ის მიდგომები, რომლებიც სახელმწიფოს მიერ უკვე დაინერგა, კალაპოტში სვამს ენერგეტიკის დარგს და ძალიან მნიშვნელოვანია - გიორგი მარგებაძე
მცირე და საშუალო ჰესების ასოციაციის ხელმძღვანელის გიორგი მარგებაძის განცხადებით, ენერგეტიკის სექტორში სახელმწიფოს მიერ დანერგილი მიდგომები მნიშვნელოვანია დარგის განვითარებისთვის. ამის შესახებ გიორგი მარგებაძემ „ეკონომიკური ფორუმის“ ფარგლებში ენერგეტიკის საკითხებზე გამართული დისკუსიის შეფასებისას ისაუბრა, რომელშიც მონაწილეობა მიიღეს ეკონომიკისა და მდგრადი განვითარების მინისტრმა მარიამ ქვრივიშვილმა, სახელმწიფო და კერძო სექტორის წარმომადგენლებმა.
„ის მიდგომები, რომლებიც სახელმწიფოს მიერ უკვე დაინერგა, ჩარჩოში და კალაპოტში სვამს ენერგეტიკის დარგს და ძალიან მნიშვნელოვანია. სხვადასხვა საკითხებთან ერთად განვიხილეთ საკანონმდებლო თემები - კანონში შესატანი ცვლილება ქონების გადასახადის საკითხთან დაკავშირებით, ყველა სადგურს თავად მოუწევს სერიოზული კონტრიბუციის გაკეთება რეგიონებში და შესაბამისად, ეს კანონმდებლობა ძალიან მნიშვნელოვანი იქნება“, - აღნიშნა მცირე და საშუალო ჰესების ასოციაციის ხელმძღვანელმა.
ამასთან, გიორგი მარგებაძის ინფორმაციით, შეხვედრისას საუბარი შედგა სახელმწიფოს გადაწყვეტილებაზე ენერგეტიკის სექტორში ჯარიმების პატიების თაობაზე და აღნიშნა, რომ ეს ასევე მნიშვნელოვანი გადაწყვეტილებაა, რომელიც დარგის განვითარებას წაადგება.
ასევე მან ყურადღება გაამახვილა შავი ზღვის წყალქვეშა კაბელის პროექტსა და მის აუცილებლობაზე.
„გამომდინარე იქიდან, რომ ასეთი მნიშვნელობის პროექტი იქნება განხორციელებული, მის აუცილებლობაზე, თანმდევ საკითხებზე ვისაუბრეთ, რომელიც მოიცავს ელექტროქსელების და ინფრასტრუქტურის განვითარებას, გაჯანსაღებას და ზოგადად ახალი გენერაციების ექსპლუატაციაში შეყვანას", - აღნიშნა გიორგი მარგებაძემ.
დღის ტოპ 10 სიახლე
სხვა სიახლეები
თბილისის თავისუფალი ინდუსტრიული ზონა განცხადებას ავრცელებს
06.08.2026.19:08
თბილისის თავისუფალი ინდუსტრიული ზონა განცხადებას ავრცელებს. როგორც განცხადებაშია აღნიშნული, ბოლო პერიოდში თბილისის თავისუფალ ინდუსტრიულ ზონაში მიმდინარე საქმიანობასთან დაკავშირებით გავრცელდა ინფორმაცია, რომელიც არ შეესაბამება სიმართლეს.
„საზოგადოების სწორად ინფორმირების მიზნით, თბილისის თიზ-ი საჭიროდ მიიჩნევს რამდენიმე საკითხის დაზუსტებას.
თბილისის თიზ-ში სანქცირებული კრიპტოკომპანიები არ ოპერირებენ. მედიაში გავრცელებული ინფორმაცია, თითქოს სანქცირებული კრიპტოკომპანიები ამჟამად თბილისის თავისუფალ ინდუსტრიულ ზონაში საქმიანობენ, არ შეესაბამება სინამდვილეს.
