ინფრასტრუქტურის სამინისტროს წარმომადგენლები სტამბოლში გამართულ საერთაშორისო კონფერენციაზე მონაწილეობენ
თურქეთის რესპუბლიკაში, სტამბოლში, წყლის საერთაშორისო მე-5 კონფერენცია გაიმართა, რომელშიც საქართველოს ინფრასტრუქტურის მინისტრის მოადგილე ილია ბეგიაშვილი და საქართველოს გაერთიანებული წყალმომარაგების კომპანიის დირექტორის მოადგილე ბექა ბარბაქაძე მონაწილეობდნენ.
კონფერენციის ფარგლებში ილია ბეგიაშვილმა მონაწილეებს სიტყვით მიმართა და ყურადღება გაამახვილა წყლის რესურსების მდგრადი მართვის მნიშვნელობაზე, როგორც ქვეყნის სოციალურ-ეკონომიკური განვითარების, გარემოს დაცვისა და მოსახლეობის ცხოვრების ხარისხის გაუმჯობესების ერთ-ერთ ძირითად წინაპირობაზე.
მისი თქმით, საქართველოში აქტიურად მიმდინარეობს წყალმომარაგებისა და წყალარინების ინფრასტრუქტურის განვითარება. ამ მიმართულებით ხორციელდება როგორც მიმდინარე, ისე ახალი პროექტები, რომლებიც მიზნად ისახავს თანამედროვე, მდგრადი და ევროპულ სტანდარტებთან შესაბამისი სისტემების დანერგვას და მოსახლეობისათვის ხარისხიანი, უწყვეტი წყალმომარაგების უზრუნველყოფას.
მინისტრის მოადგილემ ასევე ისაუბრა კლიმატის ცვლილებით გამოწვეულ გამოწვევებზე და აღნიშნა, რომ წყლის რესურსების ეფექტიანი მართვა საჭიროებს კოორდინირებულ, მრავალსექტორულმიდგომას.
ილია ბეგიაშვილის განცხადებით, განსაკუთრებული მნიშვნელობა ენიჭება რეგიონული თანამშრომლობის გაძლიერებას, გამოცდილების გაზიარებასა და პარტნიორ ქვეყნებთან ერთობლივ მუშაობას. მან ხაზი გაუსვა საერთაშორისო პარტნიორების მხარდაჭერის მნიშვნელოვან როლს წყლის სექტორის მდგრად განვითარებაში.
წყლის საერთაშორისო მე-5 კონფერენცია წარმოადგენს პლატფორმას, რომელიც აერთიანებს სახელმწიფო უწყებების, საერთაშორისო ორგანიზაციების, კერძო სექტორის, აკადემიური წრეებისა და დარგის ექსპერტების წარმომადგენლებს. ღონისძიების მიზანია წყლის რესურსების მდგრად მართვასთან დაკავშირებული თანამედროვე მიდგომების განხილვა, არსებული გამოწვევების შეფასება და საერთაშორისო გამოცდილების გაზიარება.
კონფერენციის ფარგლებში მონაწილეები განიხილავენ წყლის რესურსების მართვის, წყალმომარაგებისა და წყალარინების ინფრასტრუქტურის მოდერნიზაციის, კლიმატის ცვლილებასთან ადაპტაციის, წყლის დანაკარგების შემცირებისა და თანამედროვე ტექნოლოგიების დანერგვის საკითხებს. ღონისძიება ხელს უწყობს ქვეყნებს შორის თანამშრომლობის გაღრმავებას და ეფექტიანი, მდგრადი გადაწყვეტილებების შემუშავებას.
ინფორმაციას ინფრასტრუქტურის სამინისტრო ავრცელებს.
სხვა სიახლეები
ჩინეთს ცენტრალური ადგილი უკავია საქართველოსთვის, როგორც საექსპორტო ბაზარს - ის ძალიან მნიშვნელოვანი პარტნიორია, თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება | ირაკლი ნადარეიშვილი CGTN-თან ინტერვიუში
11.09.2026.18:29
„ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს - შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - ამის შესახებ ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა ჩინურ ტელეარხ CGTN-ისთვის (China Global Television Network) მიცემულ ინტერვიუში განაცხადა, სადაც საქართველოს ჩინეთის მომსახურებით ვაჭრობის საერთაშორისო გამოფენაში CIFTIS-ში მონაწილეობასა და ფორუმის მნიშვნელობაზე ისაუბრა.
ირაკლი ნადარეიშვილმა აღნიშნა, რომ CIFTIS-ში მონაწილეობა მნიშვნელოვანია არა მხოლოდ გამოცდილების გაზიარებისთვის, არამედ კონტაქტების დამყარებისა და ახალი პარტნიორობების ჩამოყალიბებისთვისაც.
„მოუთმენლად ველოდებით, რომ ქართული ბიზნესი და კერძო სექტორი ახალ პარტნიორებს შეხვდება. მაგალითად, IT და ტექნოლოგიების სექტორს თუ ავიღებთ, ბოლო ხუთი წლის განმავლობაში ეს საქართველოსთვის ძალიან საინტერესო წარმატების ისტორიად იქცა, ვინაიდან თითქმის ნულოვანი ნიშნულიდან განვითარდა და დღეს საქართველოს მშპ-ის (GDP) თითქმის 10%-ს შეადგენს. ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს. შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - აღნიშნა ირაკლი ნადარეიშვილმა.
მინისტრის მოადგილემ CGTN-თან ინტერვიუში განმარტა, რომ საქართველო CIFTIS-ში მონაწილეობას პირველად იღებს. მანვე იმ შესაძლებლობებზე გაამახვილა ყურადღება, რომელსაც ეს პლატფორმა მონაწილე კომპანიებსა და ქვეყნებს სთავაზობს.
ირაკლი ნადარეიშვილმა ყურადღება გაამახვილა საქართველო-ჩინეთის ურთიერთობებზე და აღნიშნა, რომ ჩინეთს, როგორც საექსპორტო ბაზარს, საქართველოსთვის ცენტრალური ადგილი უკავია.
„უპირველეს ყოვლისა, ეს ერთ-ერთი უდიდესი ბაზარია, საქართველოს კი ნამდვილად სჭირდება ბაზრების დივერსიფიკაცია ერთი კონკრეტული რეგიონიდან უფრო ფართო გეოგრაფიაზე. ჩინეთი ძალიან მნიშვნელოვანი პარტნიორია. თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება. როდესაც CIFTIS-სა და მომსახურების სექტორზე ვსაუბრობთ, ვფიქრობ, ეს ჩვენს ორმხრივ თანამშრომლობას კიდევ ერთ ახალ განზომილებას შემატებს, რათა ანალოგიურად ვიმუშაოთ მომსახურების სფეროს განვითარებაზე, ექსპორტსა და ინვესტიციებზე. სწორედ ამის მიღწევას ველით ამ ღონისძიებიდან და ზოგადად, ჩვენი ორმხრივი ურთიერთობების დღის წესრიგიდან", - განაცხადა ირაკლი ნადარეიშვილმა ჩინურ ტელეარხთან საუბრისას.
