Fitch-მა „იშბანკ საქართველოს“ 'B+' საკრედიტო რეიტინგი მიანიჭა სტაბილური პერსპექტივით. საკრედიტო-სარეიტინგო კომპანია მიიჩნევს, რომ Isbank Turkiye-ს შვილობილი ბანკის მხარდაჭერის მაღალი მზაობა აქვს, რაც განპირობებულია მისი სრული საკუთრებით, საერთო ბრენდით, შვილობილ ბანკთან ინტეგრაციის მაღალი დონითა და იმ ფაქტით, რომ „იშბანკ საქართველოს“ მცირე ზომიდან გამომდინარე, საჭიროების შემთხვევაში მხარდაჭერის ღირებულება ბანკისთვის დაბალია. თუმცა, მხარდაჭერის შესაძლებლობა თავად Isbank Turkiye-ს გრძელვადიანი უცხოურ ვალუტაში ემიტენტის დეფოლტის 'BB-' რეიტინგითაა შეზღუდული.

„იშბანკ საქართველოს“ რეიტინგი Isbank Turkiye-ს რეიტინგზე ერთი საფეხურით დაბალია, რაც ასახავს იმას, რომ ბანკი ოპერირებს სტრატეგიულად მნიშვნელოვან, თუმცა ჯგუფისთვის შედარებით მცირე ბაზარზე. სააგენტოს შეფასებით, „იშბანკ საქართველოს“ შესაძლო გასხვისება ძირითადი ჯგუფის ბიზნესპოზიციას არსებითად არ შეცვლის (A potential divestment of ISBG would not fundamentally alter the parent group's franchise).

,,იშბანკ საქართველო" მცირე ზომის ბანკია - 2026 წლის პირველი კვარტლის ბოლოს მისი აქტივები 230 მილიონ აშშ დოლარს შეადგენდა. ჯგუფის წარმომადგენლები აქტიურად მონაწილეობენ შვილობილი ბანკის მნიშვნელოვან გადაწყვეტილებებში, მათ შორის, საკრედიტო პორტფელის უმეტესი ნაწილის დამტკიცებაში", - წერს Fitch.

Fitch-ის თქმით, ,,იშბანკ საქართველოს" ბანკს ადგილობრივ კონკურენტებთან შედარებით უფრო კონსერვატიული რისკის პროფილი აქვს. იშბანკ საქართველო ძირითადად მოკლევადიან დაფინანსებას უზრუნველყოფს საქართველოს უმსხვილესი კომპანიებისა და საქართველოში მოქმედი თურქული ბიზნესებისთვის. ბანკის ექსპოზიცია ციკლური სექტორების მიმართ, როგორიცაა მიმდინარე სამშენებლო პროექტები, უძრავი ქონება და სტუმარმასპინძლობა, შეზღუდულია - 2025 წლის ბოლოს ამ სექტორებზე მოდიოდა სესხების მხოლოდ 8%. ასევე, საცალო დაკრედიტების წილი დაბალია. სესხების დოლარიზაცია 2025 წლის ბოლოს 59% იყო, რაც კორპორაციული დაკრედიტების მიმართულებით სექტორის საშუალო მაჩვენებელს შეესაბამება.

,,ბანკის საკრედიტო რისკი ძირითადად უკავშირდება სესხების მაღალ კონცენტრაციასა და დოლარიზაციას (2025 წლის ბოლოს სესხები აქტივების 52%-ს შეადგენდა), ასევე ადგილობრივი კორპორაციული ობლიგაციების პორტფელს (13%). ხუთ უმსხვილეს მსესხებელზე მოდიოდა მთლიანი სასესხო პორტფელის 36%. მიუხედავად ამისა, კონსერვატიული საკრედიტო პოლიტიკის წყალობით ბანკი წლების განმავლობაში ინარჩუნებს აქტივების მაღალ ხარისხს", - აღნიშნავს Fitch-ი.

საკრედიტო-სარეიტინგო კომპანიის თანახმად, 2026 წლის პირველი კვარტლის ბოლოს ბანკის კაპიტალის ადეკვატურობის კოეფიციენტი 26.3% იყო. ამასთან, ბანკის დაფინანსების ძირითადი წყაროებია კლიენტების დეპოზიტები (2025 წლის ბოლოს ვალდებულებების 59%).