სიუჟეტში ნაჩვენები ობიექტი დიდი ხანია არ ფუნქციონირებს. ობიექტი, რომელიც გავრცელებულ მასალებში მოქმედ ინფრასტრუქტურად არის წარმოჩენილი, დღეისათვის უმოქმედოა და დასრულებულია მისი დემონტაჟიც.
არ არის წარმოდგენილი არანაირი მტკიცებულება, სანქცირებული კომპანიების კავშირზე მაინინგ კომპანიებთან. ამგვარი კავშირის შესახებ გავრცელებული ვარაუდები არ არის გამყარებული ფაქტობრივი მტკიცებულებებით და არ შეესაბამება სიმართლეს. ამასთან, კრიპტო მაინინგი თიზ-ში ფაქტობრივად აღარ მიმდინარეობს, თუ არ ჩავთვლით ერთ ობიექტს რომელიც მილევად რეჟიმშია და არ აქვს კავშირი სიუჟეტში ნახსენებ კომპანიასთან.
არასწორია ელექტროენერგიის ღირებულებასთან და დღგ-სთან დაკავშირებით გავრცელებული ინტერპრეტაციაც. თიზ-ების შესახებ საქართველოს კანონმდებლობის შესაბამისად, რომელიც 2007-2008 წლებიდანაა დამკვიდრებული, საქართველოდან თავისუფალ ინდუსტრიულ ზონებში პროდუქციის, მათ შორის ელექტროენერგიის მიწოდება განიხილება როგორც ექსპორტი, შესაბამისად იგი გათავისუფლებულია დღგ-სგან, ხოლო საქართველოს სხვა ტერიტორიაზე ელექტროენერგიის მომხმარებლებისთვის დღგ არ წარმოადგენს რეალურ ხარჯს, ვინაიდან მასზე კანონმდებლობით ვრცელდება ჩათვლის უფლება. შესაბამისად, საკითხის წარმოჩენა ისე, თითქოს დღგ-ს რეჟიმი თბილისის თიზ-ში მოქმედ კომპანიებს ავტომატურად 18%-იან უპირატესობას აძლევს ელექტროენერგიის შესყიდვისას, არასწორია.
თბილისის თავისუფალი ინდუსტრიული ზონა ფუნქციონირებს საქართველოს კანონმდებლობის შესაბამისად. მის საქმიანობაზე, კანონით განსაზღვრული უფლებამოსილების ფარგლებში, ზედამხედველობას ახორციელებენ საქართველოს ეკონომიკისა და მდგრადი განვითარების სამინისტრო და საქართველოს ფინანსთა სამინისტრო.
2023 წლიდან, ახალი მფლობელის პირობებში, თბილისის თიზ-ში მიმდინარეობს ინფრასტრუქტურის აქტიური განვითარება და მაღალი ხარისხის ბიზნეს ეკოსისტემის ჩამოყალიბება. ამ პერიოდში ზონაში ამუშავდა 15 ახალი საწარმო, გადამამუშავებელი და სასაწყობო პროექტი, ამოქმედდა 12 ახალი ინფრასტრუქტურული ობიექტი და მოზიდულია 70 მილიონი ლარის მოცულობის ინვესტიცია.
თბილისის თიზ-ის პრიორიტეტია კანონმდებლობის სრული დაცვით მოქმედი ინვესტორებისა და ბიზნესპროექტების მოზიდვა და ქვეყნის ეკონომიკური განვითარების ხელშეწყობა.
თბილისის თიზ-ის შესახებ ინფორმაცია განთავსებულია როგორც კომპანიის ვებგვერდზე, ასევე სოციალური მედიის არხებზე (Facebook; LinkedIn) და აქტიურად ახლდება. თიზ-ი ასევე მზადაა მის საქმიანობასთან დაკავშირებულ ნებისმიერ საკითხზე გასცეს დეტალური და გადამოწმებადი ინფორმაცია“, - ნათქვამია ინფორმაციაში.
