ITU – ს ევროპის ოფისის ხელმძღვანელი - საქართველოს პროაქტიული მიდგომა და ევროპულ სტრუქტურებთან კოორდინაცია დიდ სარგებელს მოუტანს ციფრული კავშირების თვალსაზრისით
„ინტერნეტმმართველობის ფორუმი არის უმნიშვნელოვანესი მრავალმხრივი პლატფორმა, რომელიც ხელს უწყობს ქვეყანაში ციფრულ განვითარებას და, ამავდროულად, აკავშირებს მას გლობალურ საზოგადოებასთან," - განაცხადა საერთაშორისო სატელეკომუნიკაციო კავშირის (ITU) ევროპის ოფისის ხელმძღვანელმა იაროსლავ პონდერმა, რომელიც საქართველოში სამუშაო ვიზიტით იმყოფება.
იაროსლავ პონდერმა ინტერნეტ - მმართველობის ფორუმში მიიღო მონაწილეობა. „ჩვენ აქ ვიმყოფებით, რათა გავმართოთ საკოორდინაციო შეხვედრების სერია საქართველოს მთავრობასთან და ხელი შევუწყოთ ციფრულ განვითარებას, განსაკუთრებული აქცენტით განვითარებად ტექნოლოგიებზე, როგორიცაა ხელოვნური ინტელექტი. აღსანიშნავია მთავრობის მიდგომა - უზრუნველყოს ხელოვნური ინტელექტის ეკონომიკურ ღირებულებად გარდაქმნა და ქვეყნის სოციალურ-ეკონომიკური ზრდის სტიმულირება," - აღნიშნა საერთაშორისო სატელეკომუნიკაციო კავშირის ევროპის ოფისის ხელმძღვანელმა.
იაროსლავ პონდერმა დადებითად შეაფასა საქართველოში ინტერნეტ - ინფრასტრუქტურის განვითარების პროცესი. „ვამაყობთ, რომ საქართველოში ვხედავთ ინტერნეტის შეღწევადობის მაღალ მაჩვენებლებს და ინვესტიციებს ინფრასტრუქტურის, მათ შორის 5G-ის დანერგვაში, რაც სასიცოცხლოდ მნიშვნელოვანია იმ დროს, როდესაც მოსახლეობა აქტიურად იყენებს ხელოვნურ ინტელექტს. საქართველოს ხელისუფლების პროაქტიული მიდგომა და ევროპულ სტრუქტურებთან კოორდინაცია დიდ სარგებელს მოუტანს ქვეყანას, განსაკუთრებით კი ციფრული კავშირების თვალსაზრისით," - აღნიშნა მან.
„ჩვენ ვგეგმავთ მუშაობას არა მხოლოდ საქართველოში, არამედ მთელ რეგიონში ისეთ გამოწვევებზე, როგორიცაა ციფრული უნარების განვითარება, ხელოვნური ინტელექტის დანერგვა საწარმოო დონეზე და მისი გამოყენება მოქალაქეების მიერ. ეს აუცილებელია იმისთვის, რომ ინფრასტრუქტურულმა ინვესტიციებმა შედეგი გამოიღოს და ციფრულ კავშირს ქვეყნისთვის რეალური, შინაარსობრივი დანიშნულება ჰქონდეს. ჩვენ მოუთმენლად ველით საქართველოსთან თანამშრომლობის გაგრძელებას," - აღნიშნა იაროსლავ პონდერმა.
სხვა სიახლეები
ჩვენი შეფასებით, მოხმარების წლიური 3.4%-იანი ზრდისა და 2028 წლიდან სსე-ს 200 მგვტ ბატარეის მიუხედავად, 2030 წელს წლიური გენერაციის 6-10% მაინც ჭარბი იქნება | Galt & Taggart
20.11.2026.13:00
გალტ & თაგარტმა ენერგეტიკის სექტორის შესახებ ახალი მნიშვნელოვანი ანგარიში გამოსცა "ზაფხულში სიჭარბე, ზამთარში დეფიციტი: რა უნდა მოგვცეს ახალმა აუქციონმა?"
,,დღევანდელი წახალისება და სისტემის საჭიროება - დღეს ყველაზე კარგი პირობები მზის სადგურებს აქვს, ქვეყანას კი ყველაზე მეტად ჰესები და ქარის სადგურები სჭირდება. ჩვენი შეფასებით, მიმდინარე CfD ტარიფით მზის სადგურების უკუგება 15.2%-ია, ქარის სადგურების 12.5%, ხოლო მოდინებაზე ჰესის კი 8.5%. ამასთან, მზის სადგურის CfD მთელი წელი მოქმედებს, ქარის სადგურის 9 თვე, ხოლო მოდინებაზე ჰესის 8 თვე. სისტემის საჭიროება თითქმის საპირისპიროა: ზამთრის დეფიციტს წყალსაცავიანი ჰესები და ქარის სადგურები ამცირებენ, მზის სადგურები კი ენერგიას ძირითადად მაშინ გამოიმუშავებს, როცა სისტემაში ისედაც სიჭარბეა. 2026 წელს ზაფხულში ენერგიის სიჭარბე პირველად გახდა შესამჩნევი, ზამთარში კი მიწოდების მნიშვნელოვანი ნაწილი კვლავ იმპორტითა და თბოსადგურებით დაიფარა.
ახალი აუქციონი სეზონური დისბალანსის შემცირების შესაძლებლობაა
ჩვენი შეფასებით, აუქციონზე მიზანშეწონილია იმ ტექნოლოგიების წახალისება, რომლებიც ქვეყანას მეტად სჭირდება. წინასწარ ცნობილი წესები ინვესტორის რისკს შეამცირებს, ახალ სიმძლავრეს კი ქვეყნისთვის უფრო იაფს გახდის. ამ მიზნით მნიშვნელოვანია:
1. ზამთრის გენერაციის წახალისება: უპირატესობა წყალსაცავიან ჰესებსა და ქარის სადგურებს, შემდეგ მოდინებაზე ჰესებს; ამ ტექნოლოგიებისთვის CfD-ის პირობების გადახედვა; მზის სადგურების განვითარება ქსელის ლიმიტების ფარგლებში.
2. გამჭვირვალობა: შეზღუდვის წესების რიგითობის წინასწარ განსაზღვრა; მიმდინარე პროექტების სიისა და 10-წლიანი პროგნოზის გამოქვეყნება.
3. მოთხოვნა და ექსპორტი: ადგილობრივი მოხმარებისა და ექსპორტის ხელშეწყობა.
ამასთან, მნიშვნელოვანია, რომ რეკომენდირებული წესების შემუშავებამ აუქციონი არ დააყოვნოს: ძირითადი პრინციპები შეიძლება აუქციონის პირობებშივე აისახოს, დეტალური რეგულირება კი პარალელურად დაიხვეწოს", - აღნიშნულია ანგარიშში.