ინფრასტრუქტურულ პროექტებში ჩართვას მხოლოდ პასუხისმგებლიანი კომპანიები შეძლებენ - რევაზ სოხაძე
„სამშენებლო სექტორის გაჯანსაღება ქვეყნის განვითარების ერთ-ერთი უმთავრესი პრიორიტეტია. ბოლო ერთი წლის განმავლობაში სახელმწიფოს მიდგომები მნიშვნელოვნად გამკაცრდა, ჩვენ უკომპრომისოები ვიქნებით როგორც ხარისხთან, ასევე პროექტების დროულად განხორციელების კუთხით “, - განაცხადა ინფრასტრუქტურის მინისტრმა რევაზ სოხაძემ „იმედის დილაში“, რუბრიკა Business Insider Georgia-ში სამშენებლო კომპანიებთან შეხვედრის შეფასებისას.
მინისტრის თქმით, მთავრობამ ბიზნესთან თანამშრომლობით გადადგა ნაბიჯები, რომლებიც მიზნად ისახავს პროცესის გაჯანსაღებას და კონკურენტული გარემოს შექმნას.
რევაზ სოხაძემ განმარტა, რომ ერთ-ერთი მნიშვნელოვანი ინიციატივაა ფასების ინდექსაცია, რაც გულისხმობს პროექტების ღირებულების გადახედვას და ბიზნესის დაცვას გაუთვალისწინებელი რყევებისგან. ასევე გათვალისწინებულია ზედნადები ხარჯების ზრდა მინიმუმ 14%-ით, სხვადასხვა სამუშაოზე განსხვავებული მაჩვენებლებით. შესყიდვების კანონში ცვლილებების შედეგად მცირე მეწარმეებს მიეცათ გაერთიანების შესაძლებლობა, რაც ბაზარს უფრო გახსნის და კონკურენციას გააძლიერებს. გარდა ამისა, განხორციელდა საერთაშორისო ტენდერების გახსნა საგზაო ინფრასტრუქტურის მიმართულებით, რაც სექტორის განვითარებასა და ინვესტორების დაინტერესებას კიდევ უფრო შეუწყობს ხელს.
„ფასების ინდექსაცია არ ნიშნავს მხოლოდ ფასის მატებას - ეს არის გადახედვა. თუ სტრატეგიულ პროდუქტზე, მაგალითად ბიტუმზე, ფასი უცბად მოიმატებს, სახელმწიფოს მხრიდან ინდექსაცია ნიშნავს, რომ ბიზნესს კრიზისში არ ჩავაგდებთ. ხოლო როდესაც ფასი კლებულობს, სახელმწიფო ანალოგიურად იღებს გადაწყვეტილებას,“ - განაცხადა რევაზ სოხაძემ.
ინფრასტრუქტურის მინისტრმა ხაზგასმით აღნიშნა, რომ სამუშაოს შესრულებისას სახელმწიფოს მხრიდან კონტროლი მაქსიმალურად გაძლიერდება.
„ჩვენ ვითხოვთ ხარისხიანად აშენებულ სკოლებს, ბაღებს, სპორტულ კომპლექსებს. სახელმწიფო დაკვეთის მიღებისას არავის უნდა ჰქონდეს განცდა, რომ შეძლებს მანიპულაციას. მოთხოვნა იქნება ისეთივე, როგორც კერძო დამკვეთს ექნებოდა“,- განაცხადა რევაზ სოხაძემ.
მინისტრის თქმით,ახალი მიდგომები ქმნის სამართლიან და გამჭვირვალე გარემოს, სადაც წარმატებას მიაღწევენ მხოლოდ ის კომპანიები, რომლებიც ხარისხიანად და პასუხისმგებლობით მუშაობენ.
„ახალი ინციატივების განხორციელება არა მხოლოდ ინვესტორების დაინტერესებას და ბიზნესის წინსვლას შეუწყობს ხელს, არამედ უზრუნველყოფს იმასაც, რომ ინფრასტრუქტურულ პროექტებში სხვა ინტერესებით მოქმედი ჯგუფები ვეღარ შეძლებენ სისტემაში ჩარევას. კორუფცია ყველაზე მეტად ანგრევს ქვეყანას. საქართველოს მთავრობის ნაბიჯები ერთჯერადი არ არის - ეს იქნება პერმანენტული პროცესი, რათა სისტემა მთლიანად გათავისუფლდეს ამ მავნე სენისგან,“ - აღნიშნა ინფრასტრუქტურის მინისტრმა.
