკონომიკური აქტივობის შეფასებებს ასახავს:

• ეკონომიკური საქმიანობის მონაწილეთა მიხედვით, 2026 წლის აგვისტოში ივლისთან შედარებით ერთწლიან პერიოდზე ინფლაციური მოლოდინები შემცირდა. იმ რესპონდენტთა წილი, რომლებიც ფასების ცვლილებას 6%-8%-ის ფარგლებში ფიქრობენ, მნიშვნელოვნად შემცირებულია. მეორე მხრივ, გაზრდილია იმ რესპონდენტთა რაოდენობა, რომლებიც ფასების ზრდას 2%-4%-ის შუალედში და 8%-ზე მეტად მოიაზრებენ.

• ამავე გამოკითხვის მიხედვით, მიმდინარე წლის აგვისტოში ივლისთან შედარებით სამწლიან პერიოდზე ინფლაციური მოლოდინები შემცირებულია. კერძოდ, იმ მონაწილეთა რაოდენობა, რომლებიც მომდევნო სამი წლის მანძილზე ფასების ცვლილებას 4%-6%-ის ინტერვალსა და 8%-ზე მეტად ფიქრობენ, შემცირდა. ამავდროულად, მოიმატა იმ მონაწილეთა რაოდენობამ, რომლებიც ფასების ზრდას 2%-4%- ის შუალედსა და 6%-8%-ის ინტერვალში ელოდებიან.

• გამოკითხულთა აზრით, საკუთარ პროდუქციაზე/მომსახურებაზე ფასების ზრდის მოლოდინი 1 წლიან პერიოდში თითქმის უცვლელად ნარჩუნდება. ერთი მხრივ, მომატებულია იმ რესპონდენტთა რაოდენობა, რომლებიც მომდევნო 1 წლის მანძილზე ფასების მატებას 8%-ზე მეტად და 2%-4%-ის ინტერვალში ფიქრობენ. მეორე მხრივ, იმ რესპონდენტთა რაოდენობა, რომლებიც საკუთარ პროდუქციაზე/მომსახურებაზე ფასების ცვლილებას 6%-8%-ის, 4%-6%-ისა და 0-2%-ის ფარგლებში ელოდებიან, შემცირდა.

• ამავე გამოკითხვის მიხედვით, აგვისტოში ივლისთან შედარებით მოლოდინები ხელფასების ზრდაზე შემცირებულია. კერძოდ, იმ რესპონდენტთა რაოდენობა, რომლებიც ხელფასების ცვლილებას 20%- 30%-ის შუალედსა და 30%-ზე მეტად ელოდებიან, დაკლებულია. ამავდროულად, რესპოდენტთა რაოდენობა, რომლებიც ხელფასების უცვლელად შენარჩუნებას ელოდებიან, გაზრდილია.

• გამოკითხულთა აზრით, აგვისტოში კომპანიაში წარმოებისათვის საჭირო რესურსების გამოყენების ეფექტიანობა (კომპანიის რესურსების რეალური გამოყენება, მაქსიმალურ გამოყენებასთან შედარებით) წინა თვესთან შედარებით შემცირებულია.