ტურიზმს უდიდესი გავლენა აქვს ადგილობრივ სოციალურ-ეკონომიკურ განვითარებაზე, - განაცხადა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას თბილისის მერიის ეკონომიკური განვითარების საქალაქო სამსახურის უფროსმა, ვახტანგ ლომჯარიამ. მისი თქმით, თბილისის ტურიზმის სექტორში დინამიკა განსაკუთრებით მაღალია.

„ცხადია, აქტივობა კვარტალურად არის გადანაწილებული და სეზონების მიხედვით განსხვავდება როგორც წესი, ჩვენთანაც ისეთივე გლობალური ტენდენციები მეორდება, როგორიც მთელ მსოფლიოშია. თუმცა, დინამიკა შთამბეჭდავია: თუ მაგალითად, 2010 წელს თბილისში სასტუმრო ნომრების რაოდენობა სულ რაღაც 3 300-მდე იყო, გასულ წელს ამ ციფრმა 15 000-ს გადააჭარბა. ამასთანავე, წლიდან წლამდე საგრძნობლად იზრდება მაღალი კლასის, ლუქს კატეგორიის ნომრების წილიც.

ტურიზმს უდიდესი გავლენა აქვს ადგილობრივ სოციალურ-ეკონომიკურ განვითარებაზე. ამ სექტორს სწრაფი შემოსავლების გენერირება ახასიათებს, რაც ტურიზმის სფეროში დასაქმებულ მოსახლეობას სიღარიბიდან სწრაფად თავის დაღწევის შესაძლებლობას აძლევს. თუმცა, ამავდროულად, ეს არის ერთ-ერთი ყველაზე მოწყვლადი დარგი - გლობალური თუ რეგიონული კრიზისების დროს, პირველი დარტყმა, როგორც წესი, სწორედ სტუმარმასპინძლობის სფეროზე მოდის.

მიუხედავად ამისა, თბილისი ტურიზმის მიმართულებით ძალიან ძლიერი ქალაქია - ეს არის სამხრეთ კავკასიაში ერთ-ერთი მთავარი მიმართულება, რომელიც მოგზაურებს მოკლევადიანი ვიზიტებისთვის პირველ რიგში ახსენდებათ. დინამიკა იმდენად შთამბეჭდავია, რომ ბოლო სამი წლის განმავლობაში ტურიზმიდან მიღებული შემოსავლები ფაქტობრივად მანამდე არსებული რვა წლის ჯამურ მაჩვენებელს უტოლდება. ეს ყველაფერი უზომოდ მნიშვნელოვანია, თუმცა, ამავდროულად, კარგად უნდა ვაცნობიერებდეთ, რომ ეს დარგი განსაკუთრებულ მოფრთხილებას საჭიროებს. ჩვენ ვიცით, რომ კრიზისის დროს ტურიზმი ეკონომიკურ ციკლებს ვერ უსხლტება და ეს ფაქტორი სტრატეგიულად ყოველთვის უნდა გავითვალისწინოთ“, - აცხადებს ლომჯარია.