დღის ტოპ 10 სიახლე
სხვა სიახლეები
ივნისის თვეში დაფიქსირებული გადაზიდვების რეკორდული მაჩვენებლები არის იმ ეფექტიანი მართვისა და პროექტების დამსახურება, რომელსაც ახალი მენეჯმენტი ახორციელებს „საქართველოს რკინიგზაში" - თამარ იოსელიანი
08.07.2026.18:56
„ივნისის თვეში დაფიქსირებული გადაზიდვების რეკორდული მაჩვენებლები არის იმ ეფექტიანი მართვისა და პროექტების დამსახურება, რომელსაც ახალი მენეჯმენტი ახორციელებს „საქართველოს რკინიგზაში" - ამის შესახებ ეკონომიკისა და მდგრადი განვითარების მინისტრის მოადგილემ, თამარ იოსელიანმა განაცხადა.
ოფიციალური მონაცემებით, 2026 წლის ივნისში, საქართველოს რკინიგზამ 1 361 484 ტონა ტვირთი გადაზიდა, რაც ბოლო ათწლეულის რეკორდული მაჩვენებელია.
„უნდა აღინიშნოს, რომ ბოლო 1 წლის განმავლობაში ნამდვილად თვალსაჩინოა ის შედეგები, რაც საქართველოს რკინიგზამ დანერგა. ძალიან ბევრი მიმართულებით გვაქვს გაუმჯობესება როგორც საოპერაციო ნაწილში, ასევე შესაბამის მაჩვენებლებში. მნიშვნელოვანია აღვნიშნოთ ის წარმატებული პროექტები, რომელიც წინა და მიმდინარე წლის განმავლობაში საოპერაციო ნაწილში განხორციელდა - გამოვყოფდი, რა თქმა უნდა, უღელტეხილის მოდერნიზაციის პროექტს, რომელიც 2025 წლის დეკემბერში დასრულდა და სრულ ოპერირებაში შევიდა უღელტეხილის ნაწილი, ასევე ძალიან მნიშვნელოვანია ბაქო-თბილისი-ყარსის რკინიგზის სრულ ექსპლუატაციაში შესვლა, რაც ნამდვილად აძლიერებს რკინიგზის როლს, ზოგადად, შუა დერეფნის კონტექსტში" - აღნიშნა თამარ იოსელიანმა.
მინისტრის მოადგილემ ხაზი გაუსვა შუა დერეფანში ტვირთნაკადის მზარდ დინამიკას. მისი შეფასებით, ძალიან მნიშვნელოვანი მაჩვენებლები ფიქსირდება, ზოგადად, ტვირთების ზრდის კუთხით და აქ მნიშვნელოვანი კომპონენტი არის სწორედ საქართველოს რკინიგზის გამართულად მუშაობა.
„საქართველოს მთავრობას აქვს თანმიმდევრული გეგმა და ხედვა, თუ როგორ უნდა განვითარდეს ქვეყანაში ტრანსპორტისა და ლოგისტიკის სექტორი და ყველა მულტიმოდალური მიმართულება ერთმანეთთან თანხვედრაშია. რამდენიმე დღის წინ გამოვაცხადეთ გადაწყვეტილება ანაკლიის ღრმაწყლოვანი ნავსადგურის განვითარებასთან დაკავშირებით, ასევე გვქონდა 10 წლიანი ხედვის წარდგენა საქართველოს რკინიგზის ისტორიულ განახლებასთან დაკავშირებით და შესაბამისად, ეს ორივე კომპონენტი გვაძლევს იმის თქმის საშუალებას, რომ შუა დერეფანში ვართ სანდო პარტნიორი და მზად ვართ, ეფექტურად მოვემსახუროთ გაორმაგებულ ტვირთებს" - აღნიშნა ეკონომიკისა და მდგრადი განვითარების მინისტრის მოადგილემ.
