დევნილთა, შრომის, ჯანმრთელობისა და სოციალური დაცვის მინისტრი აცხადებს, რომ ქვეყნის ჯანდაცვის სისტემის მთავარი პრიორიტეტებია პირველადი ჯანდაცვა, რეგიონების მაქსიმალური დაფარვა მაღალი ხარისხის სერვისებით და საავადმყოფო ინფრასტრუქტურის განვითარება.

როგორც გადაცემა „იმედის დილაში“ რუბრიკა Business Insider Georgia-ში სტუმრობისას მიხეილ სარჯველაძემ აღნიშნა, ჯანდაცვის სისტემის გაუმჯობესება მოქალაქეთა საჭიროებებზეა დაფუძნებული.

„საქმე რასაც აკეთებს ჩვენი სამინისტრო და მისი თითოეული თანამშრომელი კეთდება მოქალაქეებისთვის. ამიტომ ის, რომ მოქალაქეებს ამის შესახებ ინფორმაცია უნდა ჰქონდეს ბუნებრივია, რომ ეს ჩემი ამოცანაა. პრიორიტეტებს რაც შეეხება, ეს არის ის რაც სჭირდება კარგ ჯანდაცვას, კარგ სოციალურ უზრუნველყოფას. ამის მიხედვით მოიყრის თავს კონკრეტულად ეს პრიორიტეტებიც. ეს არის რა თქმა უნდა კარგი ინფრასტრუქტურა, ტექნოლოგიური განვითარება, რომლის მიმართულებითაც აუცილებლად გვექნება გარკვეული გეგმები განხორციელებული. არ შეიძლება ამ თვალსაზრისით არ გამოვყოთ იგივე რესპუბლიკური საავადმყოფოს მიმართულებით, რუხის რესპუბლიკური საავადმყოფოს, რამდენიმე რეგიონული საავადმყოფოს მიმართულებით - ეს მნიშვნელოვანია. პირველადი ჯანდაცვა აუცილებლად დარჩება რა თქმა უნდა პრიორიტეტად, თუმცა აქ განსაკუთრებულად უნდა აღინიშნოს, რომ ჩვენთვის რაც ყველაზე მეტად მნიშვნელოვანია, ეს არის რეგიონების დაფარვა მაქსიმალურად მაღალი და კომფორტული ხარისხის მქონე სერვისებით.  გარკვეული პროგრამული ცვლილებები შეიძლება იყოს, მაგალითად კვლავაც ორიენტირებული მაღალი ხარისხის სერვისების მიღებაზე. ეს გულისხმობს, რომ იქ სადაც რა კომპონენტი აკლია, შეიძლება ეს წარმოადგენდეს ამ შემთხვევაში ჩვენი შემდგომი მუშაობის გაგრძელების საბაბსა და მიზანს. ფასების პოლიტიკის რეგულირება, ესეც რა თქმა უნდა არანაკლებად მნიშვნელოვანია. ჩვენ ვფიქრობთ როგორ გავხადოთ მედიცინა უფრო აკადემიური, აი ამ პრაქტიკული მედიცინა აკადემიური გახდეს, ამიტომ იგივე განათლების მიმართულებით, უწყვეტი სამედიცინო განათლების მიმართულებით გვაქვს გარკვეული გეგმები. გეგმები უკავშირდება იგივე სამედიცინო შეცდომების მინიმიზაციის სურვილს და ამოცანას. ესეც ნუ სამწუხაროდ ისე მოხდა, რომ ბევრი წლის განმავლობაში ვერ დაინერგა ინსტრუმენტები, რომლის მეშვეობითაც დარეგულირდებოდა სამედიცინო შეცდომები - ამის აღრიცხვა ერთის მხრივ და შემდეგ მუშაობა იმაზე, რომ ეს კლებად რეჟიმში იყოს. ამიტომ ყველაფერი ეს ჩვენი ინტერესის საგანი იქნება და ვნახოთ ალბათ შევეცდებით რომ მომდევნო წლის ამ დროისთვის გვქონდეს უფრო მნიშვნელოვანი და ხელშესახები რეზულტატი“, - განაცხადა მინისტრმა.